Mathiơ 8 - Sơ̆p Hlabơar Nơ̆r 'Bok Kei-Dei

¹ Lăp Yêsu jur đơ̆ng kông lu bơngai tơpôl lơ noh kư̆m jur kiơ̆ Sư mơ̆n.

² Kơplah noh đei minh 'nu bơngai jĭ chin năm jê̆ Sư sơtơ̆p kŭl-tăng păng khan: “Ơ 'Bok, dah Ih wă, Ih gơh pơklaih inh.”

³ Na Yêsu chro ti pel bơngai ei păng khan: “Inh wă tơpă pơklaih ih, Inh pơklaih ih dang ei.” Na bơngai jĭ ei klaih kơtă hloi.

⁴ Yêsu khan: “Ih 'nĕ chă roi kơ đe. Dang ei ih klaih boih na ih năm tơ'bôh akâu ih kơ 'bok soi păng ih soi sơmah kơ 'Bok Kei-Dei kiơ̆ thoi Môis pơkă sơ̆ wă kơ đe băt tơdrong jĭ ih klaih tơpă boih.”

Yêsu pơklaih đĭch 'bok tih linh

⁵ Yêsu năm tơ Pơlei Kapernum. Tơ ei đei minh 'nu 'bok tih linh sư bơngai Rôm, chă Yêsu. Lăp 'bôh boih na sư apinh thoi âu:

⁶ “Ơ 'Bok, đĭch inh păn kơ jĭ tơ hnam pă kĕ iung.”

⁷ Na Yêsu khan kơ sư: “Ŏ, Inh năm pơklaih sư.”

⁸ 'Bok tih linh ei khan: “Ơ 'Bok, inh ưh kơ hơnhŏ wă anhăk ba Ih tơ hnam inh ôh, inh wă kơ Ih sơkat đơ̆ng âu đĕch na sư tơ hnam klaih.

⁹ Inh kư̆m đei đe pơgơ̆r inh păng inh kư̆m đei pơgơ̆r lu linh mơ̆n. Dah inh khan kơ bơngai âu mă bơngai to: Năm bĕ, sư năm hloi chu inh. Dah inh bơtho lu đĭch đam inh jang, mă dôm tơdrong kiơ, lu sư jang hloi. Inh wă kơ thoi noh đĕch, na dang ei inh wă kơ Ih sơkat đơ̆ng âu đĕch na sư tơ hnam klaih.”

¹⁰ Yêsu kơtơ̆ng 'bok tih linh khan thoi noh, Sư mah hlĭch kơ đon yua kơ 'bok noh đei đon lui tơpă. Thoi noh na Sư khan kơ lu bơngai kiơ̆ ei: “Inh khan kơ iĕm tơpă, đơ̆ng sơ̆ Inh tam mă 'bôh ôh khŭl bơngai Juđê lui kơjăp dang bơngai Rôm âu.

¹¹ Na Inh wă khan kơ iĕm dơ̆ng, ning-mônh gô đei lơ bơngai jơ̆p-jang kơ teh đak âu năm sŏng sa hơdai hăm Abraham, Isăk, Jakôp tơ dêh char 'Bok Kei-Dei.

¹² Lu bơngai Juđê 'Bok Kei-Dei 'mêm kơeng kơ adrĕch adrung lu sư ră, mă-lei lu sư ưh kơ wă lui, na ning-mônh 'Bok Kei-Dei gô tơlơ̆ tŭk lu sư tơ lăm anih măng mu, lê̆ lu sư nhơ̆m hmoi tơkăp sơnĕnh tơ noh.”

¹³ Yêsu khan dơ̆ng kơ 'bok tih linh: “Brŏk mă 'lơ̆ng, đĭch ih klaih boih yua kơ ih lui.” Đĭch sư klaih hloi đơ̆ng jơ 'noh tơpă.

Yêsu pơklaih lơ bơngai jĭ jăn

¹⁴ Yêsu năm tơ hnam Pêtrôs 'bôh tơnei sư oei păn kơ bơlŏ.

¹⁵ Yêsu pel pôm ti, sư klaih hloi kơ bơlŏ, na iung chă awih awăn kơ đe Yêsu.

¹⁶ Lăp 'năr mơ̆t adrơ̆m kơsơ̆ ei đei lơ bơngai năm ba lu bơngai yang kơnê̆ mơ̆t pơm kơ sư wơnh. Na Yêsu pơma kơ lu yang kơnê̆ lăp minh nơ̆r đĕch, mă-lei lu yang kơnê̆ lĕch jăk hloi đơ̆ng akâu lu bơngai noh. Păng Sư kư̆m pơklaih dôm lu bơngai jĭ jăn nai.

¹⁷ Yêsu pơm thoi noh wă kơ 'blep trŏ thoi Êsai khan lê̆ hơdrol sơ̆ thoi âu: “Sư pơklaih tôm tơdrong jĭ jăn kon bơngai bơ̆n.”

Đei bơngai wă kiơ̆ Yêsu

¹⁸ Yêsu 'bôh lơ bơngai tăp dăr kơ Sư, na Sư pơtơm lu bơngai pơhrăm păng Sư găn tŏk pah to đak.

¹⁹ Lăp lu sư wă yak đei minh 'nu thây bơtho tơdrong juăt đe Juđê apinh Sư: “Ơ 'Bok Thây, mă Ih năm tơ yơ yơ, inh wă kiơ̆ Ih ngăl.”

²⁰ Yêsu khan kơ sư: “Mơja đei anih tep, sem păr kư̆m đei tơpu. Inh Kon Bơngai ră mă-lei ưh kơ đei anih tep ôh.”

²¹ Minh 'nu bơngai lui nai khan kơ Yêsu: “Ơ 'Bok, inh wă kiơ̆ Ih mơ̆n, mă-lei gô inh 'bŭ 'bă inh 'mơ̆i.”

²² Yêsu khan: “Ưh ôh, ih kiơ̆ Inh dang ei hloi, tơdrong 'bŭ bơngai lôch lê̆ tơduă lu bơngai lôch tung 'bŭ dih băl.”

Yêsu khă kial hơbŭt păng đak poh-yă

²³ Klaih kơ noh Yêsu hao thŏng-nan, lu bơngai pơhrăm kư̆m hao kiơ̆ Sư mơ̆n.

²⁴ Kơplah lu sư oei yak kơpal đak dơsĭ, đei kial hơbŭt păng đak poh-yă tih tơprah mơ̆t lăm thŏng-nan lu sư, pă 'biơ̆ wă jê̆ 'bĕnh. Kơplah noh Yêsu oei tep.

²⁵ Na lu đe ei năm râu Yêsu khan: “Ơ 'Bok, dŏng bơ̆n bĕ, bơ̆n wă lôch kơ đak lơ̆p.”

²⁶ Yêsu khan kơ lu đe ei: “Yua kơ kiơ iĕm hli, iĕm tam băt gơnang kơ Inh hă?” Sư iung khă hloi kial hăm đak poh-yă. Kial thĕng hloi, đak poh-yă kư̆m pă adrŏ adrĕnh.

²⁷ Lu đe ei lăng hlĭch, na lu sư jet băl: “Bơngai bu âu kih, kial hơbŭt, đak dơsĭ poh-yă tih dang noh, mă kư̆m chu yom kơ Sư.”

Yêsu pơklaih 'bar 'nu bơngai wơnh

²⁸ Lu sư tŏk hlôi pah to đak dơsĭ tơ tơring đe Gadara, 'bơ̆t ei đei 'bar 'nu bơngai yang kơnê̆ mơ̆t pơm kơ sư wơnh, lĕch đơ̆ng bơsat năm tơkan tơ Yêsu. Ưh kơ đei bu pơ̆n năm brih trong ei yua kơ bre sư khĕnh dêh.

²⁹ Lăp truh tơ Yêsu bre sư pơma 'bơ̆r re khan: “Ơ Kon 'Bok Kei-Dei, Ih truh tơ âu wă pơrăm nhôn hă? Ưh tam mă trŏ kơ năr Ih wă pơrăm nhôn ôh lah.”

³⁰ Jơ'bôt 'noh đei minh tơpôl nhŭng chă sa.

³¹ Lu yang kơnê̆ ei apinh Yêsu khan: “Dah Ih puh nhôn lĕch đơ̆ng bre âu, lei Ih ăn kơ nhôn mơ̆t tơ lu nhŭng to.”

³² Na Yêsu khan: “Năm bĕ.” Yang kơnê̆ lĕch hloi đơ̆ng akâu bre noh mơ̆t tơ minh tơpôl nhŭng oei chă sa kiơ̆ groi kông ei, lu nhŭng ei kơdâu jur đơ̆ng kông groi ei huŏng hơtat tơ đak dơsĭ glơ̆k lôch đĭ minh tơpôl nhŭng ei.

³³ Lu bơngai mă wei nhŭng 'bôh thoi noh na kơdâu brŏk tơ pơlei lu sư chă roi kơ đe tơdrong nhŭng păng tơdrong 'bar 'nu bơngai yang kơnê̆ mơ̆t klaih boih.

³⁴ Đĭ-đăng kon pơlei pơla năm tơkan tơ Yêsu apinh Sư weh đơ̆ng tơring lu sư.