Jo 5 - Sơ̆p Hlabơar Nơ̆r 'Bok Kei-Dei

Puh tơweh lu bơngai jĭ apoh

¹ Kră Yang khan kơ Môis:

² Ih athei khan kơ adrĕch bơngai Isơrael puh tơweh lê̆ đĭ-đăng lu bơngai kơnê̆ 'mê̆-'mach lu đei jĭ apoh, lu bơngai đei jĭ jăn lĕch đak đuh păng lu bơngai mă đei hơtŭt 'bơm kơ akâu bơngai lôch bơngai ayơ mă 'mê̆-'mach noh.

³ Mă drŏ-nglo dah drŏ-kăn athei puh tơweh lê̆ lu sư tơ 'nguaih kơ kơđông, wă kơ lu sư huay kơ pơm mơgrĭ 'mê̆-'mach kơ anih kơđông, mă đei Inh oei tơ lăm noh,

⁴ lu adrĕch bơngai Isơrael pơm kiơ̆ hloi thoi noh, puh tơweh lê̆ đĭ lu jĭ 'mê̆ đơ̆ng lăm kơđông, kiơ̆ thoi nơ̆r Kră Yang đei tơtă lê̆ boih kơ Môis.

Khôi juăt gah 'mong pơdrâu

⁵ Kră Yang khan kơ Môis:

⁶ Ih khan bĕ kơ lu bơngai Isơrael: Tơdah đei minh 'nu drŏ-nglo dah bơngai drŏ-kăn pơm tơdrong yoch mă kon bơngai ngăl juăt kơ pơm, pơm glăi kơ Kră Yang jô̆ bơngai noh pơm yoch;

⁷ bơngai noh athei tơbral roi tơdrong yoch sư păng pơdrâu tơwih tơmam tôm dôm thoi đêl păng ăn thim minh lăm pơđăm tơmam noh tơwih ăn kơ bơngai mă bơ̆n đei pơm glăi.

⁸ Tơdah bơngai 'nâu ưh pă đei boih 'nhŏng oh păng dah bơngai wă iŏk tơmam đe tơwih ăn kư̆m pă đei lei tơmam âu gah Kră Yang, wă khan ăn kơ lu 'bok soi, thim đei triu tơno wă soi pơyơ̆r pơm tơmam soi huai tơplih tơdrong yoch sư.

⁹ Đĭ-đăng tơmam pơyơ̆r 'lơ̆ng rơgoh đơ̆ng lu bơngai Isơrael pơyơ̆r ăn kơ lu 'bok soi boih noh lê̆ kơ lu 'bok soi.

¹⁰ Tơmam ayơ bơngai Isơrael pơyơ̆r 'măn lê̆ pơm tơmam 'lơ̆ng rơgoh dôm lu tơmam noh ăn kơ 'bok soi; tơmam kiơ mă đe ăn kơ 'bok soi noh tơmam sư boih.

Khôi juăt gah tơdrong gar

¹¹ Kră Yang khan dơ̆ng kơ Môis thoi âu:

¹² Khan bĕ kơ adrĕch bơngai Isơrael: Tơdah đei minh 'nu drŏ-kăn 'blal pơm yoch hăm klo sư,

¹³ Tơdah đei minh 'nu bơngai drŏ-nglo ngôi hăm sư noh, ôn hlơp đơ̆ng klo sư; tơdah sư đei pơm kư̆ kă 'mê̆ brư̆ akâu sư ôn oei hlơp păng đe ưh kơ đei bu rôp 'bơ̆t jơ̆ng ti;

¹⁴ tơdah đei klo sư gar akăn sư, tơchĕng akăn sư pơm kơnê̆ 'mê̆-'mach kơ sư boih, dah huay kơ pơm kơnê̆ 'mê̆-'mach ră.

¹⁵ Lei klo sư athei chông ba akăn sư năm 'bơ̆t anăp 'bok soi, chĕp ba tơpŭng minh lăm mơjĭt êpha phe 'ba tơ'bâu wă pơm tơmam soi, sư ưh kơ gơh hling đak rơmă ôliwơ păng đak tơmam 'bâu phu tơ kơpal tơmam ôh, yua kơ noh jơ̆ tơmam pơyơ̆r phe 'ba ưh kơ đei pham yua kơ tơdrong gar, tơmam soi âu wă pơtih ăn đei pơm tơdrong yoch kơnê̆,

¹⁶ 'bok soi gô athei bơngai drŏ-kăn noh năm jê̆ dơ̆ng 'bơ̆t anăp Kră Yang.

¹⁷ Đơ̆ng noh 'bok soi iŏk đak rơgoh tuh lăm bô̆i glah, chup iŏk 'bruih đơ̆ng hơnă Anih Akŭm na tah lăm đak noh.

¹⁸ Na 'bok soi athei bơngai drŏ-kăn noh dơ̆ng năm jê̆ 'bơ̆t anăp Kră Yang, na lang achăng sŏk bơngai drŏ-kăn noh, dan tơmam wă pơyơ̆r 'bơ̆t tơpang ti sư, tơmam pơyơ̆r phe 'ba tơmam pơyơ̆r kơ gar; păng 'bok soi đei chĕp đak tăng lăm ti sư wă pơtih thoi hiap.

¹⁹ 'Bok soi athei bơngai drŏ-kăn noh pơkă pơkăm păng khan kơ sư: Tơdah ưh kơ đei minh 'nu bơngai drŏ-nglo ayơ 'bĭch hăm ih păng ih oei lui mơ̆ng kơ klo ih ưh kơ luĕl 'blal păng huay kơ pơm kơnê̆ 'mê̆ brư̆, lei đak tăng tơdrong hiap âu huay kơ pơrăm ih.

²⁰ Mă-lei tơdah klo ih oei pơgơ̆r, mă ih luĕl 'blal; pơm kư̆ kă 'mê̆ brư̆ păng tơdah đei minh 'nu bơngai drŏ-nglo 'nguaih kơ klo ih 'bĭch hơdai ih.

²¹ Kơplah noh 'bok soi athei bơngai drŏ-kăn noh pơma pơkă hiap akâu păng khan kơ bơngai drŏ-kăn thoi âu: Apinh Kră Yang ăn kơ ih jing bơngai pŭ tơdrong hiap pơtê̆ lăm lu kon pơlei ih, pơm kơ ih iôr hiang hơkĕ hơkong păng klak ih bơôr pơpông.

²² Thŭ đak tăng tơdrong hiap mơ̆t truh tơ lăm klơm klak pơm ăn kơ klak ih bơôr, blu ih ôm. Bơngai drŏ-kăn noh khan A-men, A-men.

²³ Đơ̆ng noh 'bok soi athei chih minh hlak hla bơar akar tơdrong hiap, na đang kơ noh iŏk đak tăng noh ôp.

²⁴ 'Bok soi ăn kơ bơngai drŏ-kăn huch đak tăng tơdrong hiap, đak tăng tơdrong hiap mơ̆t lăm akâu sư wă pơm kơ sư jĭ hang nuih kơtang dêh.a

²⁵ Đơ̆ng noh, 'bok soi iŏk tơmam soi pơyơ̆r phe 'ba kơ tơdrong gar đơ̆ng ti bơngai drŏ-kăn, chĕp tơi wơi 'bơ̆t anăp Kră Yang na pơyơ̆r dan kơpal chơnang soi.

²⁶ Iŏk minh kơđôp tơpŭng tơmam soi wă tơ'blŏk păng soh tơ kơpal chơnang soi; klaih kơ noh sư gô ăn kơ bơngai drŏ-kăn noh huch đak noh.

²⁷ Tơdah đang kơ ăn kơ bơngai drŏ-kăn noh huch đak tăng tơdrong hiap, tơdah bơngai đei pơm kơnê̆ 'mê̆ brư̆ kơđang kơ̆l hơko klo sư lei đak tăng noh pơm kơ sư hơ̆-hang chhŭr nuih klak sư pơpông tih, blu sư ôm, lei na bơngai drŏ-kăn noh jing bơngai đe hiap pơtê̆ lăm lu kon pơlei sư.

²⁸ Mă-lei tơdah bơngai drŏ-kăn noh huay kơ pơm kơnê̆ 'mê̆ brư̆, oei rơgoh, lei sư huay kơ đei tơdrong truh răm kiơ păng gô pơjing kon hơ'lơ̆p.b

²⁹ Noh boih tơdrong khôi juăt gah tơdrong gar lu bơngai drŏ-kăn. Klo sư pơgơ̆r sư, dah sư pơm kư̆ kă pơm nhŭng kŏ;

³⁰ dah kơplah klo sư gar akăn sư; lei athei ba bơngai drŏ-kăn noh 'bơ̆t anăp Kră Yang, hăm 'bơ̆t anăp 'bok soi gô pơm kơ sư kiơ̆ tôm thoi tơdrong khôi juăt 'nâu bơtho tơ'bôh.

³¹ Klo sư gô huay kơ yoch, gah bơngai drŏ-kăn noh pŭ tơdrong yoch sư kơdih.