Mathiơ 7 - Sơ̆p Hlabơar Nơ̆r 'Bok Kei-Dei

¹ “Iĕm 'nĕ bâu roi đe, khan đe bơngai ưh kơ 'lơ̆ng. Dah iĕm jô̆ kơ đe bơngai ưh kơ 'lơ̆ng, kơnh 'Bok Kei-Dei kư̆m jô̆ kơ iĕm bơngai ưh kơ 'lơ̆ng mơ̆n.

² Iĕm jô̆ kơ đe thoi yơ, 'Bok Kei-Dei jô̆ kơ iĕm thoi noh mơ̆n.

³ Lơliơ iĕm jô̆ kơ 'nhŏng oh iĕm đei tơdrong yoch mă iĕm đei tơdrong yoch tih hloh kơ sư dơ̆ng, dang iĕm 'bôh 'bruih iĕ đom lăm klong măt 'nhŏng oh iĕm, mă iĕm ưh kơ mơn kơ 'long tih oei đom lăm klong măt iĕm kơdih?

⁴ Lơliơ iĕm pơ̆n khan kơ 'nhŏng oh iĕm khan: ‘Lê̆ inh iŏk 'bruih đom lăm klong măt ih,’ lăm klong măt iĕm kơdih 'long tih đom ră mă-lei kơdih iĕm ưh kơ mơn?

⁵ Ơ bơngai 'bơ̆r đak klak ŭnh, iĕm iŏk tŭk 'long tih đom lăm klong măt iĕm 'mơ̆i na iĕm gơh 'bôh hơdah iŏk tŭk 'bruih iĕ đom lăm klong măt 'nhŏng oh iĕm.

⁶ “Iĕm 'nĕ pă bơtho tơdrong 'Bok Kei-Dei kơ lu bơngai mă ưh kơ lui mă wă pơjăm pơjuă iĕm ling-lang. 'Noh dang bơ̆n tŭk 'nhĕm giĕng ăn kơ kŏ sa, dang dơmŏng đe gĭt mă ăn kơ nhŭng, hli kơ lu sư pơm kơnê̆ kơ iĕm dơ̆ng.

Adrin krao khan

⁷ “Krao khan apinh 'Bok Kei-Dei khŏm khŏm na Sư gô asong kơ iĕm. Iĕm nŏng kơ chă khŏm khŏm, Sư gô tơ'bôh kơ iĕm. Iĕm dơdŭ 'măng Sư khŏm khŏm, na Sư gô pơih ăn.

⁸ Bơngai bu krao khan apinh 'Bok Kei-Dei kiơ kiơ, 'Bok Kei-Dei gô asong. Bơngai bu chă kiơ kiơ, 'Bok Kei-Dei gô tơ'bôh ăn. Bơngai bu dơdŭ 'măng 'Bok Kei-Dei, 'Bok Kei-Dei gô pơih ăn.

⁹ Na bĭ lăm lu iĕm hăm đei bu kon sư apinh por mă ăn tơmo?

¹⁰ Kon sư apinh ka mă ăn 'bih kơep?

¹¹ Iĕm bơngai kơnê̆ ră mă-lei iĕm kư̆m băt chă ăn kơ kon iĕm tơmam sa 'lơ̆ng, pơma kiơ kơ 'Bă bơ̆n tơ plĕnh ti, Sư asong ăn kơ bơ̆n tơmam 'lơ̆ng tơpă dôm lu bơngai mă krao khan apinh Sư, Sư ưh kơ kret ôh.

¹² Thoi noh na mă dôm tơdrong kiơ iĕm wă kơ đe pơm tơgŭm iĕm, iĕm athei pơm tơgŭm đe lei-lăi thoi noh. 'Noh trŏ kơ tơdrong juăt Môis păng tơdrong lu bơngai pơtruh nơ̆r 'Bok Kei-Dei sơ̆.

'Măng tih iĕ

¹³ “Iĕm athei adrin mơ̆t trong 'măng iĕ mă năm tơ anih arih ling-lang. Trong 'măng tih mơ̆t 'bônh ră, mă-lei năm tơ dơnâu ŭnh 'Bok Kei-Dei phak, kư̆m lơ bơngai năm trong noh.

¹⁴ Trong 'măng mơ̆t tơ anih arih ling-lang iĕ păng anat kơ yak tơpă, na hui bơngai 'bôh 'măng iĕ noh.

Bơ̆n băt tơdrong 'lơ̆ng kơnê̆ thoi yơ?

¹⁵ “Iĕm kơchăng kơ lu bơngai hơlĕnh khan sư bơngai pơtruh nơ̆r 'Bok Kei-Dei. Lu sư bơngai 'bơ̆r đak klak ŭnh. Bơ̆n lăng gah 'ngoaih sư hơbŏ dim thoi triu, mă-lei lăm to sư dang kŏ-so 'maih chă kăp đe.

¹⁶ Iĕm băt kơ sư bơngai kơnê̆, yua kơ iĕm 'bôh tơdrong kơnê̆ sư pơm. Kư̆m thoi lu 'long, khŭl 'long jơla ưh kơ gơh pơjing plei hơmu ôh; thoi lĕ kơ 'long bơmrôm sư ưh kơ gơh pơjing plei hơra ôh.

¹⁷ 'Long 'lơ̆ng pơjing plei 'lơ̆ng, 'long kơnê̆ pơjing plei kơnê̆.

¹⁸ 'Long 'lơ̆ng ưh kơ gơh pơjing plei kơnê̆, 'long kơnê̆ ưh kơ gơh pơjing plei 'lơ̆ng.

¹⁹ 'Long ayơ mă ưh kơ pơjing plei 'lơ̆ng, 'long 'noh đe kăl 'buh tŭk lăm ŭnh.

²⁰ Kư̆m thoi lu 'long 'noh mơ̆n, lu bơngai hơlĕnh khan sư pơtruh nơ̆r 'Bok Kei-Dei, bơ̆n 'bôh dôm tơdrong kơnê̆ sư pơm na bơ̆n băt sư bơngai kơnê̆.

Yêsu khan Sư ưh kơ wă iŏk lu bơngai hơlĕnh khan lu sư jang tơdrong 'Bok Kei-Dei

²¹ “Ưh kơ sĭ dôm lu bơngai mă krao Inh Kră Yang gơh mơ̆t tơ dêh char 'Bok Kei-Dei pơđĭ ôh. Pôm lu bơngai mă lui kiơ̆ kơ 'Bă Inh đĕch gơh mơ̆t tơ dêh char Sư noh.

²² Năr tôch ning-mônh đei lơ bơngai pơma lung Inh thoi âu: ‘Ơ Kră Yang, nhôn yua anăn Ih pơtruh nơ̆r 'Bok Kei-Dei, nhôn yua anăn Ih pơpuh yang kơnê̆ lĕch đơ̆ng akâu bơngai păng nhôn pơm lơ tơdrong mơsêh mơyang nai yua anăn Ih.’

²³ Mă-lei năr 'noh kơnh Inh gô khan kơ lu sư thoi âu: ‘Inh ưh kơ băt kơ lu iĕm âu ôh. Weh tơ nai năm, iĕm bơngai kơnê̆ ngăl.’

'Bar 'nu bơngai pơm hnam

²⁴ “Bơngai bu mơ̆ng nơ̆r Inh bơtho, na kiơ̆ hloi, bơngai 'noh dang bơngai hơgei pơm hnam kơpal tơmo kŭk.

²⁵ Mă 'mi tih, mă đak lơ̆p, mă kial hơbŭt kư̆m ưh kơ hơlŭng, ưh kơ păk ôh, yua kơ sư pơm klop kơ tơmo kŭk.

²⁶ Bơngai bu mơ̆ng nơ̆r Inh bơtho, mă ưh kơ pơm kiơ̆, bơngai 'noh thoi bơngai kơtul pơm hnam tơ pơlao chuơh.

²⁷ Na mưh truh bơyan 'mi tih, đak lơ̆p, kial hơbŭt, hnam 'noh hơlŭng păk pơchah hoch đĭ.”

Đe băt kơ Yêsu bơtho hơgei

²⁸ Hlôi Yêsu bơtho đang boih, na lu bơngai tơpôl ei mah chrêu kơ đon tơdrong Sư bơtho noh,

²⁹ yua kơ Sư bơtho hơgei thoi lĕ Sư băt kơdih, ưh kơ thoi lu thây bơtho tơdrong juăt đe Juđê chă bơtho đe.