Mathiơ 22 - Sơ̆p Hlabơar Nơ̆r 'Bok Kei-Dei

¹ Yêsu pơma pơtih gia kơ lu sư dơ̆ng:

² “'Bok Kei-Dei pơgơ̆r kon bơngai thoi âu: Minh 'nu 'bok pơtao hơmet tơmam sa pơkong kơ kon sư iŏk akăn.

³ Na sư wơh lu bơngai jang kơ sư năm krao lu bơngai mă sư wơ̆n năm sŏng sa tơ hnam sư, mă-lei lu bơngai mă sư wơ̆n noh ưh kơ wă năm sŏng sa.

⁴ 'Bok pơtao wơh dơ̆ng lu bơngai jang kơ sư nai năm krao păng khan kơ lu bơngai mă sư wơ̆n ei thoi âu: ‘Inh hơmet tơmam sa đang boih, dang ei oei chang gô iĕm; inh đei 'buh sa rơmo bek na dôm tơmam wă sŏng sa hơmet đang boih, apinh iĕm năm sŏng sa bĕ.’

⁵ Mă-lei lu bơngai mă sư wơ̆n ei oei ưh kơ chu kơ năm sŏng sa 'mơ̆i, lu sư khan ưh kơ kăl. Lu sư kơtơ̆ng boih bơngai jang kơ 'bok pơtao năm krao lu sư, mă-lei lu sư mơ'nah năm jang tơ mir, mơ'nah hăt kơ năm mơdro sa.

⁶ Lu mơ'nah dơ̆ng rôp lu bơngai jang kơ 'bok pơtao năm krao lu sư ei, blei hiap păng pơlôch hloi.

⁷ Thoi noh na 'bok pơtao ơh tơpă, sư wơh lu linh sư năm pơlôch đĭ-đăng lu bơngai mă pơlôch lu bơngai jang kơ sư ei păng soh rông chhông hnam kon pơlei pơla lu sư.

⁸ “'Blă kơ noh 'bok pơtao khan dơ̆ng kơ lu bơngai jang kơ sư: ‘Dôm tơmam sa inh hơmet keh tôm ră boih, mă-lei lu bơngai mă inh wơ̆n pơm ưh kơ 'lơ̆ng. Lê̆, ưh kơ trŏ kơ lu sư sŏng sa hơdai păng bơ̆n dơ̆ng.

⁹ Thoi noh boih na dang ei iĕm năm răp rim trong bĕ, kư̆ kơ 'bôh bơngai, krao sư sŏng sa tơ âu.’

¹⁰ Na lu bơngai jang kơ sư năm răp jơ̆p-jang rim kơ trong. Lu sư 'bôh mă bơngai 'lơ̆ng, mă bơngai kơnê̆, kư̆ kơ krao anhăk tơ̆p anih hrăt-hrot 'bĕnh kơ bơngai.

¹¹ “'Bok pơtao mơ̆t chă lăng lu bơngai sŏng sa, sư 'bôh minh 'nu bơngai ưh kơ hrŭk tơplih hơbĕn ao 'nao.

¹² 'Bok pơtao khan kơ bơngai ei: ‘Ơ ma, lơliơ ih mơ̆t tơ lăm anih âu mă ưh kơ hrŭk tơplih hơbĕn ao tơdrong juăt pơkong?’ Mă-lei bơngai ei ưh kơ pơ̆n drơ̆ng sư thoi yơ.

¹³ Na 'bok pơtao athei lu bơngai jang kơ sư chô̆ jơ̆ng ti bơngai noh tơlơ̆ tŭk tơ anih măng mu lê̆ sư nhơ̆m hmoi tơkăp sơnĕnh tơ noh.”

¹⁴ Na Yêsu khan dơ̆ng thoi âu: “Tơdrong 'noh pơtih gia kơ 'Bok Kei-Dei krao lơ bơngai lui kơ Sư mă-lei Sư rơih iŏk lăp tŏ sĕt đĕch.”

Tơdrong ăn jên thuê̆

¹⁵ Yêsu pơma tơdrong 'noh hei đang boih, na lu bơngai Pharisi pơđâu băl, lu sư wă jet pơlong Yêsu pơma hăm trŏ kơ tơdrong juăt dah ưh. Dah ưh kơ trŏ, lu sư wă kêng.

¹⁶ Lu sư wơh buăl lu sư năm hơdai khŭl pơtao Hêrôt năm jet Yêsu thoi âu: “Ơ 'Bok Thây, nhôn băt kơ Ih bơngai tơpăt, Ih ưh kơ hli kơ bu ôh. Ih lăng lu bơngai pơm tih, lu bơngai iĕ lei-lăi ngăl păng bơtho tơdrong 'Bok Kei-Dei tơpăt ling-lang.

¹⁷ Na nhôn wă jet Ih, Ih tơchĕng thoi yơ kiơ̆ kơ tơdrong juăt bơngai Juđê bơ̆n? Bơ̆n hăm gơh ăn jên thuê̆ kơ Sêsar pơtao đe Rôm mă pơgơ̆r bơ̆n dah ưh?”

¹⁸ Yêsu băt kơ lu đe âu wă plơ̆ plĕch kơ Sư, na Sư khan thoi âu: “Ơ lu bơngai 'bơ̆r đak klak ŭnh, yua kơ kiơ iĕm wă jet pơlong Inh?

¹⁹ Iĕm ăn Inh lăng jên iĕm wă ăn thuê̆ noh.” Lu sư ăn kơ Yêsu lăng minh hlak jên, na Yêsu khan kơ lu sư:

²⁰ “Rup bu âu? Anăn bu âu?”

²¹ Lu sư khan: “'Noh rup Sêsar păng anăn Sêsar mơ̆n.” Thoi noh na Yêsu khan: “Jên âu rup Sêsar tơpă na bơ̆n athei thuê̆ kơ sư yua kơ sư pơgơ̆r. Tơmam 'Bok Kei-Dei bơ̆n athei pơyơ̆r kơ 'Bok Kei-Dei yua kơ Sư tơgŭm ăn kơ bơ̆n.”

²² Lu sư mơ̆ng Yêsu tơl trŏ tơpă, na lu sư achăng lê̆ Yêsu 'bơ̆t noh yak năm tơ nai.

Tơdrong kon bơngai iung arih

²³ Lu bơngai Juđê mơ'nah lui kơ 'Bok Kei-Dei kiơ̆ tơdrong Sađusê. Lu sư khan kon bơngai lôch ưh kơ iung arih dơ̆ng ôh. Lăm năr noh mơ̆n lu sư năm pơjah pơjăng păng Yêsu na lu sư jet Yêsu thoi âu:

²⁴ “Ơ 'Bok Thây, tơdrong juăt Môis chih ată kơ bơ̆n sơ̆ thoi âu: ‘Dah 'nhŏng bu lôch, mi sư adro ưh kơ đei kon, oh sư noh athei iŏk mi sư pơm akăn na pơjing kon kơ 'nhŏng sư.’

²⁵ Đei bôl nhôn tơ âu đei minh pôm hnam dơnŏ tơpơh 'nu 'nhŏng oh. 'Nhŏng kơdră sư iŏk akăn. Lăp 'nhŏng lu sư lôch ưh tam mă đei kon, na oh sư mă 'bar iŏk mi sư pơm akăn dơ̆ng.

²⁶ Oh sư mă 'bar lôch kư̆m ưh kơ đei pơjing kon. Oh sư mă pêng iŏk mi sư pơm akăn dơ̆ng, mă-lei ưh kơ đei kon kư̆m lôch. Tơpơh 'nu 'nhŏng oh sư noh kư̆m iŏk minh 'nu akăn na lôch ngăl kư̆m ưh kơ đei kon ngăl mơ̆n.

²⁷ Tơpo hơtuch akăn lu sư noh kư̆m lôch kiơ̆ lu sư mơ̆n.

²⁸ Na Ih khan kon bơngai gô iung arih, na mưh lu sư iung arih đơ̆ng lôch ning-mônh, akăn lu sư noh jing akăn bu kơ lu sư mă tơpă, yua kơ tơpơh 'nu drŏ-nglo iŏk minh 'nu drŏ-kăn?”

²⁹ Yêsu khan kơ lu sư: “Iĕm ưh kơ hlôh tơdrong noh yua kơ iĕm ưh kơ pơwao sơ̆p hla bơar 'Bok Kei-Dei, na iĕm ưh kơ băt Sư gơh pơm tôm tơdrong.

³⁰ Ning-mônh đĭ-đăng kon bơngai gô iung arih đơ̆ng lôch, đe ưh pă đei tơiŏk băl klo kăn dơ̆ng ôh, lu sư thoi lu linh jang 'lơ̆ng tơ plĕnh ti.

³¹ Tơdrong 'Bok Kei-Dei pơma kơ iĕm gah tơdrong kon bơngai iung arih đơ̆ng lôch, iĕm kư̆m đŏk lăng boih mă liơ iĕm ưh kơ hlôh?

³² Sư khan thoi âu: ‘Inh boih Kră Yang wei-lăng Abraham, Kră Yang wei-lăng Isăk, Kră Yang wei-lăng Jakôp.’ ” Yêsu khan dơ̆ng: “Lu bơngai âu lôch đĭ boih kơplah noh sơ̆, mă-lei lu sư gô iung arih tôm kơ lu sư yua kơ Kră Yang wei-lăng gah tơdrong arih, ưh kơ sĭ Sư wei-lăng gah tơdrong lôch ôh.”

³³ Lu kon pơlei pơla kơtơ̆ng Yêsu bơtho thoi noh, na lu sư băt kơ Yêsu bơtho hơgei tơpă.

Tơdrong juăt ayơ kăl hloh?

³⁴ Khŭl Pharisi băt kơ jei Yêsu boih gah tơdrong pơjah hăm khŭl Sađusê. Na khŭl Pharisi akŭm băl.

³⁵ Na đei minh 'nu bơngai khŭl Pharisi, sư pơm thây bơtho tơdrong juăt đe Juđê, sư năm jet pơlong lăng Yêsu thoi âu:

³⁶ “Ơ 'Bok Thây, dôm tơdrong juăt 'Bok Kei-Dei pơkă, tơdrong juăt ayơ kăl hloh?”

³⁷ Yêsu khan kơ sư thoi âu: “ ‘Bơ̆n athei 'mêm kơ 'Bok Kei-Dei Kră Yang bơ̆n hăm đĭ jơhngơ̆m klơm klak bơ̆n păng đĭ dôm tơdrong đon bơ̆n tơchĕng.’

³⁸ 'Noh tơdrong juăt mă mônh kăl hloh kơ dôm tơdrong juăt nai.

³⁹ Tơdrong juăt mă 'bar dơ̆ng kư̆m thoi noh mơ̆n: ‘Bơ̆n athei 'mêm kơ bôl buăl thoi bơ̆n 'mêm akâu kơdih.’

⁴⁰ Bu pơm kiơ̆ 'bar tơdrong juăt âu tơpă, bơngai 'noh sư huay kơ hŭt lê̆ dôm tơdrong juăt Môis păng dôm tơdrong lu bơngai pơtruh nơ̆r 'Bok Kei-Dei chih sơ̆.”

Yêsu jet bơngai Pharisi tơdrong 'Bok Krist

⁴¹ Kơplah khŭl Pharisi oei akŭm băl tơ ei, na Yêsu jet lu sư thoi âu:

⁴² “'Bok Krist mă 'Bok Kei-Dei wơh pơm Pơtao, Sư bơngai thoi yơ? Sư kon sâu bu?” Lu sư khan: “Sư kon sâu pơtao Đawit.”

⁴³ Yêsu khan dơ̆ng kơ lu sư: “Trŏ mơ̆n mă-lei liơ Yang Bơhngol 'Lơ̆ng athei Đawit krao kơ 'Bok Krist Yŏng Kơdră sư na Đawit khan sơ̆ thoi âu:

⁴⁴ ‘Kră Yang 'Bok Kei-Dei khan kơ Yŏng Kơdră inh thoi âu: Ih kư̆ kơ oei gah 'ma kơ Inh pơgơ̆r tơ̆p Inh blah rôp lu bơngai mă ayăt kơ Ih thuơ tơ kơnơl jơ̆ng Ih.’

⁴⁵ Đawit krao kơ 'Bok Krist Yŏng Kơdră sư, na lơliơ dang ei iĕm khan 'Bok Krist kon sâu Đawit đĕch?”

⁴⁶ Yêsu khan thoi noh ưh kơ đei bu gơh tơl Sư păng đơ̆ng năr noh ưh kơ đei bu pơ̆n jet Sư dơ̆ng.