Jôel 3 - Sơ̆p Hlabơar Nơ̆r 'Bok Kei-Dei

Tơdrong sek tơlang kơ lu dêh char

¹ 'Nâu, lăm chăl noh, lăp năr noh 'bơ̆t năr Inh gô ăn dơ̆ng tơdrong pŭn hiôk kơ lu bơngai Juđa păng pơlei Jêrusalem,

² Inh gô akŭm đĭ-đăng lu bơngai đơ̆ng jơ̆p kơ dêh char păng ba lu sư năm jur tơ lăm thŭng Jêhôsaphat. Tơ noh, Inh gô sek tơlang lu sư, gah lu kon pơlei pơla Inh, lu bơngai Isơrael bơih jing tơmam Inh, yua kơ lu sư pơpuh lu kon pơlei pơla Inh tơ jơ̆p-jang kơ dêh char păng pĕng iŏk teh đak Inh,

³ hlang lăng tĕch kon pơlei pơla Inh, tơplih kon drŏ-nglo iŏk drŏ-kăn đi păng tĕch kon drŏ-kăn răt tơdrô wă et suai.

⁴ Ơ pơlei Tirơ păng pơlei Siđôn păng đĭ tơring Philistin, lu iĕm đei tơdrong kiơ păng Inh? Lu iĕm wă blah plơ̆ Inh hă? Tơdah lu iĕm blah plơ̆ Inh, Inh gô ăn tơdrong iĕm blah plơ̆ Inh wih plơ̆ tĕnh hloi tơ kơ̆l lu iĕm,

⁵ yua kơ lu iĕm đei iŏk boih hu păng maih Inh, chĕp ba boih dôm tơmam gĭt đơ̆ng Inh na tah tơ lăm hnam yang lu iĕm.

⁶ Lu iĕm tĕch boih kon sâu Juđa păng kon sâu Isơrael kơ lu bơngai Grĕk, wă kơ chông anhăk lu sư ataih đơ̆ng anih hnam lu sư.

⁷ Dang ei Inh gô pơtrŭt lu sư iung brŏk đơ̆ng anih mă lu iĕm đei tĕch lu sư păng Inh gô pơdrâu tơwih tơdrong kơnê̆ tơ kơ̆l lu iĕm kơdih.

⁸ Inh gô tĕch kon drŏ-nglo drŏ-kăn iĕm tơ lăm ti kon sâu Juđa, kon sâu Juđa gô tĕch lu sư tơ bơngai Sabean, mă adrĕch bơngai oei ataih dêh; Kră Yang đei khan bơih thoi noh.

⁹ Ră roi bĕ tơdrong âu jơ̆p kơ teh đak đe. Hơmet bĕ tơdrong tơblah, pơdrŭt jơhngơ̆m lu linh pran kơtang iung blah. Ăn kơ đĭ-đăng lu linh gơh tơblah năm tơ anăp bĕ, ăn kơ lu sư blah!

¹⁰ Iŏk bĕ pla 'nhik pơm đao gưm, iŏk săng kô pơm tơbăk. Lu bơngai tơrăn athei khan bĕ thoi âu: ‘Inh âu pran kơtang!’

¹¹ Năm mă tĕnh bĕ ơ đĭ-đăng lu iĕm, lu mă teh đak jum dăr, lu iĕm athei akŭm băl bĕ tơ noh. Ơ Kră Yang, apinh Ih krao wơh lu bơngai pran kơtang Ih jur tơ noh!

¹² Ơ lu teh đak iung bĕ, jur tơ thŭng Jêhôsaphat, yua kơ tơ noh Inh wă sek tơlang kơ đĭ-đăng lu adrĕch adrung jum dăr.

¹³ Iŏk săng kô yuă bĕ, yua kơ 'ba đum boih. Năm juă bĕ, yua kơ anih hmĕt đak hơmu 'bĕnh bơih; lăm kơthŭng 'bĕnh blai, yua kơ tơdrong kơnê̆ lu sư tih dêh boih.

¹⁴ Khŭl tơpôl lơlang, khŭl tơpôl lơlap, tơ lăm thŭng tơdrong sek tơlang, yua kơ năr Kră Yang jê̆ truh bơih tơ lăm thŭng tơdrong sek tơlang.

¹⁵ Măt 'năr măt khei jing măng mu, lu sơnglŏng pă hơdah dơ̆ng.

¹⁶ Kră Yang ôr gơhuh đơ̆ng pơlei Siôn, Sư ôr pơret thoi grơ̆m glaih đơ̆ng Jêrusalem. Tơ kơpal plĕnh tơ ala teh pơpơ̆ tơdrŏ ngăl, mă-lei Sư bơih anih kon pơlei pơla Sư kơ'nơp gơnang, jing minh kơđông kơjăp kơ lu kon sâu Isơrael.

¹⁷ Kơplah noh na lu iĕm gô băt Inh boih Kră Yang 'Bok Kei-Dei lu iĕm, oei tơ kông Siôn, noh kông rơgoh Inh. Pơlei Jêrusalem jing 'lơ̆ng rơgoh, păng lu bơngai tơmoi ưh pă năm yak trong noh dơ̆ng.

Tơdrong pơkă wă ăn pŭn hiôk kơ kon pơlei 'Bok Kei-Dei

¹⁸ Lăm năr noh, lu kông gô lĕch ro đak sik 'ngam, đak toh ro lĕch đơ̆ng lu bŏl kông groi, tơ rim thong đak Juđa gô đei đak ro. Minh pôm tu đak gô lĕch đơ̆ng hnam Kră Yang păng ro ruh tơ lăm thŭng hrĕng Sitim.

¹⁹ Dêh Êyiptơ gô jing bri juơ, Eđôm kư̆m gô jing bri rơwơ̆ng, yua kơ lu sư pơm kơnê̆ kơ lu kon sâu Juđa, păng đei pơlôch tơlĕch pham lu bơngai tơpăt lăm teh đak Juđa.

²⁰ Mă-lei Juđa oei oei ling-lang, Jêrusalem gô oei ling-lang đơ̆ng jơhnơr âu truh tơ jơhnơr nai.

²¹ Inh gô iung kơting pham lu sư mă Inh ưh tam mă iung kơting; yua kơ Kră Yang oei lăm kông Siôn.