Philip 2 - Sơ̆p Hlabơar Nơ̆r 'Bok Kei-Dei

¹ Yua kơ bơ̆n pôm đon hăm Yêsu Krist na bơ̆n băt kơ pơlung dih băl, băt kơ 'mêm mơnat dih băl; 'noh yua kơ Yang Bơhngol 'Lơ̆ng oei hăm bơ̆n.

² Thoi noh na inh wă kơ iĕm iŏk dôm nơ̆r inh akhan kơ iĕm, wă kơ iĕm đei đon 'mêm mơnat dih băl; păng wă kơ iĕm pôm đon lăm tôm tơdrong, na jơhngơ̆m inh kư̆m chhơp rai loi.

³ Iĕm 'nĕ kơ pơm minh tơdrong kiơ mă ưh kơ 'lơ̆ng kơ đe, thoi lĕ kơ tơdrong pơang, dah tơdrong ưh kơ băt mơnat kơ đe. Iĕm athei pơm 'lơ̆ng ling-lang thoi bơngai dim jô̆ kơ đe bơngai 'lơ̆ng hloh kơ iĕm.

⁴ Iĕm athei pơhiôk jơhngơ̆m đe mơ̆n, 'nĕ kơ pơhiôk jơhngơ̆m kơdih đĕch ôh.

⁵ Iĕm athei tơchĕng đon thoi Yêsu Krist tơchĕng:

⁶ Sư Kră Yang atŏ hăm 'Bok Kei-Dei, mă-lei Sư ưh kơ 'mêm ôh tơdrong Sư atŏ hăm 'Bok Kei-Dei noh.

⁷ Sư iŏk đon ala, păng jur jing thoi kon bơngai, păng chu phep đep yom thoi bơngai đĭch đe.

⁸ Akâu akar Sư lei-lăi thoi kon bơngai, păng Sư iŏk đon ala, chu 'Bok Kei-Dei ling-lang truh tơ Sư lôch, mă lôch pơmat tơ 'long pơglang tăm.

⁹ Yua kơ thoi noh boih na 'Bok Kei-Dei pôk atŏk Sư pơm tih dang ei, Sư tih hloh kơ đĭ-đăng.

¹⁰ Mă đĭ-đăng lu oei tơ kơpal plĕnh ti, mă oei tơ teh âu, mă lu oei tơ ala teh sŭng, đĭ-đăng gô sơtơ̆p kŭl-tăng kơkuh kơ Sư.

¹¹ Đĭ-đăng bơngai gô kơnăl kơ Sư Kră Yang, na kon bơngai ư-ang kơ 'Bă Sư 'Bok Kei-Dei.

Adrin pơm 'lơ̆ng ling-lang

¹² Ơ lu 'nhŏng oh mă inh 'mêm kơeng, iĕm băt boih Yêsu Krist iŏk đon ala thoi noh na iĕm athei adrin pơm kiơ̆ khŏm khŏm păng adrin pơm mă 'blep thoi 'Bok Kei-Dei wă, hli kơ Sư ưh kơ iŏk iĕm kơplah Yêsu Krist jur ning-mônh. Sơ̆ kơplah inh oei hăm iĕm, inh 'bôh iĕm pơm kiơ̆ 'blep tơpă, mă đơ̆ng kơdrô̆ iĕm dang ei inh ưh kơ băt, na iĕm athei kiơ̆ mă tơpă hloh kơ noh dơ̆ng.

¹³ Tơdrong noh 'Bok Kei-Dei hơmet lăm jơhngơ̆m iĕm, tơgŭm iĕm pơm kiơ̆ 'blep thoi Sư wă.

¹⁴ Mă pơm tơdrong kiơ kiơ iĕm 'nĕ kơ jŏk, 'nĕ kơ pơjah pơjăng;

¹⁵ thoi noh đe anăn kon 'Bok Kei-Dei, adrin pơm 'lơ̆ng ling-lang, na huay kơ đei tơdrong yoch, mă khan iĕm oei tŏk-bŏk lu bơngai kơnê̆, lu bơngai hơlĕnh pơdăr, lu bơngai dang lĕ kơ oei lăm măng mu na lu sư gơh pơm dôm tơdrong 'noh. Gah iĕm hlôh wao tôm tơdrong boih, thoi lĕ kơ hơdah ŭnh, na iĕm athei pơchrang ăn tơdrong hơdah iĕm kơ lu sư kơplah oei tơ teh âu.

¹⁶ Iĕm tơ'bôh kơ lu sư tơdrong 'Bok Kei-Dei ăn kơ kon bơngai arih, thoi noh na lăp truh năr Yêsu Krist jur ning-mônh jơhngơ̆m inh hiôk dêh, yua kơ tơdrong jang inh đei yua; ưh kơ sĭ jang tŭk đĕch ôh.

¹⁷ Inh băt kơ iĕm lui kơjăp tơpă, na iĕm pơyơ̆r kơ 'Bok Kei-Dei tơmam wă tơgŭm inh. Na tơmam iĕm pơyơ̆r noh dang tơmam đe soi kơ 'Bok Kei-Dei. Na kơnh pơgê tơ̆ng đe mah pơlôch inh, pham inh kư̆m dang đak đe 'măn hơdai tơmam soi iĕm pơyơ̆r noh mơ̆n. Tơ̆ng inh mah lôch tơpă jơhngơ̆m inh hiôk dêh, dang iĕm hiôk kơ pơyơ̆r kơ 'Bok Kei-Dei tơmam.

¹⁸ Inh kư̆m wă kơ iĕm hiôk kơ tơdrong inh lôch yua kơ tơdrong 'Bok Kei-Dei mơ̆n.

Pôl wă wơh Timôthê năm tơ Pơlei Philip

¹⁹ Tơ̆ng Kră Yang Yêsu wă, pă đunh boih inh wă wơh Timôthê năm tơ iĕm wă kơ inh băt kơ iĕm dang ei thoi yơ. Thoi noh na iĕm kư̆m hiôk, inh kư̆m hiôk.

²⁰ Lu buăl nhôn tơ âu ưh kơ đei bu 'mêm kơ iĕm dang Timôthê 'mêm kơ iĕm. Gah sư inh 'bôh sư 'mêm kơ iĕm tơpă, na inh 'bôh sư lăp đon kơ tơgŭm iĕm.

²¹ Bơngai nai jang tơchĕng kơ akâu sư kơdih đĕch, ưh kơ tơchĕng kơ tơdrong Yêsu Krist tơpă ôh.

²² Mă-lei iĕm băt boih kơ Timôthê sư bơngai 'lơ̆ng tơpă; sư jang tơgŭm inh bơtho tơdrong Yêsu Krist, thoi lĕ kơ kon jang tơgŭm 'bă.

²³ Kơnh pơgê tơ̆ng đang đe sek tơlang inh, đe wă pơm kơ inh lơliơ, inh wơh hloi Timôthê năm pơtruh kơ iĕm wă kơ iĕm băt.

²⁴ Tơ̆ng Kră Yang oei wă yua inh, ưh pă đunh boih, inh wă năm ngôi tơ iĕm.

²⁵ Dang ei inh athei Êpaphôdit jah brŏk tơ iĕm, đơ̆ng iĕm wơh sư năm ăn kơ inh tơmam, hăm iĕm wă kơ sư tơgŭm inh tơ âu. Sư 'nhŏng oh bơ̆n 'lơ̆ng tơpă, jang tơgŭm inh, dang linh tơgŭm băl tơdrong tơblah.

²⁶ Na dang ei inh tơchĕng trŏ kơ ăn kơ sư brŏk, yua kơ sư kư̆m rơnguơ̆ kơ iĕm boih. Păng sư nŏng kơ tơchĕng kơ iĕm, hli kơ iĕm ngêh kơ sư oei jĭ thoi ki.

²⁷ Ki sư jĭ kal tơpă, mah wă lôch, mă-lei 'Bok Kei-Dei mơnat kơ sư, mơnat kơ inh mơ̆n. Tơ̆ng sư lôch 'Bok Kei-Dei hli kơ inh sơ'ngon rai dêh.

²⁸ Thoi noh na inh wă kơ sư jah brŏk tơ iĕm, wă kơ iĕm hiôk 'bôh sư, mă inh kư̆m hiôk mơ̆n.

²⁹ Thoi noh na iĕm sơng iŏk sư bĕ păng iĕm athei bơnê kơ sư yua kơ sư jang tơgŭm inh. Iĕm băt boih tơdrong bơ̆n lui kơ Yêsu Krist athei sơng iŏk dih băl mă 'lơ̆ng.

³⁰ Sư jĭ wă lôch yua kơ sư adrin jang tơdrong Yêsu Krist tang iĕm, yua kơ iĕm ataih ưh kơ gơh jang tơgŭm inh. Mă-lei sư ưh kơ hli kơ lôch ôh.