Markôs 2 - Sơ̆p Hlabơar Nơ̆r 'Bok Kei-Dei

¹ Lăp 'bar pêng năr đơ̆ng rŏng dơ̆ng, Yêsu wih tơ Pơlei Kapernum na đe kơtơ̆ng ang Sư oei hnam,

² na mă lơ bơngai năm tơ hnam Sư păng kiơ̆ 'ngoaih 'măng Sư kư̆m ưh kơ đei anih rơwơn. Na Sư bơtho nơ̆r 'Bok Kei-Dei kơ đe ei.

³ Đe tung ba minh 'nu bơngai hơwen hơwo kơpal anhŭn anhăk tơ Yêsu. Đei puăn 'nu bơngai tung sư.

⁴ Lu sư ưh kơ gơh mơ̆t ôh yua kơ đei lơ bơngai dêh lăm hnam ei. Na lu sư tŏk kung tŏk truh tơ bơbŭng hnam ei. Lu sư bŏk bơbŭng hnam ei tơklă Yêsu, tơjur bơngai hơwen ei păng anhŭn 'bơ̆t anăp Yêsu.

⁵ Lăp Yêsu 'bôh lu sư đei đon lui thoi noh, na Sư khan kơ bơngai hơwen ei: “Ơ dăm, tơdrong yoch ih Inh pơklaih đĭ boih.”

⁶ Kư̆m đei lu thây bơtho tơdrong juăt đe Juđê oei lăm ei. Lu sư kơtơ̆ng Yêsu pơma thoi noh na lu sư chă mơmơnh lăm đon khan:

⁷ “Yua kơ kiơ bơngai 'nâu pơma thoi noh? Sư pơma blông kơ 'Bok Kei-Dei. Bu mă gơh pơklaih yoch bơ̆n? Pôm 'Bok Kei-Dei đĕch gơh pơklaih yoch bơ̆n.”

⁸ Yêsu băt hloi kơ lu sư pơma mơmơnh lăm đon lu sư, jô̆ kơ Sư tơdrong 'noh, na Yêsu khan kơ lu sư: “Yua kơ kiơ iĕm pơma mơmơnh lăm đon thoi noh lĕ?

⁹ Inh khan kơ bơngai hơwen hơwo âu, tơdrong yoch sư Inh pơklaih đĭ boih, tơdrong 'noh dah iĕm 'bôh Inh athei sư iung, iŏk anhŭn sư chĕp brŏk, na sư iung brŏk hloi, 'noh iĕm kư̆m băt kơ Inh gơh pơklaih yoch sư mơ̆n. Na iĕm pơma mơmơnh kơ kiơ khan Inh pơma blông?

¹⁰ Na dang ei Inh wă pơklaih jĭ sư wă tơ'bôh ăn kơ iĕm 'bôh Inh, Kon Bơngai, gơh pơklaih tơdrong yoch kon bơngai ala teh âu.” Na Yêsu khan kơ bơngai hơwen hơwo ei thoi âu:

¹¹ “Inh khan kơ ih, jah iung bĕ chĕp anhŭn ih brŏk tơ hnam.”

¹² Sư iung hloi iŏk anhŭn sư lĕch brŏk 'bơ̆t anăp đe tơpôl lơ. Thoi noh na đĭ-đăng lu bơngai oei kiơ̆ ei 'bôh hlĭch tơpă păng ư-ang kơ 'Bok Kei-Dei khan: “Đơ̆ng sơ̆ bơ̆n tam 'bôh ôh tơdrong thoi âu iih?”

Yêsu pơtơm Lêwi kiơ̆ Sư

¹³ Yêsu năm dơ̆ng tơ jih đak dơsĭ. Kư̆m đei lơ bơngai năm tơ Sư, na Sư bơtho đe.

¹⁴ Klaih kơ noh, lăp lu Sư yak ataih 'biơ̆ đơ̆ng anih noh, na lu sư 'bôh hloi Lêwi kon Alphê oei jang 'bơ̆t hnam thuê̆. Na Yêsu pơtơm sư khan: “Bĕ kiơ̆ Inh.” Na Lêwi gruih iung kiơ̆ hloi Yêsu.

¹⁵ Đơ̆ng noh na Yêsu năm sŏng sa tơ hnam Lêwi. Tơ ei kư̆m đei lơ bơngai iŏk jên thuê̆ hăm bơngai pơm yoch kư̆m sŏng sa hơdai Yêsu hăm lu bơngai pơhrăm păng Sư, kơlih kơ lu bơngai iŏk jên thuê̆ păng lu bơngai yoch noh kiơ̆ Yêsu.

¹⁶ Na lu 'bok thây bơtho tơdrong juăt đe Juđê gah khŭl đe Pharisi 'bôh Yêsu sŏng sa hơdai lu đe noh, na lu sư jet lu bơngai pơhrăm păng Yêsu: “Kơlih kơ kiơ Yêsu Sư sŏng sa hơdai lu bơngai iŏk jên thuê̆ hăm lu bơngai pơm yoch?”

¹⁷ Yêsu kơtơ̆ng hloi lu sư pơma thoi noh, na Sư khan kơ lu 'bok thây ei: “Lu bơngai liĕm akâu ưh kơ kăl kơ 'bok pơgang ôh, pôm lu bơngai jĭ jăn đĕch kăl kơ 'bok pơgang. Inh năm tơ âu ưh kơ sĭ chă wơ̆n lu bơngai 'lơ̆ng ôh. Inh năm tơ âu wă wơ̆n chă lu bơngai yoch wă kơ sư tơbral kơdih tơdrong yoch sư.”

Đe apinh Yêsu tơdrong ơ̆t kơ por

¹⁸ Kơplah ei lu bơngai pơhrăm păng Yôhan hăm lu bơngai Pharisi oei ơ̆t kơ sŏng sa. Lu sư pơrơ̆ng ơ̆t kơ sŏng sa yua wă kơkuh kơ 'Bok Kei-Dei. Na đe jet Yêsu thoi âu: “Liơ lu bơngai pơhrăm păng Yôhan hăm lu bơngai Pharisi ơ̆t kơ por, mă lu bơngai pơhrăm păng Ih ưh kơ ơ̆t?”

¹⁹ Na Yêsu pơma pơtih gia kơ lu sư thoi âu: “Kơplah đe pơkong kơ bơngai mă iŏk akăn, lu bôl bơngai mă iŏk akăn noh, lu sư ưh kơ đei bu ơh sơ'ngon ơ̆t kơ sŏng sa ôh.

²⁰ Pôm ning-mônh đĕch lăp đe anhăk bơngai mă iŏk akăn noh đơ̆ng bôl sư, 'bơ̆t ei kơnh trŏ kơ lu bôl sư ơh sơ'ngon ơ̆t kơ sŏng sa.

Yêsu khan Sư bơtho tơdrong 'nao phara kơ tơdrong đe juăt sơ̆.

²¹ “Kơbĭ bu 'maih klĕp che 'nao tam mă tơtrŭt tơ che ao so. Tơ̆ng bu klĕp, ưh kơ jor che 'nao gô hek che ao so să hloh kơ 'noh dơ̆ng.

²² Kư̆m thoi noh mơ̆n kơbĭ bu 'maih tring sik 'nao 'băt kơtang mong tơ kơdŭng akar so. Tơ̆ng bu tring, sik 'nao 'băt kơtang tơ kơdŭng akar so pă jor gô pơchah. Đak sik gô lĕch hiong. Tơ̆ng bu wă tring, sư athei tring mong sik 'nao tơ kơdŭng akar 'nao, yua kơ kơdŭng akar 'nao 'noh kơjăp.”

Yêsu bơtho tơblang tơdrong kơ̆m lăm năr pơdơh Sa'bat

²³ Lăm minh năr pơdơh Sa'bat ei, Yêsu păng lu bơngai pơhrăm păng Sư drong mơ̆t tơ mir na lu bơngai pơhrăm păng Sư broch găr 'ba kăp sa ngôi.

²⁴ Na lu bơngai Pharisi khan kơ Yêsu: “Ih lăng. Kơlih kơ kiơ lu sư pơm ưh kơ trŏ lăm năr pơdơh, năr pơdơh khan jang?”

²⁵ Yêsu khan kơ lu sư: “Iĕm tam biơh đŏk lăng lăm hla bơar tơdrong pơtao Đawit ôh hă? Sơ̆ sư kư̆m pơm ưh kơ trŏ kơ tơdrong juăt mơ̆n, sư păng lu bôl sư pơngot ưh kơ đei tơmam sa.

²⁶ Lu sư mơ̆t lăm hnam akŭm 'Bok Kei-Dei tơm, Abiatha oei pơm 'bok soi tơm sơ̆. Đawit sư ưh kơ pơm 'bok soi ôh, mă-lei sư kư̆m gơh iŏk sa 'bĕng đe pơyơ̆r kơ 'Bok Kei-Dei mơ̆n. 'Bĕng đe pơyơ̆r kơ 'Bok Kei-Dei pôm lu 'bok soi đĕch gơh sa; mă-lei 'bok Đawit sư iŏk asong kơ lu bôl sư sa mơ̆n.”

²⁷ Yêsu khan dơ̆ng kơ lu bơngai Pharisi: “'Bok Kei-Dei pơjing năr pơdơh Sa'bat wă pơyua kon bơngai đei năr pơdơh, ưh kơ sĭ Sư pơjing năr Sa'bat wă kơ kon bơngai iŏk tơdrong gleh ôh.

²⁸ Inh Kon Bơngai, Inh Yŏng tơm kơ năr pơdơh Sa'bat.”