Markôs 10 - Sơ̆p Hlabơar Nơ̆r 'Bok Kei-Dei

¹ Yêsu năm đơ̆ng Pơlei Kapernum ei mơ̆t brih lăm dêh Juđê păng hơloh năm hloi tơ dêh pah to krong Jôrđăn. Tơ ei đei lơ bơngai năm akŭm tơ Sư dơ̆ng, na Sư bơtho đe kư̆m thoi krô hmă.

² Đei bơngai Pharisi năm jet pơlong Sư wă kơ Sư pơma ưh kơ trŏ tơdrong juăt. Lu sư jet thoi âu: “Kiơ̆ tơdrong juăt bơ̆n hăm gơh achăng akăn?”

³ Na Yêsu khan: “Môis pơkă kơ iĕm sơ̆ liơ?”

⁴ “Môis pơkă kơ nhôn sơ̆ athei drŏ-nglo bơ̆n pơm hla bơar mă trŏ na gơh achăng akăn sư.”

⁵ Na Yêsu khan kơ lu sư: “'Noh yua kơ yă 'bok iĕm sơ̆ arăng kơ̆l na Môis pơkă kơ iĕm thoi noh.

⁶ Blŭng-a sơ̆, ‘'Bok Kei-Dei pơjing minh 'nu drŏ-nglo, minh 'nu drŏ-kăn.’

⁷ ‘Yua kơ thoi noh na bơngai drŏ-nglo drŏ-kăn tơklah đơ̆ng mĕ 'bă sư kơdih na oei hơdai.

⁸ Na bre sư jing minh sĕch, minh akar.’ Bre sư ưh pă thoi 'bar 'nu bơngai boih, bre sư thoi minh 'nu bơngai đĕch.

⁹ Yua thoi noh na kon bơngai bơ̆n ưh kơ gơh achăng lê̆ akăn sư ôh, yua kơ 'Bok Kei-Dei pơgơ̆p bre sư jing klo kăn boih.”

¹⁰ Lăp lu sư brŏk tơ hnam lu bơngai pơhrăm păng Sư jet Sư tơdrong 'noh dơ̆ng.

¹¹ Na Yêsu khan kơ lu sư: “Bơngai bu mă achăng lê̆ akăn sư na iŏk akăn plơ̆ng, drŏ-nglo 'noh yoch boih yua kơ sư dang kơđang kơ̆l ako 'brơh kơ akăn sư.

¹² Dah drŏ-kăn achăng lê̆ klo sư, na iŏk klo plơ̆ng, drŏ-kăn 'noh kư̆m yoch mơ̆n yua kơ sư dang kơđang kơ̆l ako 'brơh kơ klo sư.”

Yêsu krao khan kơ lu hơ'lơ̆p

¹³ Đe anhăk ba lu hơ'lơ̆p tơ Yêsu wă kơ Sư pel kơ̆l krao khan kơ 'Bok Kei-Dei apinh Sư wei-lăng lu sư. Mă-lei lu bơngai pơhrăm păng Sư khă kuă ăn năm tơ Sư.

¹⁴ Lăp Yêsu 'bôh lu bơngai pơhrăm păng Sư pơm thoi noh, Sư hil păng khan: “Lê̆ lu hơ'lơ̆p năm tơ Inh, 'nĕ pă khă lu sư, yua kơ bơngai bu lui thoi lu hơ'lơ̆p âu lui, bơngai 'noh 'Bok Kei-Dei pơgơ̆r wei-lăng sư ling-lang.

¹⁵ Inh khan kơ iĕm tơpă, bơngai bu ưh kơ wă lui thoi lu hơ'lơ̆p lui, bơngai 'noh 'Bok Kei-Dei ưh kơ pơgơ̆r sư ôh.”

¹⁶ Yêsu pôk lu hơ'lơ̆p noh, pel kơ̆l, na krao khan kơ 'Bok Kei-Dei wei-lăng lu sư.

Bơngai mơdrŏng wă kơ arih ling-lang

¹⁷ Lăp Yêsu wă yak đơ̆ng ei Sư tơ'bơ̆p minh 'nu bơngai kơdâu tơkan năm tơ Sư, sơtơ̆p kŭl-tăng 'bơ̆t anăp Sư păng jet Sư thoi âu: “Ơ 'Bok Thây, Ih 'lơ̆ng tơpăt; inh pơm thoi yơ wă kơ oei hơdai hăm 'Bok Kei-Dei na arih ling-lang?”

¹⁸ Yêsu khan kơ sư: “Yua kơ kiơ ih khan Inh bơngai 'lơ̆ng tơpăt? Kon bơngai ưh kơ đei bu 'lơ̆ng tơpăt ôh, pôm Kră Yang 'Bok Kei-Dei đĕch 'lơ̆ng tơpăt.

¹⁹ Ih băt boih tơdrong 'Bok Kei-Dei pơkă sơ̆: ‘'Nĕ pơlôch bơngai, 'nĕ pơm pơyô kư̆ kă, 'nĕ chă tơtông tơmam đe, 'nĕ pơma hơlĕnh, 'nĕ pơgâm sa mŭk tơmam đe, bơ̆n athei lui yom kơ mĕ 'bă.’ ”

²⁰ Na 'bok mơdrŏng ei khan: “Ơ 'Bok Thây, dôm tơdrong 'noh inh huay ră mă đơ̆ng inh oei iĕ sơ̆ khơ̆ dang ei.”

²¹ Yêsu lăng 'bok mơdrŏng noh, Sư 'mêm tơpă na Sư khan thoi âu: “Ih răk ưh kơ tôm oei pă minh tơdrong. Ih athei tĕch đĭ mŭk tơmam ih chă asong kơ lu bơngai dơnuh hin na kiơ̆ hloi Inh. Thoi noh na ih gô đei mŭk tơmam tơ kơpal plĕnh ti ning-mônh.”

²² Yêsu pơma thoi noh, na 'bok mơdrŏng ei sơ'nhoi. Sư sơ'ngon dêh kơlih kơ sư đei mŭk tơmam lơ tơpă, na sư brŏk hloi.

²³ Yêsu hue lăng lu bơngai pơhrăm păng Sư na khan: “Lu bơngai mơdrŏng wă mơ̆t tơ dêh char 'Bok Kei-Dei pơgơ̆r anat dêh.”

²⁴ Lu bơngai pơhrăm păng Sư sơleng kơ đon ưh kơ hlôh tơdrong Sư pơma âu. Mă-lei Yêsu khan dơ̆ng kơ lu sư: “Ơ lu kon Inh, anat dêh mơ̆t tơ dêh char 'Bok Kei-Dei.

²⁵ Aseh lăk-đa mơ̆t bơlôh jrŭm 'bônh 'biơ̆ kơ bơngai mơdrŏng wă mơ̆t tơ dêh char 'Bok Kei-Dei.”

²⁶ Lu sư mơ̆ng rai sơleng kơ đon na jet Yêsu: “Lei bu gơh mơ̆t tơ dêh char 'Bok Kei-Dei lĕ?”

²⁷ Yêsu lăng lu sư păng khan: “Kon bơngai ưh kơ gơh mơ̆t kơdih tơ dêh char 'Bok Kei-Dei ôh, dah 'Bok Kei-Dei ưh kơ pơklaih yoch sư. 'Bok Kei-Dei pơklaih yoch sư na sư gơh mơ̆t yua kơ 'Bok Kei-Dei gơh pơm tôm tơdrong.”

²⁸ Na Pêtrôs khan kơ Sư: “Bĭ lu nhôn mă achăng lê̆ tôm tơdrong yua kơ kiơ̆ Ih boih lơliơ?”

²⁹ Yêsu khan: “Inh khan kơ iĕm tơpă, bơngai bu achăng lê̆ hnam sư, 'nhŏng oh sư, mĕ 'bă sư, kon sư, mir 'ba sư, yua kơ sư wă jang tơdrong Inh păng ră roi tơdrong 'nao 'lơ̆ng kơ đe,

³⁰ bơngai 'noh dang ei 'Bok Kei-Dei tơgŭm sư hloh loi kơ sư tam mă lui sơ̆, mă hnam, mă 'nhŏng oh, mă mĕ 'bă, mă kon, mă mir 'ba, sư gô đei lơ hloh kơ sơ̆ tơpă. Sư kư̆m đei tơdrong anat anot yua kơ jang tơdrong Inh kơplah dang ei mơ̆n. Mă-lei ning-mônh sư gô arih ling-lang ưh kơ đei layơ tôch.

³¹ Kư̆m đei lơ bơngai pơm tih dang ei, ning-mônh sư jing iĕ. Kư̆m đei lơ bơngai jang tơdrong iĕ dang ei, ning-mônh gô jang tơdrong tih.”

Yêsu roi dơ̆ng gah tơdrong Sư wă lôch

³² Lu sư oei yak rok trong năm tơ Pơlei Jêrusalem. Yêsu yak hơdrol kơ đe. Lu bơngai pơhrăm păng Sư mah prưn kơ jơhngơ̆m păng lu bơngai nai kư̆m hli mơ̆n. Yêsu anhăk lu mơjĭt-'bar 'nu bơngai pơhrăm păng Sư weh ataih 'biơ̆ kơ đe thoi ki dơ̆ng. Na Sư roi tôm tơdrong pơmat Sư gô tơ'bơ̆p.

³³ Sư khan: “Iĕm mơ̆ng bĕ. Bơ̆n năm tơ Pơlei Jêrusalem. Tơ ei kơnh đe wă rôp Inh Kon Bơngai, jao kơ lu 'bok soi tih păng lu thây bơtho tơdrong juăt đe Juđê. Lu sư gô sek tơlang tơdrong Inh, jao Inh kơ lu bơngai dêh đe pơlôch.

³⁴ Lu dêh đe ei gô hiĕk achơ̆ kơ Inh, kơsoh pơ'brơh kơ Inh đak hai păng teh tach pơjĭ Inh, klaih kơ noh pơlôch hloi. Mă-lei kơtĕch pêng năr đơ̆ng rŏng Inh gô iung arih dơ̆ng.”

Yakơ păng Yôhan 'maih pơm tih ning-mônh

³⁵ Yakơ păng Yôhan, bre kon Sêbêđê, bre sư năm jê̆ 'bơ̆t Yêsu na khan kơ Sư: “Ơ 'Bok Thây, nhi wă kơ Ih ăn kơ nhi tơdrong nhi apinh.”

³⁶ Na Yêsu khan kơ bre sư: “Biĕm wă kơ Inh ăn tơdrong kiơ?”

³⁷ Bre sư khan: “Apinh Ih ăn kơ nhi ngôi minh 'nu gah 'ma, minh 'nu gah 'ngiĕo Ih kơplah Ih pơm Pơtao nhôn.”

³⁸ Na Yêsu khan kơ bre sư: “Liơ biĕm ưh kơ pơwao tơdrong biĕm apinh noh? Biĕm hăm kĕ iŏk tơdrong anat thoi Inh gô iŏk? Biĕm hăm kĕ chu lôch thoi Inh gô chu?”

³⁹ Bre sư khan: “Nhi chu kĕ.” Yêsu khan dơ̆ng kơ bre sư: “Biĕm gô iŏk tơdrong anat thoi Inh wă iŏk. Biĕm gô chu lôch thoi Inh gô chu lôch mơ̆n.”

⁴⁰ Mă-lei tơdrong pơm tih oei gah 'ma gah 'ngiĕo kơ Inh noh, ưh kơ trŏ kơ Inh ăn ôh, tơdrong noh gô mơ̆ng kơ 'Bă Inh đĕch băt.

⁴¹ Na lu mơjĭt 'nu lu bôl sư kơtơ̆ng bre sư pơma thoi noh, lu sư hil kơ bre Yakơ hăm Yôhan.

⁴² Thoi noh na Yêsu krao akŭm pơđĭ lu sư păng khan: “Iĕm băt mơ̆n teh đak đe, lu bơngai mă pơm 'bok pơgơ̆r, sư chă wơh pơgŏ lu bơngai sư wei. Lu pơm 'bok tih chă pơjuă pơđep đe.

⁴³ Mă-lei iĕm 'nĕ kơ rok lu 'bok pơgơ̆r noh hŏ. Bơngai bu 'maih pơm 'bok tih lăm lu iĕm, bơngai 'noh athei pơm thoi lĕ đĭch đam iĕm.

⁴⁴ Dah bơngai bu lăm lu iĕm 'maih pơm yŏng pơgơ̆r lu iĕm, bơngai 'noh athei pơm thoi lĕ đĭch đam đĭ-đăng kơ lu iĕm.

⁴⁵ Kư̆m thoi Inh Kon Bơngai mơ̆n, Inh jur tơ ala teh âu ưh kơ sĭ Inh wă chă pơgŏ pơđep đe awih awăn kơ Inh ôh; Inh wă kơ tơ'ngla Inh kơdih awih awăn kơ đe păng Inh wă kơ tơ'ngla Inh kơdih lôch tang huai iŏk lơ bơngai.”

Yêsu pơklaih măt 'Bartimê

⁴⁶ Lu sư truh tơ Pơlei Jêrikô. Yêsu păng lu bơngai pơhrăm păng Sư yak đơ̆ng pơlei 'noh hơdai hăm đe tơpôl lơ. Tơ anăp lu sư đei minh 'nu bơngai măt tol. Sư arih kơ chă apinh sa tơmam đe. Anăn sư 'Bartimê, kon Timê. Sư oei ngôi 'bơ̆t cheng trong.

⁴⁷ Lăp sư kơtơ̆ng đe khan Yêsu đơ̆ng Pơlei Nasaret wă yak trong sư na sư krao 'bơ̆r re khan: “Ơ Yêsu, ơ 'Bok Krist Kon Sâu pơtao Đawit, apinh Ih mơnat kơ inh 'biơ̆ bĕ.”

⁴⁸ Đei lơ bơngai khă sư 'nĕ pă krao, mă-lei sư rai krao 'bơ̆r re: “Ơ Kon Sâu pơtao Đawit, apinh Ih mơnat kơ inh 'biơ̆ bĕ.”

⁴⁹ Na Yêsu dơ̆ng păng khan: “Krao sư tơ âu.” Đe năm krao bơngai măt tol ei khan: “Ih 'nĕ pă sơ'ngon. Iung bĕ, Yêsu krao ih tơ to.”

⁵⁰ Bơngai tol ei plôh lê̆ ao tơnŏ sư gruih iung năm tơ Yêsu.

⁵¹ Yêsu khan kơ sư: “Ih wă kơ Inh pơm kiơ?” Bơngai măt tol ei khan: “Ơ 'Bok Thây, inh wă kơ Ih pơklaih măt inh gơh 'bôh hơdah.”

⁵² Yêsu khan kơ sư dơ̆ng: “Yak kơ ih bĕ, yua kơ ih lui na măt ih klaih.” 'Bơ̆t ei măt sư 'bôh hơdah na sư kiơ̆ hloi Yêsu.