Jo 6 - Sơ̆p Hlabơar Nơ̆r 'Bok Kei-Dei

Khôi juăt khŭl Nasirit

¹ Kră Yang khan kơ Môis:

² Ih roi tơbăt ăn kơ adrĕch bơngai Isơrael khan: Mă bơngai drŏ-nglo dah bơngai drŏ-kăn, mưh pơkă pơkăm wă jao kơdih akâu sư kơ Kră Yang. Kiơ̆ thoi khŭl Nasirit

³ Na sư athei pơkơ̆m ưh kơ gơh et sik dah huch tơmam kiơ suai; kư̆m ưh kơ huch sik kiơ mă đe pơm hrâu păng plei hơmu, dah sa hơmu oei adrih, dah sa plei hơmu mă kro boih kư̆m ưh kơ gơh.

⁴ Lăm đĭ năr sư pơjao akâu, ưh kơ gơh sa kiơ đe pơm hăm plei hơmu, mă găr truh tơ kơđoh akar sư.

⁵ Kơplah lăm năr sư wă pơkă jao akâu thoi khŭl Nasirit, ưh kơ gơh yua săng hơkôih, hơkôih kơ̆l; sư athei oei mă rơgoh, lê̆ sŏk chăt kơjung dang yơ dĭng truh tơ đĭ năr sư pơkă kơdih akâu wă pơyơ̆r sư kơ Kră Yang.

⁶ Kơplah đĭ lăm năr sư pơjao pơyơ̆r akâu sư kơ Kră Yang sư ưh kơ gơh jê̆ akâu bơngai lôch ôh.

⁷ Sư ưh kơ gơh pơm ăn kơ akâu sư 'mê̆-'mach yua kơ mĕ, 'bă dah 'nhŏng mai oh sư lôch, kơplah lăm đĭ năr sư pơyơ̆r jao akâu kơ Kră Yang oei kơpal kơ̆l sư.

⁸ Kơplah đĭ-đăng năr sư jao akâu kơdih, sư jing rơgoh ăn kơ Kră Yang.

⁹ Tơdah đei bơngai bu lôch ưh kơ tam băt 'bơ̆t anăp sư, pơm kơ kơ̆l sư 'mê̆-'mach mă đei jao wă kơ rơgoh, athei hơkôih kơ̆l 'ngôch lăm năr rơgoh noh, wă khan lăm năr mă tơpơh.

¹⁰ Truh năr mă tơhngam sư athei chĕp ba 'bar tŏ sem pơgâm dah 'bar tŏ kơtơp ăn kơ 'bok soi 'bơ̆t 'măng Bơsŭn Anih Akŭm.

¹¹ 'Bok soi gô iŏk minh pôm sem âu pơyơ̆r pơm tơmam soi huai tơdrong yoch, minh pôm dơ̆ng pơyơ̆r pơm tơmam soi 'buh păng pơm rơgoh tơdrong yoch sư mă đei pơm, yua kơ atâu bơngai lôch, thoi noh lăm năr sư gô jao kơ̆l sư wă pơm rơgoh 'lơ̆ng.

¹² Thoi noh, sư athei 'măn lê̆ akâu sư kơdih kơ Kră Yang, dôm lu năr mă jao akâu sư kơdih păng rôp minh pôm kon triu tơno dang minh sơnăm pơyơ̆r pơm tơmam soi huai iŏk tơdrong sư yoch glăi; mă-lei dôm lu năr sư pơyơ̆r jao akâu sư mă adrol noh ưh pă jô̆ boih, yua kơ năr sư jao akâu noh sư yoch 'mê̆-'mach boih.

¹³ 'Nâu khôi juăt khŭl Nasirit, tơdah đĭ tôm dôm năr mă pơyơ̆r jao akâu; đe gô chông ba sư tơ anăp 'măng Bơsŭn Anih Akŭm,

¹⁴ sư athei pơyơ̆r tơmam soi sư kơ Kră Yang, wă khan minh pôm triu kon tơno minh sơnăm ưh kơ đei jĭ kiơ, pơm tơmam soi 'buh, iŏk minh pôm kon triu akăn dơ̆ng ưh kơ đei jĭ kiơ, dang minh sơnăm pơm tơmam soi pơyơ̆r yua kơ tơdrong yoch, iŏk dơ̆ng minh pôm kon triu tơno ưh kơ jĭ kiơ pơyơ̆r pơm tơmam soi bơnê hiôk-hian,

¹⁵ hơdai hăm tơmam soi phe 'ba păng tơmam soi huch sa păng minh bai 'bĕng ưh kơ đei 'buih; 'bĕng pơm hăm tơpŭng bơlŭ hăm rơmă ôliwơ, lu 'bĕng klang pik đak rơmă ôliwơ.

¹⁶ 'Bok soi gô pơdah pơyơ̆r tơmam soi noh 'bơ̆t anăp Kră Yang păng pơyơ̆r tơmam soi huai tơdrong yoch hơdai hăm tơmam soi 'buh sư.

¹⁷ Sư gô pơyơ̆r kon triu tơno kơ Kră Yang wă pơm tơmam soi pơyơ̆r 'blŏk bơnê hiôk-hian, hơdai hăm 'bĕng mă ưh kơ đei 'buih, 'bok soi kư̆m gô pơyơ̆r tơmam soi phe 'ba păng pơyơ̆r tơmam soi huch hai.

¹⁸ 'Bơ̆t 'măng Bơsŭn Anih Akŭm, bơngai mă pơjao akâu sư athei hơkôih kơ̆l 'ngôch, iŏk sŏk sư soh lăm ŭnh ala tơmam soi 'blŏk bơnê hiôk-hian.

¹⁹ Đơ̆ng rŏng kơ bơngai jao akâu sư hơkôih sŏk boih, 'bok soi iŏk minh pah hơngiĕng ti triu tơno hơtŭk sĭn, iŏk minh pôm 'bĕng ưh kơ đei 'buih păng iŏk minh hlak 'bĕng klang ưh kơ đei 'buih na dan 'bơ̆t 'bar pah tơpang ti sư.

²⁰ Na tơpơng 'ma 'ngiĕo 'bơ̆t anăp Kră Yang; noh jing tơmam rơgoh lê̆ kơ 'bok soi, kơtơh păng blu mă sư đei pơyơ̆r 'ma 'ngiĕo. Klaih kơ noh bơngai kiơ̆ khŭl Nasirit gơh huch sik hơmu.

²¹ Noh jing tơdrong khôi juăt lu khŭl Nasirit pơm tơdrong wă pơkă pơkăm. Tơmam mă sư soi pơyơ̆r kơ Kră Yang kơ tơdrong jao akâu kơdih kiơ̆ khŭl Nasirit, gô jing thoi sư pơkă 'nguaih kơ tơmam nai mă sư đei pơyơ̆r. Sư athei pơm kiơ̆ trŏ tơdrong juăt jao akâu thoi minh 'nu bơngai khŭl Nasirit.

Nơ̆r 'bok soi sơkat pŭn hiôk

²² Kră Yang khan kơ Môis:

²³ Khan bĕ kơ Arôn hăm đĭ kon drŏ-nglo sư thoi âu: Tơdrong iĕm wă sơkat pŭn hiôk ăn kơ kon pơlei Isơrael lu iĕm gô khan kơ lu sư:

²⁴ Apơi Kră Yang ăn tơdrong pŭn hiôk kơ iĕm păng tơgŭm wei-lăng iĕm.

²⁵ Apinh Kră Yang pơchrang muh măt sư kơ iĕm păng mơnat kơ iĕm.

²⁶ Apinh Kră Yang tơmang lăng iĕm păng ăn tơdrong chơt hiôk kơ iĕm.

²⁷ Lu sư athei dan 'măn anăn Inh tơ kơpal lu kon pơlei adrĕch Isơrael thoi noh, lei na Inh gô ăn tơdrong pŭn hiôk kơ lu sư.