Mathiơ 11 - Sơ̆p Hlabơar Nơ̆r 'Bok Kei-Dei

¹ Yêsu bơtho khan kơ mơjĭt-'bar 'nu bơngai pơhrăm păng Sư đang boih, na Yêsu năm chă bơtho kon pơlei pơla tơring ei.

Yôhan mă pơm 'batem wơh bơngai pơhrăm păng sư jet Yêsu

² Yôhan mă pơm kơ đe 'batem, đe tah sư lăm hnam phak. Sư kơtơ̆ng ang tơdrong mơsêh mơyang 'Bok Krist pơm, na sư wơh lu bơngai pơhrăm păng sư năm jet Yêsu thoi âu:

³ “Ih hăm trŏ kơ 'Bok Krist mă Yôhan khan gô truh, dah nhôn oei gô bơngai nai dơ̆ng?”

⁴ Yêsu khan kơ lu sư: “Iĕm wih roi kơ Yôhan tơdrong mă iĕm kơtơ̆ng đơ̆ng Inh bơtho hăm iĕm 'bôh noh bĕ.

⁵ Lu măt tol gơh 'bôh hơdah, lu jơ̆ng kue mah gơh yak, lu jĭ chin mah klaih, lu klĭk gơh kơtơ̆ng, lu bơngai lôch mah gơh iung arih, lu bơngai dơnuh hin mah mơ̆ng Inh bơtho tơdrong 'nao 'lơ̆ng.

⁶ Lu bơngai mă lui kơ Inh khŏm khŏm ưh kơ achăng lê̆ Inh, lu sư hiôk dêh.”

⁷ Lăp lu bơngai pơhrăm păng Yôhan wih boih, na Yêsu pơma kơ lu bơngai tơpôl mă oei kiơ̆ ei: “Iĕm năm tơ Yôhan tơ char glă sơ̆ iĕm chă kiơ? Ưh kơ sĭ iĕm năm chă bơngai ngĭl ngŭl tơchĕng đon 'bar pah thoi lĕ hla kial thu wơ̆t lăk ôh.

⁸ Lei iĕm chă kiơ? Dah iĕm năm lăng bơngai hrŭk hơbĕn ao 'lơ̆ng? Tơ̆ng iĕm wă lăng bơngai hrŭk hơbĕn ao 'lơ̆ng, lei sư oei tơ hnam 'bok pơtao.

⁹ Lei iĕm chă kiơ? Iĕm năm chă bơngai pơtruh nơ̆r 'Bok Kei-Dei hăm trŏ? Trŏ boih, iĕm chă bơngai pơtruh nơ̆r 'Bok Kei-Dei. Inh khan kơ iĕm tơpă, Yôhan boih sư tih hloh kơ đĭ-đăng lu bơngai mă pơtruh nơ̆r 'Bok Kei-Dei sơ̆.

¹⁰ Yua kơ Yôhan boih na đe mah chih lăm sơ̆p hla bơar 'Bok Kei-Dei sơ̆ thoi âu: 'Bok Kei-Dei khan: ‘Âu Inh wơh minh 'nu bơngai pơtruh nơ̆r Inh hơdrol, wă kơ sư hơmet trong kơ Ih.’

¹¹ Inh khan kơ iĕm tơpă, Yôhan sư tih hloh kơ đĭ-đăng bơngai mơ̆n, mă-lei bơngai bu iĕ hloh kơ đe lăm chăl 'nao mă 'Bok Kei-Dei pơgơ̆r dang ei, sư kư̆m hlôh wao tơdrong 'Bok Kei-Dei nhên hloh kơ Yôhan dơ̆ng.

¹² Đơ̆ng Yôhan bơtho sơ̆ truh dang ei đei lơ bơngai adrin tơpă wă kơ 'Bok Kei-Dei pơgơ̆r lu sư.

¹³ Đĭ-đăng lu bơngai pơtruh nơ̆r 'Bok Kei-Dei truh tơ Yôhan păng đĭ dôm sơ̆p hla bơar tơdrong juăt 'Bok Kei-Dei, roi lê̆ hơdrol khan 'Bok Kei-Dei wă pơgơ̆r kon bơngai tơpă, na dang ei bơ̆n 'bôh tơpă boih 'Bok Kei-Dei pơgơ̆r kon bơngai.

¹⁴ Sơ̆p hla bơar 'Bok Kei-Dei khan Êli wă jur. Mă tơpă Yôhan noh boih Êli, hli kơ iĕm ưh kơ lui đĕch na khan ưh kơ trŏ kơ Êli.

¹⁵ Na bu đei đon athei mơ̆ng wă kơ kơtơ̆ng nhên.

¹⁶ “Lu bơngai ahrei âu phara dêh, na Inh wă pơtih gia tơdrong sư lơliơ? Lu sư dang lĕ hơ'lơ̆p pơchơt ngôi tơ kơchơ. Lu sư đei 'bar khŭl. Minh khŭl pơma 'bơ̆r re kơ bôl sư khan:

¹⁷ ‘Nhôn hlôm tơgiĕp wă kơ tơdrong chơt, mă-lei iĕm kuă kơ suang pơrŏ. Nhôn hơri tơdrong đe lôch, mă-lei iĕm kuă kơ nhơ̆m hmoi.’

¹⁸ Na tơdrong iĕm kuă kơ nhi Yôhan kư̆m thoi noh mơ̆n. Sơ̆ Yôhan ơ̆t kơ por, ưh kơ et sik, na đe jô̆ kơ sư khan wơnh.

¹⁹ Na gah Inh Kon Bơngai jur tơ teh âu, sŏng sa mơh 'nhot hơdai kon bơngai, na đe jô̆ kơ Inh khan bơngai sa bơlŭk, et dư, tơbôl hăm bơngai iŏk jên thuê̆, lu bơngai yoch mơ̆n. Mă-lei dah bơ̆n 'bôh đe jang 'lơ̆ng, bơ̆n băt kơ đe jang trŏ jang hơgei.”

Yêsu lach kơ kon pơlei pơla Sư pơm lơ tơdrong mơsêh mơyang mă lu sư ưh kơ wă tơbral kơdih tơdrong yoch

²⁰ Đơ̆ng noh Yêsu lach kơ kon pơlei pơla 'bôh Sư pơm lơ tơdrong mơsêh mơyang tơ pơlei lu sư, mă-lei lu sư ưh kơ wă tơbral kơdih tơdrong yoch.

²¹ Na Sư khan: “Ơ Pơlei Chơrasin, iĕm gô đei tơdrong pơmat tơpă ning-mônh. Ơ Pơlei 'Betsaiđa, iĕm kư̆m đei tơdrong pơmat tơpă mơ̆n ning-mônh. Dah Inh pơm lơ tơdrong mơsêh mơyang tơ Pơlei Tirơ hăm Pơlei Siđôn dang Inh pơm tơ pơlei iĕm ki, lei 'bar tŏ pơlei noh tơbral kơdih tơdrong yoch 'bônh đĕch; lei lu sư hrŭk hloi ao 'bi păng iŏk hloi tơnuh ŭnh pik tơ akâu lu sư wă kơ đe băt kơ lu sư sơ'ngon kơ tơdrong yoch sư tơpă. Mă-lei lu iĕm âu phara dêh, iĕm ưh kơ băt tơbral thoi noh.

²² Inh khan kơ iĕm tơpă, truh năr 'Bok Kei-Dei wă sek tơlang ning-mônh, Sư gô phak Pơlei Tirơ păng Pơlei Siđôn hơiơch 'biơ̆ kơ pơlei iĕm, mă khan 'bar tŏ pơlei noh pơlei dêh tơmoi.

²³ Bĭ iĕm, ơ Pơlei Kapernum, iĕm tơchĕng iĕm tih dang yơ, iĕm tih atŏ truh tơ plĕnh ti hă? Mă-lei 'Bok Kei-Dei wă tơhuŏng iĕm truh tơ dơnâu ŭnh sŭng. Dah Inh pơm lơ tơdrong mơsêh mơyang tơ Pơlei Sôđôm sơ̆ dang Inh pơm tơ pơlei iĕm dang ei, lei Pơlei Sôđôm tơbral kơdih tơdrong yoch 'bônh đĕch. Lei 'Bok Kei-Dei huay kơ soh pơlei sư ôh sơ̆, pơlei sư oei truh dang ei đĕch.

²⁴ Inh khan kơ iĕm tơpă, mưh truh năr sek tơlang ning-mônh, Sư gô phak tơring Sôđôm hơiơch 'biơ̆ kơ pơlei iĕm.”

²⁵ Kơplah noh Yêsu krao khan kơ 'Bă Sư khan: “Ơ 'Bă, Ih boih Kră Yang plĕnh teh. Inh bơnê kơ Ih, yua kơ dôm tơdrong Inh bơtho, Ih tơbăt kơ lu bơngai mă băt gơnang kơ Ih thoi lu hơ'lơ̆p băt gơnang kơ mĕ 'bă; păng Ih ưh kơ wă tơhlôh kơ lu bơngai mă gơnang kơ akâu sư kơdih hŏk hơgei.

²⁶ Ơ 'Bă, Ih pơm thoi noh trŏ tơpă, kiơ̆ thoi Ih lăp đon.

²⁷ “'Bă Inh jao ăn kơ Inh tôm tĕch tơdrong. Minh 'nu 'Bă Inh đĕch băt kơ Inh păng minh 'nu Inh đĕch băt kơ Sư. Na tơdrong tơbăt ăn kơ iĕm 'Bă Inh, Sư gô mơ̆ng kơ Inh wă.

²⁸ “Ơ lu bơngai mă oei pŭ trăp, năm tơ Inh bĕ, lê̆ Inh tơgŭm iĕm pŭ hơiơch.

²⁹ Yua kơ Inh bơngai dim, băt 'mêm mơnat, na apinh iĕm pŭ iŏk bĕ, pơhrăm iŏk bĕ tơdrong Inh âu, wă kơ iĕm pơdơh hiôk.

³⁰ Yua kơ Inh, na iĕm rơhơi jơhngơ̆m păng pŭ hơiơch.”