Jôsuê 4 - Sơ̆p Hlabơar Nơ̆r 'Bok Kei-Dei

Mơjĭt-'bar tŏ tơmo

¹ Kơplah đĭ-đăng kon pơlei tŏk hlôi kơ đak Krong Jôrđăn boih, Kră Yang khan kơ Jôsuê:

² Rơih iŏk bĕ mơjĭt-'bar 'nu đơ̆ng lăm kon pơlei, rim adrĕch minh 'nu.

³ Na khan kơ lu sư: Athei dônh iŏk mơjĭt-'bar tŏ tơmo đơ̆ng lăm đak Krong Jôrđăn, 'bơ̆t ala jơ̆ng lu 'bok soi oei dơ̆ng, na chĕp ba, dan 'bơ̆t anih lu iĕm wă 'bĭch pơdơh măng kơnh.

⁴ Thoi noh Jôsuê krao mơjĭt-'bar 'nu, mă sư đei rơih, lăm kon pơlei Isơrael, rim adrĕch minh 'nu.

⁵ Na pơkă khan: Năm bĕ adrol kơ Hom Kră Yang 'Bok Kei-Dei lu iĕm tŏk-bŏk đak Krong Jôrđăn, na rim 'nu, kiơ̆ kơ adrĕch Isơrael, athei iŏk tôi ba minh pôm tơmo kơpal hơngiĕng.

⁶ Tơdrong noh wă pơm tơdra tŏk-bŏk lu iĕm. Ning-mônh, tơdah lu kon sâu iĕm đei jet: Lu tơmo âu wă khan kiơ?

⁷ Lei lu iĕm tơl: Noh wă khan đak Krong Jôrđăn tơklah kơplah Hom Pơgơ̆p Kră Yang năm rok đak krong, na đak krong khơ̆t kơtĕch tŏk-bŏk, tơmo âu wă pơm kơ kon pơlei Isơrael 'blŏk hơdơ̆r ling-lang.

⁸ Thoi noh na kon pơlei Isơrael pơm kiơ̆ thoi Jôsuê pơkă, dônh iŏk mơjĭt-'bar tŏ tơmo, tŏk-bŏk đak Krong Jôrđăn, kiơ̆ kơ adrĕch Isơrael, chĕp ba tơmo noh dan tơ anih ayơ mă lu sư wă pơdơh tep kơmăng; kiơ̆ thoi Kră Yang đei pơkă kơ Jôsuê.

⁹ Jôsuê kư̆m akŭm pơdơ̆ng mơjĭt-'bar tŏ tơmo iŏk đơ̆ng lăm tŏk-bŏk đak Krong Jôrđăn, 'bơ̆t anih jơ̆ng, lu 'bok soi tung Hom Pơgơ̆p oei dơ̆ng, lu tơmo noh oei đei truh tơ dang ei.

¹⁰ Lu 'bok soi tung Hom Pơgơ̆p dơ̆ng tŏk-bŏk đak Krong Jôrđăn dĭng truh keh tôm tơdrong mă Kră Yang đei athei Jôsuê khan ăn kơ kon pơlei, kiơ̆ thoi Môis đei pơkă kơ Jôsuê, kon pơlei yak hăt hot hlôi kơ đak krong.

¹¹ Lăp đĭ-đăng kon pơlei tŏk hlôi kơ đak krong boih, na Hom Pơgơ̆p Kră Yang păng lu 'bok soi, kư̆m năm yak tŏk rok 'bơ̆t anăp kon pơlei.

¹² Kon sâu Rubên, kon sâu Gat păng minh puăt kon sâu Manase chĕp khêl đao yak adrol kơ kon pơlei Isơrael trŏ thoi Môis đei khan tơbăt kơ lu sư,

¹³ Đei dang puăn-jĭt rơbâu 'nu bơngai hơmet năm tơblah, dơ̆ng 'bơ̆t anăp Kră Yang truh tơ anih glă Jêrikô, wă blah lu bơngai ayăt.

¹⁴ Năr noh Kră Yang ăn kơ Jôsuê jing đe pơyom 'bơ̆t anăp đĭ-đăng bơngai Isơrael păng đe hli yom đĭ chăl sư oei arih, thoi đe chu yom kơ Môis mơ̆n.

¹⁵ Kơplah noh Kră Yang khan dơ̆ng kơ Jôsuê:

¹⁶ Khan bĕ kơ lu 'bok soi, tung Hom tŏk đơ̆ng đak Krong Jôrđăn.

¹⁷ Thoi noh Jôsuê khan kơ lu 'bok soi: Tŏk bĕ đơ̆ng lăm Krong Jôrđăn.

¹⁸ Lu 'bok soi tung Hom Pơgơ̆p Kră Yang tŏk hlôi kơ đak krong jơ̆ng lu sư hiŏng 'nao wă juă tơ kông anih hrĕng, na đak krong Jôrđăn 'blip tơ'bưh dang đêl, ro 'bĕnh thoi so.

¹⁹ Năr mơjĭt khei mônh, kon pơlei tŏk hlôi kơ đak Krong Jôrđăn, pơm anih tơ Gilgal, gah hơlĕch kơ pơlei Jêrikô,

²⁰ Jôsuê pơdơ̆ng tơ Gilgal mơjĭt-'bar tŏ tơmo, mă đêl kon pơlei đei iŏk đơ̆ng lăm đak Krong Jôrđăn.

²¹ Sư khan kơ kon pơlei Isơrael: Ning-mônh, lu kon sâu lu iĕm jet 'bă lu sư: Lu tơmo âu wă khan kiơ?

²² Lu iĕm gô khan kơ lu kon sâu: “Lu bơngai Isơrael tŏk hlôi kơ đak Krong Jôrđăn rok teh hrĕng.

²³ Yua kơ Kră Yang 'Bok Kei-Dei lu iĕm pơm ăn kơ đak Krong Jôrđăn hrơ̆ hrĕng 'bơ̆t anăp lu sư, dĭng mă lu sư tŏk hlôi, kiơ̆ thoi Kră Yang 'Bok Kei-Dei lu iĕm kư̆m đei pơm kơ đak Dơsĭ 'Brê, hrơ̆ hrĕng 'bơ̆t lu bơ̆n, dĭng mă lu bơ̆n hlôi 'mơ̆i.”

²⁴ Kră Yang pơm thoi noh wă kơ đĭ-đăng adrĕch adrung lăm ala teh, băt kơ Kră Yang mơsêh pran kơtang, wă kơ rim 'nu lu iĕm chu kiơ̆ Kră Yang 'Bok Kei-Dei lu iĕm ling-lang.