Lu 1 - Sơ̆p Hlabơar Nơ̆r 'Bok Kei-Dei

Kon pơlei Isơrael blah iŏk dêh char 'nao lăm char Kanaan

¹ Đơ̆ng rŏng kơ Jôsuê lôch, kon pơlei Isơrael krao apinh Kră Yang khan: Bơngai bu lăm lu nhôn athei năm blah păng kon pơlei Kanaan adrol?

² Kră Yang tơl: Lu bơngai Juđa iĕm boih athei năm adrol; to Inh pơjao boih, dêh char lăm ti lu sư.

³ Bơngai Juđa pơma dơnuh hăm bơngai Simêôn, 'nhŏng oh lu sư, sư khan: Bĕ bơ̆n năm hơdai nhôn tơ teh đei hlang lăng trŏ kơ nhôn boih, na lu bơ̆n gô blah kon pơlei Kanaan; đơ̆ng noh nhôn gô năm hơdai lu 'nhŏng oh truh tơ dêh char mă đei hlang lăng boih trŏ kơ 'nhŏng oh. Bơngai Simêôn năm hơdai hăm lu sư.

⁴ Thoi noh lu bơngai Juđa năm, Kră Yang jao kon pơlei Kanaan păng kon pơlei Phêrêsit lăm ti lu sư; tơ Bêsek sư blah pơlôch mơjĭt-rơbâu 'nu bơngai.

⁵ Tơ Bêsek kư̆m đei tơ'bơ̆p Ađôni Bêsek, na blah lu sư, păng kon pơlei Kanaan păng kon pơlei Phêrsit.

⁶ Ađôni Bêsek kơdâu ôn mă-lei lu sư druh 'moi đei rôp sư chơ̆ng lê̆ hơnglâu yŏng ti păng hơnglâu yŏng jơ̆ng sư.

⁷ Kơplah noh Ađôni Bêsek khan: Sơ̆ đei tơpơh-jĭt 'nu pơtao đe chơ̆ng hơnglâu yŏng ti păng hơnglâu Yŏng jơ̆ng boih, lu sư chă dônh sa tơmam sa huŏng ala kơ 'bang inh. Tơdrong mă đêl inh pơm Kră Yang 'Bok Kei-Dei pơm tơwih kơ inh. Lu sư chông ba sư truh tơ pơlei Jêrusalem păng sư lôch tơ noh.

⁸ Bơngai Juđa blah iŏk pơlei Jêrusalem; lu sư yua đao pơlôch kon pơlei păng klơ̆m ŭnh soh pơlei.

⁹ Đơ̆ng noh lu bơngai Juđa jur năm blah kon pơlei Kanaan mă oei tơ kơpal groi kông, tơ gah gơal păng tơ anih dơhnă;

¹⁰ Đơ̆ng noh lu sư blah kon pơlei Kanaan oei tơ Hêbrôna păng blah Sêsai, Ahiman, hăm Tanmai.

¹¹ Đơ̆ng noh bơngai Juđa năm blah kon pơlei oei tơ pơlei Đêbir.b

¹² Kalep khan: Bu năm blah iŏk đei Kirat Sêpher, na gô ăn sư oei kơ kon adruh inh Aksa.

¹³ Kơplah noh, Ôtniêl kon tơdăm Kêna, oh Kalep blah iŏk pơlei noh na Kalep iŏk kon adruh sư anăn Aksa pơm akăn Ôtniêl.

¹⁴ Wă sư brŏk tơ Ôtniêl boih sư athei klo sư apinh đơ̆ng 'bă sư minh hlak chŭn đei tu đak. Adruh ei 'nao jur đơ̆ng aseh na Kalep jet: Kon wă kơ kiơ?

¹⁵ Kon sư tơl: Apinh ih ăn kơ inh tơdrong pŭn hiôk. Yua kơ 'Bă ăn boih teh gah gơal, ưh kơ đei đak, apinh ih kư̆m ăn dơ̆ng kơ inh teh đei tu đak. Na Kalep ăn kơ kon sư teh đei 'bar 'bôt tu đak tơ gah kơpơ̆ng păng tơ gah ala.

¹⁶ Bơngai Kênit 'noh kon sâu tơnei 'bok Môis đơ̆ng pơlei 'Long gol năm tŏk hăm kon sâu Juđa, truh tơ anih glă char Juđa, tơ gah gơal Arat păng pơm anih oei tŏk-bŏk kon pơlei pơla.

¹⁷ Kơplah ei, lu bơngai Juđa năm hơdai hăm 'nhŏng oh sư kơdih, bơngai Simêôn, mă blah kon pơlei Kanaan oei tơ pơlei Sêphat, pơrăm đĭ pơlei ei; đơ̆ng noh đe krao anăn pơlei noh Horma.

¹⁸ Bơngai Juđa kư̆m blah iŏk pơlei Gasa hăm anih teh mă sư pơgơ̆r pơlei Askalon hăm anih teh mă sư pơgơ̆r păng pơlei Ekrôn hăm anih teh mă sư pơgơ̆r.

¹⁹ Kră Yang oei hơdai hăm bơngai Juđê na bơngai Juđê gơh iŏk oei tơ lu pơlei kơpal groi kông, mă-lei lu kon pơlei oei tơ lăm thŭng lu sư ưh kơ gơh pơpuh ôh, yua kơ lu đe ei đei gre aseh pơm păng bơsei.

²⁰ Kiơ̆ kơ Môis athei, lu sư jao pơlei Hêbrôn ăn kơ Kalep. Kalep pơpuh tơweh pêng 'nu kon drŏ-nglo Anak lĕch đơ̆ng pơlei ei.

²¹ Mă-lei kon sâu Bênjamin ưh kơ gơh puh lê̆ kon pơlei Jêbus đơ̆ng pơlei Jêrusalem, na kon pơlei Jêbus oei oei hơdai kon sâu Bênjamin dĭng truh tơ dang ei.

²² Na adrĕch adrung Jôsep kư̆m tŏk blah pơlei Bethel păng Kră Yang oei hơdai lu sư.

²³ Lu sư wơh bơngai năm chop lăng adrol kơ năm blah tơ Bethel;c anăn pơlei 'nâu adrol sơ̆ đe krao Lus.

²⁴ Lu bơngai năm lăng adrol 'bôh minh 'nu lĕch đơ̆ng pơlei, na lu sư khan kơ bơngai ei: Apinh ih tơ'bôh ăn kơ nhôn trong ayơ gơh mơ̆t tơ pơlei na lu nhôn gô mơnat kơ ih.

²⁵ Na bơngai ei tơ'bôh ăn kơ lu sư trong gơh mơ̆t tơ lăm pơlei. Lu sư iŏk đao hơlă pơlôch lu bơngai lăm pơlei 'nei; mă-lei lu sư lê̆ bơngai noh păng đĭ hnam dơnŏ sư oei arih

²⁶ Thoi noh lu bơngai noh năm mơ̆t tơ dêh char Hêtit, pơm pơlei oei tơ noh na sư anăn pơlei ei Lus, đe oei krao anăn ei truh tơ dang ei.

²⁷ Bơngai Manase ưh kơ gơh puh lê̆ lu kon pơlei oei tơ Bêt Sêan păng pơlei oei jum dăr ưh kơ tam, kon pơlei oei tơ Tanak păng lu pơlei jum dăr kơ sư kư̆m ưh kơ tam, lu kon pơlei oei tơ Đôr păng pơlei oei jum dăr kơ sư, kon pơlei oei tơ Iblêam păng pơlei jum dăr kơ sư, pơlei oei tơ Mêgiđô păng rim pơlei mă sư pơgơ̆r, na sư kư̆m ưh kơ gơh pơpuh lê̆ tơ nai, yua kơ đei lu kon pơlei Kanaan oei tơ lăm lu pơlei ei.

²⁸ Dĭng khŭl bơngai Isơrael pran boih, na rôp kon pơlei Kanaan pơgŏ lu sư jang pơmat-tat, mă-lei ưh kơ đei layơ gơh pơpuh đĭ lu sư năm tơ nai.

²⁹ Bơngai Êphraim kư̆m ưh kơ gơh pơpuh tơweh kon pơlei Kanaan oei tơ Geser thoi noh lu kon pơlei Kanaan oei oei hơdai hăm bơngai Êphraim.

³⁰ Bơngai Sebulun kư̆m ưh kơ gơh pơpuh tơweh kon pơlei oei tơ Kitrôn, dah kon pơlei oei tơ Nahalô, bơngai Kanaan oei hơdai hăm bơngai Sabulun, mă-lei pơgŏ athei lu sư jang pơmat-tat.

³¹ Bơngai Aser kư̆m ưh kơ gơh pơpuh tơweh kon pơlei oei tơ Akô, dah kon pơlei oei tơ Siđôn, kon pơlei oei tơ Ahlap, kon pơlei oei tơ Aksip, kon pơlei oei tơ Helba, kon pơlei oei tơ Aphik dah kon pơlei oei tơ Rêhôp.

³² Thoi noh bơngai Aser pơjing tơdrong jang sa lu sư tŏk-bŏk lăm kon pơlei Kanaan mă oei tơ noh yua kơ bơngai Aser ưh kơ gơh pơpuh tơweh lu sư năm tơ nai.

³³ Bơngai Neptali ưh kơ gơh pơpuh tơweh kon pơlei oei tơ Bêt Sêmes păng kon pơlei oei tơ Bêt Hanat; na lu sư oei tŏk-bŏk lăm kon pơlei Kanaan mă-lei kon pơlei Bêt Sêmê păng kon pơlei Bêt Anat lu bơngai Neptali pơgŏ athei lu sư jang pơmat-tat.

³⁴ Kon pơlei Amôrit pơpôi pơpuh lu bơngai Đan oei tơ kơpal groi kông, ưh kơ ăn lu sư jur oei tơ thŭng.

³⁵ Kon pơlei Amôrit kư̆m oei tơ kông Hares, Aijalôn păng Salbim; mă-lei adrĕch adrung Jôsep sư pran na lu sư athei bơngai Amôrit jang kơ lu sư gleh pơmat.

³⁶ Anih teh kon pơlei Amôrit iŏk đơ̆ng kuĕl Akrabim, păng đơ̆ng Sêla truh tơ ti ti.