Ru 2 - Sơ̆p Hlabơar Nơ̆r 'Bok Kei-Dei

Rut chă mok 'ba lăm mir 'Bôô

¹ Naômi đei minh 'nu kơtum gah klo sư, anăn sư 'Bôô, sư bơngai đe pơyom păng mơdrŏng dêh lăm adrĕch Êlimêlek.

² Rut bơngai drŏ-kăn Môap khan kơ Naômi thoi âu: Apinh ih ăn kơ inh năm tơ mir wă kơ inh chă mok 'ba kiơ̆ đơ̆ng rŏng bu mă đei jơhngơ̆m mơnat kơ inh, na inh chă mok măi 'ba. Naômi drơ̆ng sư: Ơ mŏ, năm bĕ.

³ Thoi noh na Rut năm mok druh kiơ̆ đơ̆ng rŏng đe yuă 'ba lăm minh hlak mir ei. Sư chă mok noh trŏ kơ mir 'Bôô, kơtum Êlimêlek.

⁴ 'Bôô lĕch đơ̆ng pơlei Betlehem năm truh tơ mir sư khan kơ lu bơngai yuă 'ba thoi âu: Hơpơi kơ Kră Yang oei hơdai iĕm! Lu sư tơl khan. Hơpơi kơ Kră Yang ăn tơdrong pŭn hiôk kơ ih!

⁵ Đơ̆ng noh 'Bôô apinh bơngai wei-lăng yuă 'ba thoi âu: Bu bơngai âu?

⁶ Bơngai mă yuă 'ba tơl sư khan: Bơngai adruh noh sư bơngai Môap, mă wih kiơ̆ Naômi tơ âu.

⁷ Sư khan kơ nhôn thoi âu: Inh apinh iĕm ăn kơ inh chă mok 'ba đơ̆ng rŏng kơ iĕm yuă dônh dăi lu hơie 'ba sơlam hơchô̆ lu iĕm dan. Sư năm truh tơ âu đơ̆ng hrôih hei chă mok truh tơ dang ei, sư pơdơh ngôi tơ pơk lăp tŏ sĕt.

⁸ 'Bôô khan kơ Rut thoi âu, ơ mŏ adruh, mơ̆ng bĕ, ih 'nĕ kơ chă mok tơ mir đe nai hŏ! Păng kư̆m 'nĕ kơ weh đơ̆ng mir âu. Năm oei hơdai hăm lu adruh jang kơ inh.

⁹ Lăng bĕ lu sư yuă tơ mir ayơ na ih kiơ̆ đơ̆ng rŏng lu sư tơ noh. Inh kư̆m đei pơkă kơ lu tơdăm yuă 'ba kư̆m 'nĕ kơ bơhle ih. Tơdah ih 'maih nhă, năm nhă bĕ tơ get đak lu tơdăm đei sŏ.

¹⁰ Rut kŭp kơ̆l drap bon 'bơ̆t anăp sư, khan. Yua kơ kiơ inh mah đei tơdrong mơnat 'bơ̆t anăp ih, dĭng ih mah lăng inh, mă khan inh bơngai tơmoi ră?

¹¹ 'Bôô tơl thoi âu: Inh đei kơtơ̆ng đe roi dôm tơdrong ih đei pơm 'lơ̆ng kơ mĕ klo ih đơ̆ng rŏng kơ klo ih lôch păng yua kơ kiơ ih đei achăng lê̆ mĕ 'bă ih, dêh char ih rơneh, mă năm oei tơ anih mă ih ưh kơ băt adrol.

¹² Hơpơi kơ Kră Yang 'mong ăn kơ ih dôm tơdrong 'lơ̆ng ih đei pơm, ih gô năm kơ'nơp ala pơnăr Kră Yang 'Bok Kei-Dei đe Isơrael.

¹³ Rut tơl thoi âu: Ơ yŏng tơ'ngla inh, ih đei jơhngơ̆m mơnat kơ inh păng pơlung inh, ih pơm 'lơ̆ng kơ inh đam ih, mă khan inh ưh kơ trŏ kơ lu đam drŏ-kăn ih.

¹⁴ Kơplah jơ sŏng sa 'Bôô khan dơ̆ng kơ sư: Hiăng hơ-oei mă jê̆ tơ âu, iŏk sa 'bĕng âu păng chơ̆m tơ lăm sik iŭ bĕ, na sư năm hơ-oei jê̆ lu bơngai drŏ-kăn yua 'ba, lu đe noh ăn por hơdrĕng. Sư sa dĭng phĭ, kư̆m oei rơkah sư 'măn lê̆.

¹⁵ Đơ̆ng noh sư iung năm chă mok dơ̆ng 'Bôô pơma hơtă kơ bơngai tơdăm jang kơ sư. Ăn kơ sư chă mok măi lu hơie mă khan sơlam hơchô̆ 'ba ră iĕm 'nĕ kơ chrih pơm kơ sư mơlâu.

¹⁶ Hroch iŏk bĕ minh 'bar hơie pră lê̆ wă kơ sư dônh păng 'nĕ kơ chrih kơ sư!

¹⁷ Thoi noh sư chă mok lăm mir noh truh tơ kơsơ̆ măng; na sư pơjuă 'ba sư mok noh đei đăi dang minh êpha 'ba tơ'bâu.

¹⁸ Sư pŭ brŏk tơ pơlei. Sư tơ'bôh ăn kơ tơnei sư 'ba mă đơ̆ng sư chă mok, klaih kơ noh Rut iŏk ăn kơ tơnei sư 'ba mă đơ̆ng sư chă mok, klaih kơ noh Rut iŏk ăn kơ tơnei sư por đêl sư sŏng rơkah.

¹⁹ Tơnei drŏ-kăn sư khan: Năr âu ih chă mok 'ba tơ yơ? Ih jang tơ yơ? Pŭn hiôk kơ 'bok bu mă tơgŭm ih. Đơ̆ng noh sư roi kơ tơnei sư băt sư jang kơ bơngai bu. Sư khan: Tơ'ngla mă inh jang năr âu hei anăn sư 'Bôô.

²⁰ Naômi tơl mŏ mai sư thoi âu: Apinh Kră Yang ăn pŭn hiôk kơ sư, yua kơ Kră Yang ưh kơ lê̆ ôh pơm 'lơ̆ng kơ lu bơngai lôch păng lu bơngai oei arih. Naômi khan kơ sư dơ̆ng. 'Bok noh jĭ kơtum bơ̆n jê̆, sư noh gơh huai iŏk mŭk tơmam bơ̆n dơ̆ng.

²¹ Rut bơngai drŏ-kăn Môap khan: 'Bok noh sư khan kơ inh, oei hơdai hloi hăm lu đam drŏ-kăn inh dĭng đĭ bơyan yuă 'ba inh!

²² Naômi khan kơ Rut mŏ mai sư thoi âu: Ơ mŏ adruh 'lơ̆ng dêh ih năm kiơ̆ hơdai đam drŏ-kăn sư, ih 'nĕ pă chă năm tơ mir đe nai dơ̆ng, hli kơ đe pơm kơnê̆ kơ ih!

²³ Thoi noh sư kiơ̆ hơdai hăm lu đam drŏ-kăn jang kơ 'Bôô, chă mok dĭng truh hlôi kơ bơyan yuă 'ba tơ'bâu păng 'ba mi đĭ. Păng sư oei hăm tơnei drŏ-kăn sư.