Markôs 5 - Sơ̆p Hlabơar Nơ̆r 'Bok Kei-Dei

¹ Lu sư tŏk hloh pah to đak dơsĭ tơ tơring đe Gerasen.

² Lăp Yêsu jur đơ̆ng thŏng-nan đei minh 'nu bơngai yang mơ̆t pơm kơ sư wơnh lĕch đơ̆ng bơsat năm tơkan tơ Yêsu.

³ Bơngai ei oei tơ bơsat ling-lang. Mă khan đe chô̆ sư păng tơlei glang mam ră sư hrĕch kơtĕch đĭ, kơbĭ bu gơh chô̆ sư.

⁴ Lơ 'măng boih đe chô̆ ră jơ̆ng ti sư păng tơlei glang mam, mă-lei sư hrĕch kơtĕch kơtoch đĭ tơlei glang mam noh. Sư kư̆m pơchah dơlŏng mam đêl đe dơlŏng jơ̆ng sư, kơbĭ bu pơ̆n chô̆ wei sư dơ̆ng.

⁵ Mă kơmăng, mă kơ'năr, sư oei tơ bơsat, phŏ tơ kông, sư ling-lang tơkĕch păng iŏk tơmo tôn akâu sư kơdih.

⁶ Lăp sư tơmang 'bôh Yêsu oei ataih, na sư kơdâu tơkan 'nap hloi 'bơ̆t anăp Yêsu.

^7-8 Yêsu athei yang kơnê̆ lĕch đơ̆ng akâu sư. Na yang kơnê̆ ei pơma 'bơ̆r re khan: “Ơ Yêsu, Kon 'Bok Kei-Dei Kră Yang Tih Hloh, Ih wă pơm kiơ kơ inh? Inh apinh 'Bok Kei-Dei pơm 'long sơlam kơ ba, na Ih 'nĕ kơ pơrăm inh.”

⁹ Na Yêsu jet anăn sư: “Anăn ih bu?” Sư khan: “Anăn inh Tơpôl yua kơ nhôn lơ.”

¹⁰ Sư apinh Yêsu 'bơ'bel khan: “'Nĕ pơpuh nhôn jăk đơ̆ng tơring âu.”

¹¹ Đei minh tơpôl nhŭng chă sa kiơ̆ groi ei.

¹² Na lu yang kơnê̆ apinh Yêsu khan: “Ih ăn kơ nhôn jăk mơ̆t tơ lu nhŭng to.”

¹³ Na Yêsu ăn kơ lu sư. Na lu yang kơnê̆ ei lĕch hloi mơ̆t tơ tơpôl lu nhŭng oei chă sa kiơ̆ ei. Lu nhŭng ei dang 'bar-rơbâu kơdâu jur đơ̆ng kông groi ei huŏng hơtat tơ đak dơsĭ glơ̆k lôch đĭ minh tơpôl nhŭng ei.

¹⁴ Lu bơngai wei nhŭng 'bôh thoi noh na kơdâu chă roi kơ đe jơ̆p-jang lăm pơlei ei. Na lu kon pơlei pơla năm lăng tơdrong noh lơliơ.

¹⁵ Lu sư năm tơ Yêsu na 'bôh bơngai mă đêl yang kơnê̆ mơ̆t ei oei ngôi 'bơ̆t ei. Sư hrŭk hơbĕn ao thoi lĕ bơngai hmă boih, ưh pă wơnh dơ̆ng. Na lu sư khan: “Bơngai 'nâu boih yang kơnê̆ pơm kơ sư wơnh dêh ki.” Na lu sư hli kơ Yêsu.

¹⁶ Lu đe mă đêl 'bôh Yêsu pơklaih bơngai wơnh 'noh păng tơdrong nhŭng 'noh hei, lu sư chă roi kơ đe tơdrong noh dơ̆ng.

¹⁷ Đơ̆ng noh na đe apinh Yêsu athei Sư jăk đơ̆ng tơring đe ei.

¹⁸ Lăp Yêsu tŏk thŏng-nan na bơngai mă 'nao klaih kơ wơnh ei apinh kiơ̆ oei păng Yêsu.

¹⁹ Mă-lei Yêsu ưh kơ ăn, Sư khan kơ bơngai ei khan: “Ih wih brŏk tơ 'nhŏng oh ih păng ih roi kơ lu sư tơdrong tih-tin ih dang yơ păng 'Bok Kei-Dei 'mêm mơnat kơ ih dang yơ, na Sư mah pơklaih ih dang noh.”

²⁰ Na sư wih tơ hnam chă roi kơ đe lăm tơring Đêkapôlis tôm tơdrong Yêsu pơklaih ăn kơ sư na đĭ-đăng bơngai sơleng kơ đon.

Yêsu tơiung kon Jairut lôch păng pơklaih minh 'nu bơngai tuh pham

²¹ Yêsu tŏk thŏng-nan brŏk tơ anih pah âu dơ̆ng, tơ ei đei lơ bơngai akŭm tăp dăr kơ Sư. Yêsu oei tơ jih đak dơsĭ.

²² Tơ ei đei minh 'nu kră wei-lăng hnam akŭm đe Juđê lăm pơlei kiơ̆ ei, sư năm tơ Yêsu. Anăn sư Jairut. Lăp sư truh tơ Yêsu 'bok ei 'nap 'bơ̆t anăp Sư.

²³ Sư apinh lung Yêsu khan: “Kon adruh inh wă jê̆ lôch. Apinh Ih năm chro ti pel akâu sư wă kơ sư klaih, huay kơ lôch.”

²⁴ Na Yêsu năm kiơ̆ sư. Kư̆m đei lơ bơngai yak hơdai Yêsu bĭt hmĕt hmot Sư.

²⁵ Lăm ei đei minh 'nu bơngai drŏ-kăn sư jĭ tuh pham ling-lang đei mơjĭt-'bar sơnăm boih.

²⁶ Đei lơ 'bok pơgang ming ră, sư pơhuach đĭ jên mŭk tơmam sư ră, mă-lei jĭ sư 'nhŏ kơ klaih 'biơ̆, rai đunh rai dêh.

²⁷ Sư kơtơ̆ng ang Yêsu gơh pơklaih, na sư hơdai năm păng đe kiơ̆ đơ̆ng rŏng Yêsu.

²⁸ Na duch ei tơchĕng kơdih khan: “Dah inh pel pôm ao Sư đĕch inh klaih mơ̆n.”

²⁹ Na duch ei năm chur pel pôm ao Sư đĕch, kơtă ei sư huay pă tuh pham dơ̆ng. Na duch ei mơn lăm akâu sư klaih kơ jĭ boih.

³⁰ Thoi noh na Yêsu băt lăm akâu Sư kơdih đei mơsêh Sư lĕch đơ̆ng akâu Sư. Na Sư hue tơ tŏk-bŏk tơpôl lơ păng khan: “Bu pel ao Inh?”

³¹ Na lu bơngai pơhrăm păng Sư khan: “Kơbĭ bu đei pel. Ih lăng lu bơngai tơpôl âu hmĕt hmot Ih, mă Ih khan: ‘Bu pel ao Inh?’ ”

³² Na Sư hue lăng tăp dăr wă kơ băt bơngai ayơ pơm tơdrong 'noh hei.

³³ Na duch mă pel ao Sư hei, akâu sư tơtey hli yua kơ sư băt tơdrong 'noh hei pơm kơ sư klaih boih, na sư năm 'nap tơ Yêsu păng roi đĭ tơdrong 'noh hei kơ Sư.

³⁴ Na Yêsu khan kơ sư: “Ơ duch, kơlih kơ ih lui na ih klaih, na dang ei brŏk kơ ih mă 'lơ̆ng bĕ. Ih klaih đĭ boih, ưh pă đei jĭ dơ̆ng.”

³⁵ Kơplah Yêsu oei pơma, blư 'bôh 'bar pêng 'nu bơngai đơ̆ng hnam 'bok Jairut năm giong khan kơ sư: “Kon adruh ih lôch boih, ih oei pơhrat kiơ kơ 'Bok Thây?”

³⁶ Yêsu kơtơ̆ng đe pơtruh kơ 'bok Jairut thoi noh, Sư pơhơi. Na Sư khan kơ 'bok Jairut bơngai mă wei-lăng hnam akŭm 'Bok Kei-Dei ei khan: “Ih 'nĕ kơ hli, ih kư̆ kơ lui đĕch.”

³⁷ Yêsu ưh kơ ăn đe kiơ̆ Sư, Sư ăn lu bơngai âu đĕch kiơ̆ Sư: Pêtrôs, Yakơ păng Yôhan mă oh Yakơ.

³⁸ Lăp lu sư truh tơ hnam 'bok mă wei hnam akŭm ei, Yêsu 'bôh đe lơ tơpă tơjrông tơjrang mang oei nhơ̆m hmoi.

³⁹ Yêsu mơ̆t tơ lăm hnam ei khan kơ đe: “Iĕm mah nhơ̆m hmoi ơh kơ kiơ mah tơjrông tơjrang mang? Bơngai âu ưh kơ lôch ôh, sư tep đĕch.”

⁴⁰ Na đe ei hiĕk kơ Sư. Sư pơpuh lu bơngai oei lăm ei lĕch đĭ tơ 'ngoaih na anhăk mĕ 'bă adruh mă lôch noh păng pêng 'nu bơngai mă kiơ̆ Sư hei, mơ̆t tơ anih đe tơ'bĭch adruh mă lôch noh.

⁴¹ Yêsu rôp ti sư păng khan kơ sư hăm nơ̆r Juđê: “Talitha kumi,” wă khan: “Ơ mŏ adruh iĕ, Inh râu e, iung bĕ.”

⁴² Na adruh ei iung yak hloi. Adruh ei mơjĭt-'bar sơnăm. Lăp lu sư 'bôh thoi noh, lu sư sơleng kơ đon.

⁴³ Yêsu khă mĕ 'bă adruh ei hơdrol khan: “Biĕm 'nĕ chă roi kơ đe hŏ.” Đơ̆ng noh Yêsu athei mĕ sư sŏ ăn kơ kon adruh sư ei tơmam sŏng sa.