Jôsuê 3 - Sơ̆p Hlabơar Nơ̆r 'Bok Kei-Dei

Tŏk hlôi kơ Krong Jôrđăn

¹ 'Brưch pơgê oei hrôih, Jôsuê drôih chông ba kon pơlei Isơrael, đơ̆ng Sitim, lu sư năm truh tơ jih đak Krong Jôrđăn, 'bĭch gô tơ noh adrol kơ tŏk găn đak Krong.

² Đơ̆ng rŏng kơ lăm pêng năr, lu bơngai wei-lăng năm jơ̆p kơ rim anih.

³ Pơkă kơ kon pơlei: Tơdah lu iĕm 'bôh lu 'bok soi, adrĕch Lêwi tung Hom tơdrong pơgơ̆p Kră Yang 'Bok Kei-Dei lu iĕm, iĕm athei iung weh đơ̆ng anih iĕm oei kiơ̆ đơ̆ng rŏng.

⁴ Mă-lei yak ataih băl sơlam lu iĕm hăm Hom tơdrong pơgơ̆p Kră Yang noh dang 'bar-rơbâu hơgăt; 'nĕ kơ yak jê̆, wă kơ lu iĕm băt kơ trong yak; yua kơ lu iĕm ưh tam lah yak trong noh.

⁵ Jôsuê kư̆m khan kơ kon pơlei: Lu iĕm athei wei akâu mă 'lơ̆ng rơgoh yua kơ dơning Kră Yang gô pơm tơdrong hlĭch chrơp, tŏk-bŏk lu iĕm,

⁶ Jôsuê khan lu 'bok soi: Lu iĕm athei tung Hom Pơgơ̆p Kră Yang năm adrol kơ lu kon pơlei. Lei na lu 'bok soi tung hom tơdrong pơgơ̆p Kră Yang yak adrol kơ kon pơlei.

⁷ Kră Yang khan kơ Jôsuê: Dang ei Inh gô pôk pơyom ih 'bơ̆t anăp lu bơngai Isơrael, wă kơ lu sư băt Inh Kră Yang oei hơdai ih, thoi Inh đei oei hơdai hăm Môis sơ̆.

⁸ Ih athei khan kơ lu 'bok soi tung Hom Pơgơ̆p: Lăp lu iĕm truh 'bơ̆t jih đak Krong Jôrđăn lu iĕm jur dơ̆ng tŏk-bŏk đak krong.

⁹ Na Jôsuê khan kơ lu kon pơlei Isơrael. “Năm mă jê̆ tơ âu, wă mơ̆ng nơ̆r Kră Yang lu iĕm.

¹⁰ Jôsuê khan dơ̆ng: Yua kơ đơ̆ng tơdrong âu, na lu iĕm gô băt Kră Yang 'Bok Kei-Dei arih ling-lang Sư oei hơdai hăm lu iĕm păng Sư gô puh tơweh lê̆ lu bơngai Kanaan, bơngai Hêtit, bơngai Hêwit, bơngai Phêrisit, bơngai Girgasit, bơngai Amôrit păng bơngai Jêbus.

¹¹ To Hom Pơgơ̆p Kră Yang kơ đĭ-đăng kon bơngai lăm kơpal teh gô năm adrol kơ lu iĕm jur lăm đak Krong Jôrđăn.

¹² Thoi noh, rơih iŏk bĕ đơ̆ng lăm mơjĭt-'bar adrĕch bơngai Isơrael, rim adrĕch iŏk minh 'nu.

¹³ Păng mưh lu 'bok soi tung Hom tơdrong pơgơ̆p Kră Yang, Sư Kră Yang pơgơ̆r plĕnh teh, lăp lu sư 'nao jur tong jơ̆ng tơ lăm đak Krong Jôrđăn, đak kơtĕch tơklah păng akŭm jing minh 'bôt.”

¹⁴ Lăp kon pơlei yuih bơsŭn lu sư wă yak tŏk găn đak Krong Jôrđăn, lu 'bok soi tung Hom Pơgơ̆p Kră Yang năm adrol kơ kon pơlei.

¹⁵ Kơplah ei trŏ bơyan kĕch 'ba, đak Krong Jôrđăn tih tŏk 'bĕnh lah lai bơnơ̆. Kơplah lu bơngai tung Hom tơdrong pơgơ̆p Kră Yang, păng 'nao wă chro jơ̆ng 'bơm đak hơiuh tŏ sĕt.

¹⁶ Na đak đơ̆ng tu khơ̆t kơtĕch hloi, đak pơpôi minh 'bôt 'bĕnh tŏk truh tơ pơlei Ađam, pơlei noh jê̆ pơlei Sarêthan; na bơbah đak ro truh tơ đak dơsĭ Araba, ‘wă khan Dơsĭ 'Boh,’ hrơ̆ hrĕng, na lu kon pơlei jur yak tŏk rok tơklă pơlei Jêrikô,

¹⁷ lu 'bok soi tung Hom Pơgơ̆p Kră Yang lu sư đơ̆ng kơjăp 'bơ̆t trong teh hrĕng lăm đak Krong Jôrđăn, kơplah lu kon pơlei Isơrael kư̆m yak năm rok teh hrĕng, gô dĭng truh đĭ kon pơlei yak hlôi boih kơ đak Krong Jôrđăn.