Mathiơ 3 - Sơ̆p Hlabơar Nơ̆r 'Bok Kei-Dei

Yôhan bơtho đe

¹ Kơplah ei sơ̆ đei Yôhan bơngai mă pơm kơ đe 'batem, sư năm bơtho đe tơ char glă lăm dêh Juđê.

² Sư bơtho đe thoi âu: “Iĕm athei tơbral kơdih tơdrong yoch, yua kơ 'Bok Kei-Dei wă pơgơ̆r iĕm boih.”

³ Êsai bơngai pơtruh nơ̆r 'Bok Kei-Dei, sư chih khan lê̆ hơdrol gah Yôhan sơ̆ thoi âu: “Đei minh 'nu bơngai bơtho tơ char glă chơngue ning-mônh khan: ‘Bĕ bơ̆n hơmet trong kơ Kră Yang, păng pơm trong Sư mă tơpăt. Wă khan lu bơ̆n tơbral kơdih tơdrong yoch.’ ”

⁴ Yôhan hrŭk ao tanh păng sŏk aseh lăk-đa păng tơ̆n gơ'năm akar tơ bơnei sư. Tơmam sa sư lep păng đak sut bri đĕch.

⁵ Lu đe năm tơ sư kơplah ei sơ̆ đơ̆ng Pơlei Jêrusalem, đơ̆ng dêh Juđê, đơ̆ng tơring krong Jôrđăn.

⁶ Lu sư roi tơdrong yoch lu sư kơ 'Bok Kei-Dei, na Yôhan pơm kơ lu sư 'batem tơ krong Jôrđăn.

⁷ Yôhan 'bôh lu bơngai Juđê mă khan sư lui kơ 'Bok Kei-Dei kiơ̆ kơ tơdrong Pharisi păng lu mơ'nah dơ̆ng kiơ̆ kơ tơdrong Sađusê, lu sư năm tơ sư wă iŏk 'batem, na Yôhan khan kơ lu sư: “Iĕm âu dang lĕ kơ 'bih. Iĕm băt kơ 'Bok Kei-Dei wă phak iĕm ning-mônh, na iĕm mah năm tơ âu wă iŏk 'batem đĕch khan gơh klaih đơ̆ng tơdrong phak noh hă?

⁸ Iĕm athei tŭk lê̆ đĭ dôm tơdrong kơnê̆, na pơm mă 'lơ̆ng tơpăt wă kơ đe băt kơ iĕm tơbral kơdih tơdrong yoch tơpă boih.

⁹ Iĕm 'nĕ kơ pơhơi khan kuă kơ tơbral kơdih tơdrong yoch, pơm khan sơđơ̆ng kơ Abraham 'bok bơ̆n tơbôl hăm 'Bok Kei-Dei. Inh khan kơ iĕm tơpăt, 'Bok Kei-Dei gơh pơm kơ tơmo âu jing kon sâu Abraham lei-lăi thoi iĕm mơ̆n. 'Bok Kei-Dei sek tơlang kon bơngai, Sư pơlong lăng thoi âu:

¹⁰ Sung Sư, Sư 'măn hiă rim kơ tơnơm 'long boih. Dah 'long ayơ ưh kơ đei plei 'lơ̆ng lei 'Bok Kei-Dei gô kăl tŭk 'long noh klơ̆m tơ ŭnh.

¹¹ Inh pơm kơ iĕm 'batem păng đak, wă kơ đe băt kơ iĕm tơbral kơdih tơdrong yoch boih. Mă-lei đei minh 'nu 'Bok wă truh đơ̆ng rŏng kơ inh, Sư 'Bok tih tơpă. Dah Sư athei inh chĕp ăn pôm chơkhŏ Sư đĕch, inh kư̆m ưh kơ hơnhŏ 'mơ̆i, ưh kơ pơ̆n ngơk lăng Sư ôh. Sư ei gô pơm kơ iĕm 'batem thoi âu: Sư gô ăn kơ iĕm Yang Bơhngol 'Lơ̆ng pơm kơ iĕm tŭk lê̆ dôm tơdrong kơnê̆ kư̆m thoi ŭnh soh lê̆ hla đuih đăm.

¹² 'Bok ei sek tơlang kon bơngai thoi lĕ kơ Sư chĕp minh hlak kơđum wă um tŭk đĭ dôm lu 'ba bo. Na Sư iŏk lu 'ba liĕng wă tah lê̆ lăm kŭ 'ba Sư. Na dôm lu 'ba bo noh Sư wă soh tŭk đĭ tơ ŭnh mă ưh kơ layơ păt.”

Yôhan pơm kơ Yêsu 'batem

¹³ Kơplah noh sơ̆, Yêsu đơ̆ng dêh Galilê năm tơ krong Jôrđăn, Sư apinh Yôhan pơm kơ Sư 'batem.

¹⁴ Mă-lei Yôhan pơjăng kuă kơ pơm kơ Sư 'batem ră, na sư khan kơ Yêsu thoi âu: “Ih trŏ pơm kơ inh 'batem, na Ih khan athei inh pơm kơ Ih liơ trŏ?”

¹⁵ Yêsu khan kơ sư: “Bĕ ih jah pơm kơ Inh, ba pơm kiơ̆ thoi noh, wă kơ ba pơm trŏ thoi 'Bok Kei-Dei wă.” Thoi noh na Yôhan chu kơ nơ̆r Sư.

¹⁶ Hlôi Sư iŏk 'batem boih, lăp Sư iung đơ̆ng đak, na Sư 'bôh hloi plĕnh tơpơih păng 'bôh Yang Bơhngol 'Lơ̆ng thoi sem kơtơp jur oei tơ Sư.

¹⁷ Păng kư̆m đei nơ̆r pơma đơ̆ng plĕnh khan: “Âu boih Kon Inh mă 'mêm kơeng tơpă, Inh lăp đon kơ Sư tôm tơdrong.”