Jo 4 - Sơ̆p Hlabơar Nơ̆r 'Bok Kei-Dei

Tơdrong jang jao boih kơ adrĕch Kôhat

¹ Kră Yang khan kơ Môis păng Arôn thoi âu:

² Lăm lu adrĕch bơngai Lêwi, chih jô̆ adrĕch kon sâu Kôhat kiơ̆ kơ adrĕch ioi sư.

³ Iŏk đơ̆ng pêng-jĭt sơnăm tơ kơpal truh tơ pơđăm-jĭt sơnăm, wă khan đĭ-đăng bơngai bu mă gơh jang tơgŭm lăm Bơsŭn Anih Akŭm.

⁴ 'Nâu tơdrong jang lu adrĕch kon sâu Kôhat lăm Bơsŭn Anih Akŭm, lu sư wei-lăng tơmam rơgoh hloh,

⁵ tơdah wă weh tơ nai plôh bơsŭn Anih akŭm, Arôn păng lu kon drŏ-nglo sư yaih lang che pĕng anih 'lơ̆ng rơgoh, na klơ̆p gom lê̆ hom tơdrong pơgơ̆p hăm che noh,

⁶ đe gô iŏk akar ka tih klơ̆p kơpal kơ che klơ̆p gom păng kư̆m lơ̆k che dreng plĕnh dơ̆ng kơpal noh păng sôr 'long tơnung tung.

⁷ Păng kư̆m lơ̆k minh blah che dreng plĕnh tơ kơpal gơ'bang dan 'bĕng pơyơ̆r ăn kơ Kră Yang 'Bok Kei-Dei, tơ kơpal gơ'bang đe dan pơnhan chhĕr, pơnhan tô, pơnhan iĕ, kơthao păng 'bĭnh wă mong tơmam huch sa. 'Bĕng athei đei tơ noh ling-lang.

⁸ Đơ̆ng noh đe gô tơsu tơ kơpal lu tơmam noh hăm minh blah che 'brê gôh păng klơ̆p gom lê̆ dơ̆ng hăm che akar ka tih đơ̆ng noh đe sôr 'long tơnung tung.

⁹ Kŭm athei iŏk minh blah che jơk plĕnh pơ̆n jơ̆ng kơđeng ŭnh jrĕnh wă nhơk pơchrang hăm ŭnh kơđeng, chơkep wă tơpăt ŭnh, kơđŏng mam mong ngar păng đĭ-đăng lu bô̆i mong đak rơmă ôliwơ wă yua pơm ŭnh jrĕnh.

¹⁰ Đe gô dan sư hơdai hăm đĭ-đăng tơmam yua lăm che gom sư pơm păng akar ka tih, na dan tơmam noh tơ kơpal hơbang.

¹¹ Lu sư athei lơ̆k minh blah che jơk plĕnh kơpal gơ'bang soi maih păng gom hăm akar ka tih đang kơ noh đe sôr 'long tơnung tung;

¹² lu sư gô iŏk đĭ-đăng tơmam yua 'măn kơ tơdrong bơ̆jang lăm anih rơgoh đơ̆ng noh đĭ-đăng 'nŭng tơ lăm che jơk plĕnh păng gom hăm akar ka tih đang kơ noh dan kơpal hơbang.

¹³ Lu sư kôch tơnuh ŭnh đơ̆ng chơnang soi; đơ̆ng noh bơyar minh blah che hơhĭm kơpal chơnang soi,

¹⁴ dan kơpal noh đĭ-đăng tơmam yua lăm tơdrong jang chơnang soi, wă khan kơđŏng mam mong, lu tơnuh ŭnh; gơ'bênh, pơnai, pơnhan, hăm đĭ-đăng lu tơmam yua kơ chơnang soi. Đơ̆ng noh klơ̆p kơpal chơnang soi noh minh blah akar ka tih păng sôr 'long tơnung wă tung.

¹⁵ Đang kơ Arôn păng lu kon drŏ-nglo sư chô̆ chôm đĭ tơmam lăm anih rơgoh boih, na đe pôk bơsŭn noh yak, na lu kon sâu Kôhat năm tung iŏk lu tơmam noh; lu sư ưh kơ gơh kơ hơtŭt 'bơm ôh tơmam rơgoh noh, kơnh lu sư lôch. Tơmam lăm Bơsŭn Anih Akŭm, tơmam noh mă lu kon sâu Kôhat athei tung.

¹⁶ Êlêasar kon drŏ-nglo Arôn, sư wei-lăng gah đak rơmă ôliwơ wă tơ̆k ŭnh kơđeng, tơmam 'bâu phu, tơmam pơyơ̆r tơpŭng ling-lang, đak rơmă 'bâu phu wă pik păng đĭ-đăng tơmam kiơ lăm noh păng lu tơmam yua lăm anih rơgoh.

¹⁷ Kră Yang khan dơ̆ng kơ Môis păng Arôn thoi âu:

¹⁸ Athei wei pơm liơ 'nĕ ăn kơ adrĕch Kôhat lôch đơ̆ng lăm adrĕch bơngai Lêwi,

¹⁹ athei pơm tơdrong 'nâu ăn kơ lu sư, wă kơ tơdah năm jê̆ tơ anih rơgoh hloh, lu sư gơh arih, huay kơ lôch: Arôn păng lu kon drŏ-nglo athei jao ăn tơdrong jang kơ rim 'nu păng tơmam kiơ lu sư wă tung.

²⁰ Mă khan lăp hrei hrei đĕch lu sư kư̆m ưh kơ gơh mơ̆t lăng, lu tơmam rơgoh, kơnh hli kơ lu sư lôch.

Tơdrong jang jao ăn kơ adrĕch Gersôn

²¹ Kră Yang khan dơ̆ng kơ Môis thoi âu:

²² Păng kư̆m athei chih jô̆ adrĕch kon sâu Gersôn kiơ̆ adrĕch 'bă lu sư.

²³ Iŏk đơ̆ng pêng-jĭt sơnăm tơ kơpal truh tơ pơđăm-jĭt sơnăm. Ih athei chih jô̆ lu sư hơdôm 'nu gơh jang tơ Bơsŭn Anih Akŭm.

²⁴ 'Nâu dôm tơdrong jang lu adrĕch kon sâu Gersôn, gô pơm păng tơmam lu sư wă tung.

²⁵ Lu sư gô tung che pĕng Anih Akŭm, che pĕng lăm Bơsŭn Anih Akŭm păng che gom sư, tơmam gom klơ̆p pơm hăm akar ka tơ kơpal păng che pĕng 'măng Bơsŭn Anih Akŭm;

²⁶ lu che pĕng kơđeng tăp dăr kơ bơsŭn păng chơnang soi păng che pĕng 'măng kơđeng Anih Akŭm, lu tơlei giĕn păng đĭ-đăng tơmam yua lăm tơdrong noh păng jang dôm tơdrong jang noh.

²⁷ 'Nâu đĭ dôm tơdrong jang kơ lu kon sâu adrĕch Gersôn, tơmam kiơ mă lu sư tung ba păng dôm tơdrong jang kiơ lu sư pơm athei pơm kiơ̆ kơ nơ̆r Arôn păng lu kon drŏ-nglo sư tơtă athei tơhlâu tơ'bôh; ih jao ăn kơ lu sư wei-lăng tơmam kiơ lu sư athei tung ba.

²⁸ Lăm Bơsŭn Anih Akŭm, noh tơdrong jang kơ lu kon sâu Gersôn. Lu sư athei bơ̆jang kiơ̆ kơ Ithamar, kon drŏ-nglo Arôn 'bok soi tơm.

Tơdrong jang ăn kơ adrĕch Mêrari

²⁹ Ih athei chih jô̆ adrĕch kon sâu Mêrari, kiơ̆ kơ adrĕch hnam 'bă lu sư,

³⁰ jô̆ lu kon drŏ-nglo iŏk đơ̆ng pêng-jĭt sơnăm truh tơ pơđăm-jĭt sơnăm, wă jô̆ đĭ-đăng lu bơngai gơh jang tơgŭm tơ Bơsŭn Anih Akŭm.

³¹ Tơdrong jang lu kon sâu Mêrari lăm Anih akŭm, 'nâu lu tơmam lu sư wei-lăng păng tung dah đe pôk tơ nai; lu tơ̆r lăm Bơsŭn Anih Akŭm lu tơpơng, jrăng, jrăng trôm,

³² lu jrăng tăp dăr kơđeng păng trôm jrăng, gơwŏk, tơlei giĕn păng đĭ-đăng tơmam yua lăm noh; lu iĕm jô̆ chih anăn rim tơmam kiơ lu sư wă wei-lăng păng tung anhăk.

³³ Noh boih đĭ dôm tơdrong jang lu kon sâu Mêrari, dôm tơdrong jang lăm Anih Akŭm mă lu sư athei pơm kiơ̆ kơ Ithamar kon drŏ-nglo Arôn wơh.

³⁴ Thoi noh, Môis, Arôn păng lu yŏng pơgơ̆r chih jô̆ kon sâu Kôhat, kiơ̆ adrĕch, hnam 'bă lu sư,

³⁵ iŏk đơ̆ng pêng-jĭt sơnăm truh tơ pơđăm-jĭt sơnăm, wă khan đĭ-đăng bơngai mă gơh bơ̆jang tơ Bơsŭn Anih Akŭm;

³⁶ păng lu bơngai mă đe chih jô̆ kiơ̆ kơ adrĕch, hnam dơnŏ 'bă lu sư, đei 'bar-rơbâu tơpơh-hrĕng pơđăm-jĭt 'nu.

³⁷ Noh boih lu bơngai kon sâu adrĕch Kôhat mă đei chih jô̆, wă khan đĭ-đăng bơngai bu mă gơh bơ̆jang lăm Bơsŭn Anih Akŭm Môis păng Arôn chih jô̆, kiơ̆ thoi nơ̆r Kră Yang tơtă kơ Môis bơtho khan.

³⁸ Kon sâu Gersôn chih jô̆ tơmơ̆t lăm sơ̆p hla bơar boih, kiơ̆ kơ adrĕch gah 'bă lu sư.

³⁹ Iŏk đơ̆ng pêng-jĭt sơnăm tơ kơpal truh tơ pơđăm-jĭt, wă khan đĭ-đăng lu kon drŏ-nglo mă gơh bơ̆jang tơ Bơsŭn Anih Akŭm,

⁴⁰ đĭ-đăng đei 'bar-rơbâu tơdrâu-hrĕng pêng-jĭt 'nu.

⁴¹ Dôm noh boih adrĕch adrung kon sâu Gersôn chih jô̆ wă khan dôm lu bơngai mă bơ̆jang lăm Bơsŭn Anih Akŭm mă Môis păng Arôn chih jô̆ kiơ̆ thoi nơ̆r Kră Yang đei tơtă.

⁴² Bĕ gah kon sâu adrĕch Mêrari kư̆m đei jô̆, kiơ̆ adrĕch hnam dơnŏ 'bă lu sư,

⁴³ iŏk đơ̆ng pêng-jĭt sơnăm tơ kơpal truh tơ pơđăm-jĭt, kiơ̆ adrĕch hnam dơnŏ 'bă lu sư wă khan lu kon drŏ-nglo mă gơh bơ̆jang lăm Anih Akŭm,

⁴⁴ đĭ-đăng đei pêng-rơbâu 'bar-hrĕng.

⁴⁵ Dôm noh boih jô̆ lu kon sâu Mêrari. Môis păng Arôn chih jô̆ boih, kiơ̆ thoi nơ̆r Kră Yang đei athei Môis bơtho khan.

⁴⁶ Đĭ-đăng lu bơngai lăm adrĕch Lêwi mă Môis, Arôn păng đĭ lu yŏng pơgơ̆r bơngai Isơrael đei chih jô̆ tơmơ̆t, kiơ̆ kơ lu adrĕch lu sư,

⁴⁷ iŏk đơ̆ng pêng-jĭt sơnăm truh tơ pơđăm-jĭt sơnăm, wă khan lu bơngai mă wă bơ̆jang lăm Bơsŭn Anih Akŭm, tung lu tơmam yua lăm noh.

⁴⁸ Đĭ-đăng đei tơhngam-rơbâu pơđăm-hrĕng tơhngam-jĭt 'nu.

⁴⁹ Đe đei chih jô̆ jao tơdrong jang adrĕch bơngai Lêwi kiơ̆ thoi nơ̆r Kră Yang tơtă gơnang kơ Môis bơtho khan, asong jang jao ăn kơ rim 'nu kiơ̆ kơ tơdrong jang lu sư athei pơm păng tơmam kiơ lu sư wă tung; đe đei asong tơdrong jang kiơ̆ kơ Kră Yang đei pơkă khan kơ Môis noh.