Tơdrông Tơ'bôh 7 - Sơ̆p Hlabơar Nơ̆r 'Bok Kei-Dei

¹ Klaih kơ noh inh 'bôh puăn 'nu lu linh jang 'lơ̆ng, sư dơ̆ng tơ puăn pah mum teh đak. Lu sư wei puăn pah trong kial tơthu tơ teh đak, na sư wei kuă ăn kial tơthu pơrăm teh, pơrăm đak dơsĭ, pơrăm lu 'long.

² Đơ̆ng noh inh 'bôh dơ̆ng minh 'nu linh jang 'lơ̆ng nai sư tŏk đơ̆ng gah hơlĕch chĕp đŏng yâu wă chơ̆m tơ klĕng lu bơngai lui kơ 'Bok Kei-Dei, 'Bok mă arih ling-lang. Na linh jang noh pơma 'bơ̆r re kơ lu linh jang 'lơ̆ng nai mă dơ̆ng tơ puăn pah mum teh đak mă 'Bok Kei-Dei ăn pơrăm teh, đak dơsĭ, lu 'long noh, khan:

³ “Iĕm 'nĕ tam pơrăm teh, đak dơsĭ, lu 'long, gô nhôn chơ̆m đŏng yâu tôm kơ klĕng lu đĭch đam Kră Yang bơ̆n 'mơ̆i.”

⁴ Inh kơtơ̆ng đe khan sư wă chơ̆m đŏng yâu tơ klĕng rim kơ adrĕch adrung lu bơngai Isơrael truh kơ minh-hrĕng puăn-jĭt puăn-rơbâu 'nu đĭ-đăng.

⁵ Đơ̆ng adrĕch adrung Juđa mơjĭt-'bar rơbâu 'nu; đơ̆ng adrĕch adrung Rubên mơjĭt-'bar rơbâu 'nu; đơ̆ng adrĕch adrung Gat mơjĭt-'bar rơbâu 'nu;

⁶ đơ̆ng adrĕch adrung Aser mơjĭt-'bar rơbâu 'nu; đơ̆ng adrĕch adrung Naptali mơjĭt-'bar rơbâu 'nu; đơ̆ng adrĕch adrung Manase mơjĭt-'bar rơbâu 'nu;

⁷ đơ̆ng adrĕch adrung Simiôn mơjĭt-'bar rơbâu 'nu; đơ̆ng adrĕch adrung Lêwi mơjĭt-'bar rơbâu 'nu; đơ̆ng adrĕch adrung Isakar mơjĭt-'bar rơbâu 'nu;

⁸ đơ̆ng adrĕch adrung Sabalôn mơjĭt-'bar rơbâu 'nu; đơ̆ng adrĕch adrung Yôsep mơjĭt-'bar rơbâu 'nu; đơ̆ng adrĕch adrung Bênjamin mơjĭt-'bar rơbâu 'nu. Na lu sư chơ̆m đŏng yâu đĭ-đăng kơ lu bơngai noh.

Kon bơngai lơlang lơlap

⁹ Klaih kơ noh inh 'bôh lơlap lơlang ưh kơ kĕ jô̆ ôh, yua kơ đơ̆ng rim dêh char, rim adrĕch adrung, rim khŭl bơngai, rim kơ nơ̆r pơma, lu sư dơ̆ng 'bơ̆t anăp tang-dŏ 'Bok Kei-Dei păng Kon Triu. Lu sư tă ling hrŭk ao tai kok păng chĕp sơdrai hla.

¹⁰ Lu sư pơma hơdai đĭ kơ minh tơpôl khan: “Ư-ang Kră Yang bơ̆n mă oei tơ tang-dŏ hăm ư-ang Kon Triu. Sư boih pơklaih bơ̆n ăn kơ bơ̆n hiôk-hian.”

¹¹ Klaih kơ noh đĭ kơ lu linh jang 'lơ̆ng dơ̆ng tăp dăr kơ tang-dŏ 'Bok Pơtao, tăp dăr kơ 'bar-jĭt puăn 'nu lu đe kră păng tăp dăr kơ puăn anăn sem noh, đĭ lu sư 'nap kơkuh kơ 'Bok Kei-Dei mă oei tơ tang-dŏ khan:

¹² “Trŏ boih lu sư khan thoi noh. Bơnê kơ Ih Kră Yang nhôn 'Bok Kei-Dei. Ih 'lơ̆ng rŏ mơsêh mơyang pran tih hlôh wao tôm tơdrong, na trŏ kơ nhôn lui yom păng ư-ang Ih ling-lang ưh kơ layơ tôch. A-men.”

¹³ Klaih kơ noh đei minh 'nu lăm 'bar-jĭt puăn 'nu lu đe kră ei jet inh khan: “Ih hăm băt kơ lu bơngai mă hrŭk ao tai kok noh păng ih hăm băt kơ lu sư đơ̆ng yơ?”

¹⁴ Na inh tơl sư thoi âu: “Ơ 'bok, ih băt boih tơdrong 'noh.” Na sư roi kơ inh thoi âu: “Lu bơngai 'noh sơ̆ lu sư đei tơdrong truh đe pơm kơnê̆ kơ lu sư dêh, lu sư adrin lui truh lôch. Lu sư pih ao tơ pham Kon Triu, kok 'lơ̆ng boih.

¹⁵ Thoi noh na dang ei lu sư oei 'bơ̆t anăp tang-dŏ 'Bok Kei-Dei, kơkuh kơ 'Bok Kei-Dei ling-lang măng năr tơ noh. Pơtao bơ̆n 'Bok Kei-Dei kư̆m oei hơdai lu sư. Lu sư huay pă đei tơdrong truh dơ̆ng boih.

¹⁶ Lu sư ưh pă layơ pơngot dah ol kơ đak, ưh pă layơ hli kơ bơyan tŏ bơyan phang.

¹⁷ Kon Triu oei hơdai Pơtao bơ̆n 'Bok Kei-Dei, Sư wei-lăng lu đe noh, anhăk ba lu sư truh boih tơ tu đak mă ăn kơ kon bơngai arih ling-lang. 'Bok Kei-Dei sut đak măt lu sư huay pă nhơ̆m hmoi boih.”