Kôlôsê 4 - Sơ̆p Hlabơar Nơ̆r 'Bok Kei-Dei

¹ Ơ lu yŏng tơ'ngla lu bơngai đĭch, iĕm athei pơm mă 'lơ̆ng kơ lu đĭch iĕm, yua kơ iĕm kư̆m đei minh 'nu Yŏng tih hloh kơ iĕm, Sư oei tơ plĕnh ti.

Tơdrong krao khan

² Iĕm athei adrin gah tơdrong krao khan. Kơplah iĕm oei krao khan, iĕm athei tơchĕng kơ tơdrong krao khan đĕch, 'nĕ kơ tơchĕng tơdrong nai. Păng ling-lang athei bơnê kơ 'Bok Kei-Dei.

³ Apinh iĕm krao khan kơ 'Bok Kei-Dei tơgŭm nhôn 'biơ̆ hŏ wă kơ Sư ăn kơ nhôn gơh bơtho nơ̆r Sư kơ lơ bơngai, tơdrong Kon Sư Yêsu Krist mă tam mă tơbăt kơ đe đơ̆ng sơ̆. Yua kơ inh bơtho tơdrong 'noh na đe oei phak inh dang ei.

⁴ Thoi noh na inh apinh iĕm krao khan kơ 'Bok Kei-Dei tơgŭm inh hơgei kơ bơtho tơdrong Sư wă kơ đe hlôh nhên. Sư wă kơ inh bơtho thoi noh.

⁵ Bơ̆n athei adrin pơm mă 'lơ̆ng pơma mă trŏ kơ lu bơngai tam mă lui, wă kơ lu sư mơ̆ng trŏ na lui kơ 'Bok Kei-Dei.

⁶ Bơ̆n athei pơma pơhiôk lu sư ling-lang, wă kơ bơ̆n gơh drơ̆ng lu sư mă trŏ.

Pôl roi tơdrong lu buăl sư wă truh tơ Pơlei Kôlôssê

⁷ Tisĭk truh tơ iĕm, sư gô roi ăn kơ iĕm tôm tơdrong inh dang ei thoi yơ. Sư 'nhŏng oh lu bơ̆n bơngai lui, bơ̆n 'mêm kơ sư tơpă, yua kơ sư adrin jang tơdrong Yŏng bơ̆n Yêsu Krist thoi inh.

⁸ Inh wơh sư năm tơ iĕm wă kơ iĕm băt kơ nhôn oei 'lơ̆ng akâu, hăm wă kơ sư pơma pơlung iĕm, wă kơ iĕm hiôk kơ jơhngơ̆m 'biơ̆.

⁹ Inh kư̆m wơh Ônêsim năm hơdai hăm sư mơ̆n. Ônêsim sư kư̆m 'nhŏng oh lu bơ̆n bơngai lui; sư bơngai lui kơjăp, bơ̆n 'mêm kơ sư mơ̆n; sư bơngai pơlei iĕm, iĕm pôm pơlei. Bre sư gô roi kơ iĕm tơdrong nhôn tơ âu thoi yơ.

¹⁰ Aritak, sư oei lăm hnam phak hơdai hăm inh, sư kư̆m hơdai jet gia iĕm. Markôs, oh 'Barna'ba pôm yă 'bok, sư kư̆m hơdai jet gia iĕm mơ̆n. Dah sư đei năm tơ iĕm, iĕm sơng iŏk sư hŏ, kiơ̆ thoi inh khan kơ iĕm boih.

¹¹ Jôsuê mă đe anăn Jutu, sư kư̆m jet gia iĕm. Dôm lu bơngai jang hơdai hăm inh bơtho tơdrong 'Bok Kei-Dei lăp pêng 'nu lu đe âu đĕch bơngai Juđê. Lu sư tơgŭm inh dêh na inh hiôk lăm jơhngơ̆m tơpă.

¹² Êpapra sư bơngai pôm pơlei hăm iĕm, sư kư̆m jang tơdrong Yêsu Krist na sư wă jet gia iĕm tơ âu. Sư krao khan apinh 'Bok Kei-Dei tơgŭm iĕm ling-lang, wă kơ iĕm lui kơjăp păng hlôh băt tôm tơdrong 'Bok Kei-Dei na pơm kiơ̆ hloi.

¹³ Inh roi kơ iĕm tơpăt, sư bơngai jang dêh, sư jang wă tơgŭm iĕm, tơgŭm lu bơngai lui tơ pơlei Laodisê hăm Pơlei Hêrơ.

¹⁴ Luka sư pơm thây pơgang, sư kư̆m jang tơdrong Yêsu Krist mơ̆n, bơ̆n 'mêm kơ sư tơpă, sư kư̆m jet gia iĕm mơ̆n. Đêmas kư̆m hơdai jet gia iĕm mơ̆n.

¹⁵ Iĕm pơtruh kơ lu 'nhŏng oh bơ̆n tơ Pơlei Laodisê hŏ, inh kư̆m đei nơ̆r jet gia lu sư mơ̆n. Păng pơtruh kơ Nimpha hăm lu bơngai mă juăt kơ akŭm tơ hnam sư.

¹⁶ Iĕm đŏk lăng kơthơ âu, tôm kơ lu buăl iĕm kơtơ̆ng boih, na iĕm chĕp kơthơ noh pơtruh kơ lu bơngai lui tơ Pơlei Laodisê dơ̆ng hŏ, wă kơ lu sư hơdai đŏk lăng. Na kơthơ đơ̆ng inh chih kơ Pơlei Laodisê, iĕm kư̆m chĕp pơtruh kơ pơlei iĕm đŏk lăng.

¹⁷ Păng iĕm khan kơ Achĭp athei sư jang mă keh tôm tơdrong jang sư, yua kơ Kră Yang Yêsu Krist pơjao kơ sư jang tơdrong 'noh boih.

¹⁸ Kơthơ âu nơ̆r inh Pôl pơma, buăl inh chih; lăp wă jê̆ tôch na ti inh chih kơdih. Iĕm 'nĕ hiơt kơ inh, đe oei chô̆ hăm tơlei glang mam ling-lang. Inh apinh 'Bok Kei-Dei wei-lăng iĕm tôm tơdrong.