Mathiơ 6 - Sơ̆p Hlabơar Nơ̆r 'Bok Kei-Dei

¹ “Iĕm athei kơchăng, 'nĕ pơang tơdrong 'lơ̆ng iĕm pơm kơ đe 'bôh; dah iĕm pơang tơ'bôh kơ đe tơdrong 'lơ̆ng iĕm pơm, lei 'Bă bơ̆n tơ plĕnh ti ưh kơ bơnê kơ iĕm ôh.

² Yua thoi noh na mưh iĕm wă tơgŭm đe tơmam, dah jên, iĕm 'nĕ ăn 'bơ̆t anăp đe bôl buăl 'bôh thoi lu bơngai pơang akâu kơdih lu sư chă ăn kơ đe tơmam tơ hnam akŭm 'Bok Kei-Dei, tơ kơphô̆, tơ kơchơ, wă kơ đe ư-ang kơ sư khan sư bơngai băt tơgŭm đe. Inh khan kơ iĕm tơpă, lu bơngai mă pơang kơ đe thoi noh tơdrong bơnê lu sư jơ̆ lu đe mă ư-ang kơ sư noh đĕch, ưh kơ đei đơ̆ng 'Bok Kei-Dei bơnê ôh.

³ Dah iĕm wă tơgŭm đe tơmam, dah jên, iĕm 'nĕ roi kơ đe, mă bôl juăt kơdih kư̆m 'nĕ kơ roi.

⁴ Iĕm thĕng đĕch mă-lei 'Bă bơ̆n tơ plĕnh ti 'bôh boih tơdrong iĕm pơm 'noh, thoi noh na Sư gô bơnê kơ iĕm tơpă.

Yêsu bơtho gah tơdrong krao khan

⁵ “Iĕm 'nĕ krao khan thoi lu bơngai pơang akâu, lu sư wă kơ đe ư-ang kơ sư na lu sư pơm iung dơ̆ng krao khan kơ 'Bok Kei-Dei 'bơ̆t anăp bôl tơ lăm hnam akŭm, phŏ tơ kơphô̆, phŏ tơ kơchơ, wă kơ đe 'bôh na ư-ang kơ sư khan sư bơngai 'lơ̆ng. Inh khan kơ iĕm tơpă, lu bơngai thoi noh tơdrong bơnê lu sư jơ̆ lu đe mă ư-ang kơ sư noh đĕch, ưh kơ đei đơ̆ng 'Bok Kei-Dei bơnê ôh.

⁶ Dah iĕm wă krao khan, iĕm athei tang 'măng kơdrô̆ tơ anih hrĕp. Iĕm krao khan thoi noh na iĕm tơchĕng truh tơ 'Bă bơ̆n Yang mă bơ̆n ưh kơ gơh 'bôh. Mă iĕm krao khan tơ anih hrĕp Sư kư̆m 'bôh mơ̆n, Sư ăn tơdrong iĕm apinh noh tơpă.

⁷ “Kơplah iĕm krao khan, iĕm athei tơchĕng tơpă tơdrong iĕm krao khan noh, 'nĕ pơma pơlơ̆k pơle đon tơchĕng tơ nai thoi bơngai kơkuh kơ yang nai, yua kơ lu sư tơchĕng ăp kơ pơma pơlơ̆k pơle lơ 'mơ̆i na 'Bok Kei-Dei ăn.

⁸ Iĕm 'nĕ krao khan thoi noh hŏ, yua kơ 'Bă bơ̆n băt hơdrol kơ tơdrong iĕm wă krao khan apinh Sư noh.

⁹ Iĕm athei krao khan thoi âu: ‘Ơ 'Bă lu nhôn mă oei tơ plĕnh ti, ăn anăn Ih jing ư-ang.

¹⁰ Ăn kơ dêh char Ih tĕnh truh. Ăn kơ tơdrong tơchĕng Ih gơh jing, mă tơ teh âu kư̆m thoi tơ plĕnh ti.

¹¹ Apinh Ih ăn kơ nhôn năr 'nâu đei sŏng sa mah.

¹² Apinh Ih 'nĕ jô̆ yo kơ nhôn, thoi nhôn ưh kơ jô̆ yo kơ đe pơm yoch păng nhôn.

¹³ Apinh Ih 'nĕ ăn kơ nhôn lui kơ đe pơhlŭ pơlung. Apinh Ih dŏng pơklaih nhôn đơ̆ng tơdrong kơnê̆, kơlih kơ dêh char Ih, tơdrong mơsêh mơyang Ih, tơdrong 'lơ̆ng rŏ Ih oei tơ Ih ling-lang. A-men.’

¹⁴ “Dah iĕm huay kơ jô̆ yo kơ đe pơm yoch kơ iĕm, lei 'Bă bơ̆n tơ plĕnh ti kư̆m huay kơ jô̆ yo kơ iĕm mơ̆n.

¹⁵ Dah iĕm oei jô̆ yo kơ đe pơm yoch kơ iĕm, lei 'Bă bơ̆n tơ plĕnh ti kư̆m jô̆ yo kơ tơdrong yoch iĕm mơ̆n.

Yêsu bơtho gah tơdrong ơ̆t kơ por

¹⁶ “Năr iĕm ơ̆t kơ por wă kơkuh kơ 'Bok Kei-Dei, iĕm 'nĕ pơm đon sơ'ngon thoi lu bơngai pơang akâu. Lu sư pơm kơ akâu akar muh măt sư sơ'ngon, wă kơ đe băt tơdrong lu sư ơ̆t kơ por. Inh khan kơ iĕm tơpă, lu bơngai thoi noh tơdrong bơnê lu sư jơ̆ lu đe mă ư-ang kơ sư noh đĕch, ưh kơ đei đơ̆ng 'Bok Kei-Dei bơnê ôh.

¹⁷ Năr iĕm ơ̆t kơ por iĕm athei 'nhao muh măt kor sŏk mă 'lơ̆ng hơnơ̆ng,

¹⁸ wă kơ đe ưh kơ băt tơdrong iĕm ơ̆t kơ por. Thoi noh na 'Bă bơ̆n Yang mă iĕm ưh kơ gơh 'bôh, Sư 'bôh tơdrong hrĕp iĕm pơm noh na Sư mơnat, Sư asong tơdrong iĕm apinh Sư noh tơpă.

Tơmam tơ plĕnh kăl hloh kơ tơmam tơ teh

¹⁹ “Iĕm 'nĕ chă mong mŭk tơmam dah jên tơ teh âu lơ, yua kơ tơ teh âu đei sang-sa, mua reh, hăm hli kơ đe iŏk tơtông mơ̆n.

²⁰ Iĕm athei chă mong mŭk tơmam tơ plĕnh ti đĕch huay kơ đei sang-sa, mua reh, hăm ưh kơ đei bu gơh iŏk tơtông.

²¹ Dah iĕm đei mŭk tơmam tơ plĕnh ti, jơhngơ̆m đon iĕm kư̆m tơchĕng tơ noh mơ̆n. Dah iĕm đei mŭk tơmam tơ teh âu, jơhngơ̆m đon iĕm kư̆m tơchĕng tơ teh âu mơ̆n.

²² “Măt pơm ŭnh kơđeng kơ akâu bơ̆n. Dah măt bơ̆n hơdah 'lơ̆ng ưh kơ hưch hanh tơdrong ala teh, lei tôm tơdrong akâu bơ̆n jang kư̆m 'lơ̆ng mơ̆n.

²³ Dah măt bơ̆n hưch hanh tơdrong ala teh đĕch lei măt bơ̆n dang tol, tôm tơdrong akâu bơ̆n jang kư̆m ưh kơ 'lơ̆ng, dang bơ̆n oei lăm măng mu đĕch.

Mă tôm tơdrong gô mơ̆ng kơ 'Bok Kei-Dei đĕch

²⁴ “Minh 'nu đĭch ưh kơ gơh jang kơ 'bar 'nu yŏng ôh, hli kơ sư 'mêm kơ yŏng âu, areh kơ yŏng to; chu yom kơ yŏng to, pơjăm pơjuă yŏng âu. Na mŭk tơmam kư̆m dang pơm yŏng mơ̆n. Dah iĕm băt 'mêm kơ 'Bok Kei-Dei Yŏng iĕm tơpă lei iĕm ưh kơ 'mêm kơ dôm mŭk tơmam tơ ala teh âu ôh.

²⁵ “Yua kơ thoi noh na Inh wă khan kơ iĕm, 'nĕ tơchĕng kơ tơmam sŏng sa, 'nĕ tơchĕng kơ hơbĕn ao hrŭk. 'Bok Kei-Dei gơh pơjing iĕm arih, Sư kư̆m băt ăn kơ iĕm tơmam sa mơ̆n, Sư kư̆m băt ăn kơ iĕm hơbĕn ao hrŭk mơ̆n.

²⁶ Iĕm lăng lu sem păr, sư ưh kơ đei pơtăm 'ba, ưh kơ đei kĕch 'măn lê̆ tơ kŭ ôh, mă-lei 'Bă bơ̆n mă oei tơ plĕnh ti kư̆m hiĕm 'me sư mơ̆n. Pơma kiơ kơ iĕm, 'Bă bơ̆n tơ plĕnh ti Sư 'mêm kơ iĕm hloh kơ lu sem păr tơpă.

²⁷ Iĕm tơchĕng dêh gah tơdrong arih. Mă iĕm nŏng tơchĕng dang yơ gah tơdrong arih noh ră, kư̆m ưh kơ đei yua tơgŭm iĕm arih đunh 'biơ̆ hơya minh năr ôh.

²⁸ “Bĭ gah hơbĕn ao hrŭk, iĕm mah tơchĕng kơ kiơ? Iĕm lăng lu pơkao 'nhĕt tơ bri brah. Sư ưh kơ bơ̆jang, ưh kơ tanh sĭt hơbĕn ao sư kơdih ôh, mă-lei bơ̆n lăng sư 'lơ̆ng dêh.

²⁹ Inh khan kơ iĕm tơpă, pơtao Sôlômôn sơ̆ sư mơdrŏng tih tơpă, mă-lei hơbĕn ao sư ưh kơ mah 'lơ̆ng dang pơkao 'nhĕt bri brah ôh.

³⁰ Tơdrong lui iĕm rơdu dêh, iĕm kuă kơ kiơ tơchĕng kơ lu pơkao 'nhĕt bri brah: Sư 'bônh kơ hơlŭng, klaih hơlŭng đe soh hŭt lê̆ lăm ŭnh, mă-lei 'Bok Kei-Dei kư̆m ăn kơ sư 'lơ̆ng dang noh, pơma kiơ kơ iĕm kon bơngai kăl hloh kơ sư, 'Bok Kei-Dei gô ăn kơ iĕm hơbĕn ao tơpă.

³¹ Thoi noh na iĕm 'nĕ pă tơchĕng khan: ‘Bơ̆n wă sa kiơ, hrŭk kiơ?’

³² Lu bơngai nai mă ưh kơ lui, lu sư tơchĕng kơ tơdrong noh ling-lang. Mă-lei 'Bă bơ̆n tơ plĕnh ti kư̆m băt boih dôm tơdrong lu iĕm kăl yua, Sư gô tơgŭm iĕm tơpă.

³³ Thoi noh na iĕm athei ăn kơ Sư pơgơ̆r iĕm, hăm adrin pơm 'lơ̆ng thoi Sư wă, noh kăl hloh kơ dôm tơdrong nai; pơm thoi noh na Sư gô ăn kơ iĕm tôm tơmam iĕm kăl yua.

³⁴ Thoi noh na đơ̆ng âu tơ anăp, iĕm 'nĕ pă tơchĕng minh tơdrong kiơ kiơ. Năr dơning măk ai kơ năr dơning, năr âu măk ai kơ năr âu, yua kơ tơdrong kơ'bah bơ̆n rim năr đĕch.