Tit 3 - Sơ̆p Hlabơar Nơ̆r 'Bok Kei-Dei

¹ Ih tơ'blŏk ăn kơ lu buăl lui athei sư lui yom kơ dôm lu kră pơgơ̆r; păng dôm tơdrong 'lơ̆ng sư wơh wă kơ bơ̆n pơm, bơ̆n athei pơm mă tơpă.

² Khan kơ lu sư 'nĕ bâu roi pơjăm đe, 'nĕ kơ hơwĕng kơ đe, bơ̆n pơm jơhngơ̆m dim păng đe.

³ Sơ̆ bơ̆n ưh kơ băt tơpă tơdrong 'Bok Kei-Dei, na bơ̆n ưh kơ chu Sư. Bơ̆n tơchĕng akâu kơdih khan pơm trŏ, mă bơ̆n pơm ưh kơ trŏ ôh. Bơ̆n hưch hanh lơ tơdrong kư̆ kă ưh kơ băt pơm tơdrong 'lơ̆ng thoi yơ. Bơ̆n 'maih chă tơdrong tơhil păng đe. Bơ̆n 'nhĕng đe, areh kơ đe păng đe areh kơ bơ̆n mơ̆n.

⁴ Mă-lei 'Bok Kei-Dei khan tơbăt ăn kơ bơ̆n Sư 'mêm mơnat tơpă kơ bơ̆n na Sư wă pơklaih bơ̆n đơ̆ng tơdrong yoch.

⁵ Na dang ei Sư pơklaih bơ̆n đơ̆ng tơdrong yoch tơpă. Sư pơklaih bơ̆n, ưh kơ sĭ bơ̆n pơm tơdrong 'lơ̆ng 'mơ̆i na Sư pơklaih. Sư pơklaih bơ̆n bơngai yoch yua kơ Sư 'mêm mơnat kơ bơ̆n tơpă. Yang Bơhngol 'Lơ̆ng 'nhao rơgoh jơhngơ̆m bơ̆n đơ̆ng tơdrong yoch. Sư ăn kơ bơ̆n hŭt đĭ dôm tơdrong so păng ăn kơ bơ̆n jing bơngai 'nao.

⁶ 'Bok Kei-Dei ăn kơ bơ̆n Yang Bơhngol 'Lơ̆ng Sư wă kơ dŏng bơ̆n lăm tôm tơdrong tơpă. Sư ăn Yang Bơhngol 'Lơ̆ng kơlih kơ bơ̆n lui kơ Yêsu Krist mă 'Bok Dŏng Pơklaih bơ̆n.

⁷ 'Bok Kei-Dei 'mêm mơnat kơ bơ̆n tơpă na Sư pơklaih bơ̆n đơ̆ng tơdrong yoch păng Sư jô̆ bơ̆n bơngai 'lơ̆ng păng Sư boih. Sư ăn kơ bơ̆n jing kon Sư, na bơ̆n arih ling-lang păng Sư ning-mônh.

⁸ Dôm tơdrong inh bơtho âu trŏ tơpă. Păng dôm tơdrong inh bơtho ih lăm kơthơ âu ih bơtho khŏm khŏm kơ lu bơngai lui wă kơ sư pơm 'lơ̆ng păng đe ling-lang; kơlih kơ dôm tơdrong inh bơtho âu 'lơ̆ng ngăl păng yua kơ bơ̆n.

⁹ Ih 'nĕ ăn đe bơtho adrĕch adrung yă 'bok bơngai Juđê sơ̆ hŏ. Sư bơtho kư̆ kă đĕch, ưh kơ tơpă ôh. Lu sư kư̆m pơjah pơjăng tơhil băl gah tơdrong juăt 'Bok Kei-Dei pơkă sơ̆. Dôm tơdrong lu sư chă bơtho ưh kơ yua kiơ ôh.

¹⁰ Bơngai lui bu mă bơtho tơdrong 'Bok Kei-Dei sư bơtho chroih tơ nai, sư wă kơ đe kiơ̆ gah tơdrong sư đĕch, ih athei khă sư truh 'bar 'măng hŏ. Na ih khă dơ̆ng truh pêng 'măng boih, sư tam mă chu kơ ih, ih pơih sư 'nĕ pă ăn sư bơtho dơ̆ng.

¹¹ Ih kư̆m băt mơ̆n bơngai bu pơm thoi noh sư tŭk tơdrong 'lơ̆ng sư boih, na jing pơm tơdrong yoch. Sư bơtho ưh kơ trŏ thoi noh, sư kư̆m băt kơdih sư pơm yoch mơ̆n.

Pôl krao Tĭt oei păng sư păng athei Tĭt tơgŭm bre Sêna

¹² Mưh inh wơh Artemus dah Tisĭk năm tơplih ih wă bơlơh ih 'biơ̆, lăp sư truh tơ ih boih, na ih adrin năm tơ inh tơ Pơlei Nikôpôlis hŏ. Na mưh truh bơyan tơngiĕt kơnh na ih oei hơdai inh tơ Pơlei Nikôpôlis.

¹³ Sêna sư hơgei tôm tơdrong juăt 'Bok Kei-Dei pơkă sơ̆, na bre sư Apôlê wă năm bơtho đe. Hơdrol kơ bre sư wă năm tơklah đơ̆ng ih, ih athei tơdŏng mơnat ăn kơ bre sư tôm tơdrong tơmam hŏ, wă kơ bre sư huay kơ kơ'bah lăm tơmam bre sư wă năm bơtho đe.

¹⁴ Ih khan kơ lu bơngai lui kơchăng gah tơdrong 'lơ̆ng ling-lang păng mơnat ăn kơ lu bơngai dơnuh hin tơmam. Thoi âu boih tơdrong jang bơ̆n yua.

¹⁵ Lu bôl bơ̆n oei hơdai păng inh sư đei nơ̆r jet gia ih. Păng inh kư̆m apơi rơnguơ̆ ră kơ lu 'nhŏng oh bơngai lui mă 'mêm kơ nhôn tơ bŏl đak Kret. Nhôn kư̆m apinh 'Bok Kei-Dei wei-lăng rim 'nu kơ iĕm tôm tơdrong.