Jo 18 - Sơ̆p Hlabơar Nơ̆r 'Bok Kei-Dei

Tơdrong jang lu 'bok soi

¹ Kră Yang khan kơ Arôn: Ih, lu kon drŏ-nglo ih păng adrĕch adrung ih kư̆m gô pŭ iŏk lu tơdrong yoch lăm anih rơgoh; gah ih lu kon drŏ-nglo ih gô pŭ tơdrong yoch lăm tơdrong jang 'bok soi.

² Chông ba bĕ lu 'nhŏng oh ih hơdai ih mă adrĕch Lêwi, adrĕch 'bă ih, wă kơ lu sư pơgơ̆p hơdai ih păng tơgŭm ih jang; 'bơ̆t kơplah ih păng lu kon drŏ-nglo dơ̆ng 'bơ̆t anăp Bơsŭn Anih Akŭm Roi Tơbăt.

³ Lu sư gô bơ̆jang wei-lăng kiơ mă ih jao ăn, tơdrong jang kiơ mă lăm Bơsŭn; mă-lei lăp ưh kơ gơh năm jê̆ lu tơmam 'lơ̆ng rơgoh, kư̆m ưh kơ gơh dơ̆ng jê̆ chơnang soi đĕch, kơnh hli kơ lu sư lôch păng lu iĕm kư̆m lôch hai mơ̆n.

⁴ Lu sư gô pơgơ̆r hơdai ih, bơ̆jang lăm Bơsŭn Anih Akŭm, đĭ-đăng tơdrong jang lăm Bơsŭn; lu bơngai tơmoi nai ưh kơ gơh năm jê̆ ôh,

⁵ lu iĕm athei wei-lăng tôm tơdrong lăm bơsŭn 'lơ̆ng rơgoh păng chơnang soi, wă kơ huay pă đei tơdrong Kră Yang hil kơ bơngai Isơrael.

⁶ 'Nâu Inh đei iŏk boih lu 'nhŏng oh ih, adrĕch bơngai Lêwi đơ̆ng lăm khŭl bơngai Isơrael, yua kơ đei pơyơ̆r kơ Kră Yang boih, wă bơ̆jang lăm Bơsŭn Anih Akŭm.

⁷ Ih păng lu kon drŏ-nglo ih athei jang mă pơ'lơ̆ng tơdrong jang 'bok soi, wei-lăng dôm tơdrong gah chơnang soi păng tơmam kiơ tơ lăm che pĕng; lu iĕm jang tơdrong jang iĕm tơ lăm noh. Tơdrong jang 'bok soi noh minh tơdrong jang inh pôk ăn jing thoi minh tơdrong pơchĕp ăn; bơngai bu năm jê̆ tơ noh gô pơlôch.

⁸ Kră Yang khan kơ Arôn: 'Nâu Inh ăn kơ ih wei-lăng tơmam mă Inh đei iŏk akŭm đơ̆ng lu kon pơlei Isơrael pơyơ̆r kơ Inh, jing tơmam 'lơ̆ng rơgoh; Inh ăn boih tơmam 'nâu jing tơmam ih păng lu kon drŏ-nglo ih, tơdrong juăt 'nâu yua ling-lang hlŏng hloi.

⁹ Lăm lu tơmam 'lơ̆ng rơgoh dêh 'nâu ưh kơ đei soh 'buh mă đơ̆ng kon pơlei Isơrael pơyơ̆r ăn kơ Inh tơmam 'nâu lê̆ kơ ih: Đĭ-đăng dôm tơmam soi pơyơ̆r đơ̆ng lu sư, tơmam soi phe 'ba, tơmam soi wă huai tơdrong yoch, tơmam soi kơ tơdrong yoch hơch 'bơm; dôm tơmam rơgoh 'lơ̆ng 'nâu lê̆ kơ ih păng lu kon drŏ-nglo ih,

¹⁰ Noh tơmam 'lơ̆ng rơgoh hloh ih athei iŏk sa tơmam soi noh lăm anih 'lơ̆ng rơgoh lu bơngai drŏ-nglo gơh iŏk sa.

¹¹ Tơmam 'nâu kư̆m 'măn kơ ih. Tơmam ayơ mă bơngai Isơrael pơyơ̆r tơpơng 'ma 'ngiĕo, na 'nâu tơdrong juăt yua ling-lang ăn kơ ih păng lu kon drŏ-nglo kon drŏ-kăn ih. Bơngai mă 'lơ̆ng rơgoh oei lăm hnam ih gơh sa tơmam noh.

¹² Inh kư̆m đei ăn kơ ih dôm tơmam bơngai Isơrael pơyơ̆r plei blŭng-a kơ Kră Yang, đĭ-đăng pơyơ̆r tơmam blŭng-a, sik hơmu păng 'ba tơ'bâu iŏk lu 'lơ̆ng hloh.

¹³ Dôm tơmam plei 'long sa mă đơ̆ng teh, plei blŭng-a bơngai Isơrael pơyơ̆r kơ Kră Yang boih, noh 'măn kơ ih ngăl; hăm bơngai bu lăm hnam ih mă 'lơ̆ng rơgoh gơh sa.

¹⁴ Mă dôm tơmam kiơ đơ̆ng bơngai Isơrael pơyơ̆r noh jing tơmam ih ngăl.

¹⁵ Dôm lu kon kơdră mă kon bơngai dah kon sem dơrong đơ̆ng bơngai Isơrael đei pơyơ̆r ăn kơ Kră Yang, noh jing gah ih ngăl; mă-lei ih athei huai iŏk kon kơdră kon bơngai; kư̆m athei huai iŏk dôm kon sem dơrong mă ưh kơ 'lơ̆ng rơgoh tuh adrol.

¹⁶ Gah tơdrong ih huai iŏk, ih athei huai iŏk lu kon mă đei minh khei boih, kiơ̆ thoi đei hơgăt wă huai iŏk ih, iŏk pơđăm kăk jên hu, kiơ̆ kơ seikơl lăm anih 'lơ̆ng rơgoh; minh seikơl lăm anih 'lơ̆ng rơgoh noh dang 'bar-jĭt Gêra.a

¹⁷ Mă-lei ưh kơ đei huai ôh kon rơmo, kon triu, kon bơbe mă tuh adrol; noh jing kon sem dơrong 'lơ̆ng rơgoh boih. Ih athei iŏk pham lu sư tơtraih kơpal chơnang soi păng athei soh rơmă sư jing tơmam pơyơ̆r 'bâu phu ăn kơ Kră Yang.

¹⁸ 'Nhĕm sĕch sư noh lê̆ kơ ih, thoi lu 'nhĕm sĕch đe pơyơ̆r tơpơng 'ma 'ngiĕo păng blu gah 'ma noh 'măn kơ ih.

¹⁹ Inh pơkă 'nâu ling-lang ăn kơ ih, lu kon drŏ-nglo lu kon drŏ-kăn ih, đĭ-đăng tơmam pơyơ̆r 'lơ̆ng rơgoh mă bơngai Isơrael đei pơyơ̆r kơ Kră Yang; noh tơdrong pơgơ̆p pơkă 'bohb pơm ling-lang, ưh kơ gơh hiơt ôh, 'bơ̆t anăp Kră Yang ăn kơ ih păng adrĕch adrung ih.

²⁰ Kră Yang khan kơ Arôn: Lăm char bơngai Isơrael ih ưh kơ đei ôh teh jang sa păng ưh kơ đei asong ih tơmam kiơ ôh đơ̆ng adrĕch noh; Inh boih jing mŭk tơmam ih đơ̆ng lăm adrĕch Isơrael.

²¹ Bĕ gah lu kon sâu Lêwi, Inh ăn kơ lu sư yua iŏk đơ̆ng tơmam lu adrĕch Isơrael pơyơ̆r minh lăm mơjĭt apah lu sư jang lăm Bơsŭn Anih Akŭm.

²² Kon pơlei Isơrael ưh kơ gơh năm jê̆ Bơsŭn Anih Akŭm dơ̆ng, kơnh hli kơ lu sư pơm yoch na lôch.

²³ Mă-lei lu bơngai Lêwi boih bơ̆jang lăm Bơsŭn Anih Akŭm noh; dah đei pơm yoch, lu sư pŭ iŏk kơdih; lu sư ưh kơ đei teh jang sa ôh lăm adrĕch khŭl bơngai Isơrael; noh jing tơdrong juăt đei pơkă lăm đĭ chăl, jơhnơr lu sư truh ning-mônh.

²⁴ Yua kơ Inh đei ăn boih kơ adrĕch Lêwi tơdrong jang sa, dôm lu tơmam đơ̆ng đe ra akŭm minh lăm mơjĭt đơ̆ng adrĕch bơngai Isơrael mă pơyơ̆r ăn kơ Kră Yang. Yua kơ thoi noh, Inh đei pơma boih gah lu sư thoi âu: Lu sư ưh kơ đei teh jang sa ôh lăm adrĕch bơngai Isơrael.

²⁵ Kră Yang khan kơ Môis:

²⁶ Ih athei khan ăn kơ bơngai Lêwi thoi âu: Tơdah layơ lu iĕm đei iŏk minh lăm mơjĭt mă Inh ăn đơ̆ng kon pơlei pơyơ̆r noh wă pơm mŭk tơmam iĕm, na iŏk bĕ minh lăm mơjĭt đơ̆ng tơmam noh na jing pơm tơmam pơyơ̆r soi ăn kơ Kră Yang.

²⁷ Tơmam lu iĕm pơyơ̆r noh jô̆ thoi 'ba mi iŏk đơ̆ng anih đe preh 'ba păng kư̆m thoi sik đak hơmu 'bĕnh blai đơ̆ng anih đe hmĕt sư.

²⁸ Thoi ei na, lăm lu tơmam minh lăm mơjĭt lu iĕm iŏk đơ̆ng bơngai Isơrael, iĕm kư̆m athei iŏk minh lăm mơjĭt pơm tơmam pơyơ̆r ăn kơ Kră Yang păng jao tơmam pơyơ̆r ăn kơ Kră Yang noh kơ Arôn 'bok soi.

²⁹ Lăm dôm tơmam pơyơ̆r mă iĕm đei iŏk, lu iĕm athei rơih iŏk tơmam mă 'lơ̆ng hloh 'măn lê̆ pha jing tơmam 'lơ̆ng rơgoh na pơyơ̆r ăn kơ Kră Yang.

³⁰ Lei na ih athei khan ăn kơ bơngai Lêwi: Tơdah lu iĕm đei pơyơ̆r boih tơmam mă 'lơ̆ng hloh iŏk đơ̆ng tơmam minh lăm mơjĭt, lei ăn kơ bơngai Lêwi jô̆ thoi tơmam lu sư đơ̆ng anih preh 'ba, kư̆m nhen thoi tơmam lu sư đơ̆ng anih hmĕt sik hơmu mơ̆n.

³¹ Lu iĕm păng hnam dơnŏ iĕm iŏk sa đơ̆ng anih ayơ kư̆m bưh, yua kơ noh tơdrong apah đêl lu iĕm jang lăm Bơsŭn Anih Akŭm.

³² Yua kơ thoi noh tơdah lu iĕm đei pơyơ̆r boih tơmam mă 'lơ̆ng hloh ăn kơ Kră Yang, lu iĕm huay pă pŭ tơdrong yoch boih, lu iĕm huay pă pơm 'mê̆-'mach kơ dôm lu tơmam 'lơ̆ng rơgoh bơngai Isơrael, lu iĕm huay kơ lôch ôh.