Mathiơ 2 - Sơ̆p Hlabơar Nơ̆r 'Bok Kei-Dei

¹ Mari tơpŭ kơ Yêsu tơ Pơlei Betlehem lăm dêh Juđê, kơplah ei sơ̆ Hêrôt pơm pơtao tơ dêh Juđê. Đơ̆ng rŏng tơpŭ kơ Yêsu ei đei lu 'bok pơjâu hơgei hnhoi sơnglŏng, lu sư hnhoi đơ̆ng gah hơlĕch truh tơ Pơlei Jêrusalem na lu sư jet đe tơ noh khan:

² “Tơ yơ anih mă đe 'nao tơpŭ kơ pơtao Juđê? Nhôn 'bôh sơnglŏng Sư đơ̆ng gah hơlĕch, na nhôn hnhoi sơnglŏng noh truh tơ âu wă năm kơkuh kơ Sư.”

³ Lăp pơtao Hêrôt kơtơ̆ng tơdrong noh sư sơleng kơ đon păng jơhngơ̆m sư hli. Đĭ-đăng bơngai lăm Pơlei Jêrusalem kư̆m hli lei-lăi mơ̆n.

⁴ Pơtao Hêrôt krao akŭm lu 'bok soi tih păng lu 'bok thây bơtho tơdrong juăt đe Juđê na jet lu sư thoi âu: 'Bok Krist mă wă pơm pơtao bơ̆n, sơ̆p hla bơar 'Bok Kei-Dei khan đe wă tơpŭ kơ Sư tơ yơ?

⁵ Lu sư khan: “Tơ Pơlei Betlehem lăm dêh Juđê bơ̆n, yua kơ 'bok khan lê̆ hơdrol sơ̆ chih roi thoi âu:

⁶ ‘Ơ Pơlei Betlehem lăm dêh Juđê! Pơlei iĕm ưh kơ sĭ iĕ hloh kơ pơlei đe ôh, Yua kơ đơ̆ng pơlei iĕm gô đei minh 'nu 'Bok tih tơpă, Sư wă pơgơ̆r lu bơngai Isơrael.’ ”

⁷ Thoi noh boih na pơtao Hêrôt krao lu 'bok pơjâu hơgei hnhoi sơnglŏng akŭm kơdrô̆ lu sư, na Hêrôt jet pơnhên gah sơnglŏng noh hei lĕch layơ.

⁸ Klaih kơ noh Hêrôt wơh lu sư năm tơ Pơlei Betlehem. Sư pơkă kơ lu đe noh thoi âu: “Iĕm năm chă kon nge 'noh tơ̆p 'bôh hŏ, mưh 'bôh boih iĕm brŏk roi kơ inh, wă kơ inh năm kơkuh kơ Sư mơ̆n.”

^9-10 Đang pơtao Hêrôt khan kơ lu sư thoi noh boih, na lu sư năm. Kơplah lu sư oei nơnăm rok trong lu sư 'bôh hloi sơnglŏng ei pơchrang hơdrol hơdrol kơ lu sư. Lu sư 'nă hal dêh. Lu sư hnhoi sơnglŏng ei truh tơ Pơlei Betlehem. Lăp truh tơ kơpal bơbŭng hnam Yêsu, sơnglŏng ei dơ̆ng.

¹¹ Lu sư mơ̆t lăm hnam na 'bôh hloi kon nge 'noh hăm mĕ Sư Mari. Lu sư sơtơ̆p kŭl-tăng kơkuh kơ Yêsu păng iŏk 'bar anăn pơgang 'bâu phu hăm maih đơ̆ng lăm kơdŭng lu sư pơyơ̆r kơ Yêsu.

¹² Lu 'bok pơjâu hnhoi sơnglŏng ei tep kơmăng apo 'bôh 'Bok Kei-Dei khan kơ lu sư khă kuă ăn wih tơ pơtao Hêrôt. Na lu sư iung wih trong nai, wih tơ pơlei lu sư kơdih.

Hnam dơnŏ Yêsu jăk oei tơ dêh Êyiptơ

¹³ Hlôi đe noh wih boih, Yôsep tep kơmăng apo 'bôh linh jang 'lơ̆ng đơ̆ng 'Bok Kei-Dei khan kơ sư thoi âu: “Jah iung, pŭ nge Yêsu hăm anhăk ba mĕ Sư jăk oei tơ dêh Êyiptơ. Iĕm oei hloi tơ noh tơ̆p inh athei iĕm wih tơ âu na iĕm wih, yua kơ dang ei Hêrôt wă chă nge Yêsu wă pơlôch.”

¹⁴ Yôsep iung đơ̆ng tep thar hơmet tơmam hloi anhăk ba nge Yêsu hăm mĕ Sư măng noh hloi na jăk oei tơ dêh Êyiptơ.

¹⁵ Lu sư oei tơ dêh Êyiptơ truh tơ pơtao Hêrôt lôch. Lu sư pơm thoi noh 'blep thoi Kră Yang 'Bok Kei-Dei ăn kơ bơngai pơtruh nơ̆r Sư khan lê̆ hơdrol sơ̆ thoi âu: “Inh krao Kon Inh brŏk đơ̆ng dêh Êyiptơ.”

Pơtao Hêrôt pơlôch lu kon nge

¹⁶ Lăp pơtao Hêrôt băt kơ lu 'bok pơjâu hnhoi sơnglŏng ưh pă wih tơ sư, sư ơh dêh. Na sư athei lu linh sư năm pơlôch đĭ lu kon drŏ-nglo 'nao tơpŭ truh tơ 'bar sơnăm lăm tơring Betlehem. Sư pơlôch lu kon nge 'nao tơpŭ truh tơ 'bar sơnăm noh sư băt đơ̆ng lu bơngai hnhoi sơnglŏng roi kơ sư ki.

¹⁷ Thoi noh boih na 'blep thoi Jêrêmi chih khan sơ̆ thoi âu:

¹⁸ “Đe kơtơ̆ng nơ̆r ôr pơret tơ Pơlei Ramma, 'bơ̆r đe nhơ̆m hmoi ơh tơpă. Yă Rachel hmoi ơh kơ kon sư lôch, sư nhơ̆m hmoi khŏm khŏm đe ưh pă gơh pơlung sư thoi yơ, yua kơ kon sư lôch đĭ.”

Hnam dơnŏ Yêsu đơ̆ng dêh Êyiptơ brŏk oei tơ pơlei sư Nasaret

¹⁹ Đơ̆ng rŏng kơ pơtao Hêrôt lôch, Yôsep apo 'bôh linh jang 'lơ̆ng 'Bok Kei-Dei jur khan kơ sư tơ dêh Êyiptơ:

²⁰ “Iung bĕ, chông ba Yêsu hăm mĕ Sư wih dơ̆ng tơ dêh Isơrael, lu bơngai wă pơlôch Sư sơ̆ lôch đĭ boih.”

²¹ Na Yôsep chông ba Yêsu hăm mĕ Sư brŏk tơ dêh Isơrael.

²² Lăp Yôsep kơtơ̆ng đe khan Kêlôih kon pơtao Hêrôt wă iung pơm pơtao păl 'bă sư oei tơ dêh Juđê dơ̆ng, na Yôsep hli kơ oei tơ dêh noh. Sư đei apo 'bôh linh jang 'lơ̆ng khan kơ sư kuă ăn oei tơ noh, athei năm oei tơ dêh Galilê.

²³ Lu sư brŏk oei hloi tơ Pơlei Nasaret. Sư oei tơ noh 'blep thoi lu bơngai pơtruh nơ̆r 'Bok Kei-Dei khan lê̆ hơdrol sơ̆ thoi âu: “Đe gô krao Sư bơngai Nasaret.”