Jo 13 - Sơ̆p Hlabơar Nơ̆r 'Bok Kei-Dei

Mơjĭt-'bar 'nu bơngai năm chop lăng dêh char Kanaan

¹ Kră Yang khan kơ Môis:

² Athei ăn bơngai năm chop dăr lăng dêh char Kanaan, dêh char mă Inh gô ăn kơ lu kon pơlei adrĕch Isơrael. Kư̆ kơ rim adrĕch ih rơih iŏk minh 'nu năm; minh 'nu mă pơm yŏng kơdră kơ adrĕch sư.

³ Kiơ̆ kơ nơ̆r Kră Yang Môis wơh lu yŏng kơdră Isơrael năm đơ̆ng char glă Pharan.

⁴ 'Nâu dôm anăn lu sư: Samua kon drŏ-nglo Sakur đơ̆ng adrĕch Rubên;

⁵ Saphat kon drŏ-nglo Hôri đơ̆ng adrĕch Simêôn;

⁶ Kalep kon drŏ-nglo Jêphunê đơ̆ng adrĕch Juđa;

⁷ Igal kon drŏ-nglo Jôsep đơ̆ng adrĕch Isakar;

⁸ Hôsêa kon drŏ-nglo Nun đơ̆ng adrĕch Êphraim;

⁹ Palti kon drŏ-nglo Raphu đơ̆ng adrĕch Bênjamin;

¹⁰ Gadiel kon drŏ-nglo Sôdi đơ̆ng adrĕch Sabulôn;

¹¹ Gatdi kon drŏ-nglo Susi đơ̆ng adrĕch Jôsep, wă khan kiơ̆ adrĕch Manase;

¹² Ammiel kon drŏ-nglo Gêmali đơ̆ng adrĕch Đan;

¹³ Sêthur kon drŏ-nglo Mikel đơ̆ng adrĕch Aser;

¹⁴ Nahbi kon drŏ-nglo Wôsi đơ̆ng adrĕch Naptali;

¹⁵ Gêuel kon drŏ-nglo Maki đơ̆ng adrĕch Gat.

¹⁶ 'Nâu bơngai mă Môis wơh lu sư năm chop dăr lăng char. Môis tơplih anăn Hôsê, kon drŏ-nglo Nun krao anăn Jôsuê.

¹⁷ Thoi noh, Môis wơh lu sư năm chop dăr lăng char Kanaan păng pơkă khan: Đơ̆ng âu tŏk năm bĕ tơ thŭng glă gah gơal păng năm tŏk tơ gah groi kông;

¹⁸ na lăng char noh thoi yơ, lu kon pơlei oei tơ lăm noh pran dah tơrăn, lu sư lơ dah tŏ sĕt.

¹⁹ Lăng dêh char lu sư oei noh 'lơ̆ng dah kơnê̆; lăng lăm pơlei tih noh, lu sư chă oei pơm bơsŭn pơdơh đĕch dah đei anih hnam dur kơjăp;

²⁰ teh lu sư jang sa, 'lơ̆ng dah kơnê̆, hăm đei 'long dah ưh. Athei mă nuih păng phĕ ba plei hơmu đum.

²¹ Thoi noh na lu đe noh năm chop dăr lăng dêh char, iŏk đơ̆ng char glă Yin truh tơ Rêhôp, jê̆ 'măng jang Hamat.

²² Lu sư yak năm đơ̆ng gah gơal tŏk truh tơ pơlei tih Hêbrôn, tơ noh đei Ahiman, Sêsai păng Tanmai, lu kon sâu Anak oei tơ noh. Đe pơjing pơlei tih Hêbrôn tơpơh sơnăm adrol kơ pơlei Sôan lăm char Êyiptơ,

²³ lu sư năm truh tơ Thŭng Êskôl, tơ noh lu sư chơ̆ng iŏk minh tơ'bla, đei minh hơie plei hơmu trem; lu sư chă 'long 'bar 'nu tung, lu sư kư̆m đei phĕ ba plei hơra păng plei gărnăt mơ̆n.

²⁴ Đe anăn anih 'nâu thŭng Êskôl,a kơ lu bơngai Isơrael đei chơ̆ng iŏk hơie plei hơmu đơ̆ng noh.

²⁵ Lu bơngai năm chop dăr lăng char noh lăm puăn-jĭt năr na brŏk.

²⁶ Brŏk truh boih lu sư năm tơ Môis, Arôn păng đĭ khŭl adrĕch bơngai Isơrael, tơ Kades lăm char glă Pharan, lu sư roi ăn kơ bre sư păng đĭ-đăng kon pơlei băt păng tơ'bôh ăn plei 'long sa đơ̆ng lăm char noh.

²⁷ Lu sư khan kơ Môis, lu nhôn đei truh boih tơ char mă ih đei wơh nhôn năm; lăm char noh teh mơ̆r 'lơ̆ng tơmam sa rơkah rơkai, 'nâu boih plei 'long sa đơ̆ng char noh.

²⁸ Mă-lei kon pơlei oei lăm char noh bơngai pran kơtang, anih pơlei dur kơjăp păng tih; mă-lei lu nhôn 'bôh đei kon sâu Anak oei tơ noh.

²⁹ Kon pơlei Amalek oei tơ gah gơal, kon pơlei Hêtit, kon pơlei Jêbus păng kon pơlei Amôrit oei lăm tơring jê̆ kông, kon pơlei Kanaan oei cheng dơsĭ păng rok kiơ̆ đak Krong Jôrđăn.

³⁰ Kalep pơm ăn kơ lu kon pơlei oei hreh 'bơ̆t anăp Môis, na sư khan: Lu bơ̆n athei năm tŏk blah iŏk oei hloi lăm char noh, gô jei lu bơ̆n.

³¹ Mă-lei lu bơngai drŏ-nglo năm hơdai Kalep khan: Lu bơ̆n ưh kơ kĕ năm blah iŏk char 'nâu đơ̆ng lu kon pơlei noh ôh, lu sư pran hloh kơtang hloh kơ lu bơ̆n.

³² 'Bơ̆t anăp lu kon pơlei bơngai Isơrael, lu đe noh roi pơăm tơă khan: Lu kon pơlei oei lăm char mă lu nhôn đei năm chop dăr lăng tơ jơ̆p-jang, char noh luăn sa pơđĭ kon pơlei sư kơdih; lu nhôn 'bôh đĭ lu kon pơlei noh akâu tih kơjung ngăl.

³³ Lu nhôn 'bôh lu sư tih kơjung, noh lu kon sâu Anak, adrĕch bơngai nuih pran kơtang; lu nhôn lăng bơ̆n kơdih rŏ thoi lep 'ba, lu sư lăng lu nhôn kư̆m thoi noh mơ̆n.