Jang 25 - Sơ̆p Hlabơar Nơ̆r 'Bok Kei-Dei

¹ Pêng năr đơ̆ng rŏng kơ Phêtus truh tơ dêh char ei wă pơm kuan tih, sư năm đơ̆ng Pơlei Sêsarê truh tơ Pơlei Jêrusalem.

^2-3 Tơ Pơlei Jêrusalem ei đei lu 'bok soi tih hăm lu kră pơgơ̆r bơngai Juđê roi kơ sư tơdrong lu sư jâu Pôl. Lu sư apinh Phêtus athei lu linh sư chông ba Pôl tơ Pơlei Jêrusalem na lu sư wă răp pơlôch Pôl kơplah oei yak rok trong brŏk tơ Pơlei Jêrusalem. Mă-lei lu sư ưh kơ roi kơ Phêtus ôh tơdrong sư wă pơlôch Pôl.

⁴ Phêtus khan kơ lu sư: “Nhôn tah Pôl tơ hnam phak tơ Pơlei Sêsarê. Mă inh kư̆m ưh kơ mah đunh mơ̆n oei tơ âu; inh kư̆m dah wă brŏk tơ Pơlei Sêsarê.

⁵ Tơdah sư pơm tơdrong kơnê̆ tơpă lei na lu kră pơgơ̆r iĕm gơh năm hơdai hăm inh tơ Pơlei Sêsarê, na pơma jet sư tơ ei dơ̆ng.”

⁶ Phêtus oei tơ Pơlei Jêrusalem oei pă tơsĭn mơjĭt năr dơ̆ng. Klaih kơ noh sư brŏk tơ Pơlei Sêsarê dơ̆ng. Lu kră bơngai Juđê kư̆m kiơ̆ sư mơ̆n. Na năr dơning lu sư mơ̆t tơ hnam sek tơlang tơ Pơlei Sêsarê, na Phêtus athei lu linh chông ba Pôl mơ̆t tơ lăm hnam sek tơlang ei.

⁷ Lăp Pôl truh tơ hnam ei, lu bơngai Juđê đơ̆ng Pơlei Jêrusalem oei tăp dăr kơ sư, na jâu sư lơ tơdrong kơnê̆ tih tơpă, mă-lei lu sư ưh kơ 'bôh Pôl pơm tơdrong kơnê̆ kiơ ôh.

⁸ Na Pôl pơma dŏng kơdih akâu thoi âu: “Inh ưh kơ pơm kơnê̆ kơ tơdrong juăt bơngai Juđê dah hnam akŭm 'Bok Kei-Dei tơm, dah lăm 'bok pơtao tơm Rôm ôh.”

⁹ Na Phêtus wă kơ lu bơngai Juđê lăp đon kơ sư na sư jet Pôl: “Ih hăm wă năm tơ Pơlei Jêrusalem na inh sek tơlang ih tơ ei gah lu tơdrong sư jâu ih hei?”

¹⁰ Pôl khan: “Dang ei inh dơ̆ng 'bơ̆t anăp ih, ih sek tơlang kiơ̆ kơ tơdrong juăt 'bok pơtao tơm Rôm. Ih sek tơdrong inh tơ âu trŏ boih. Ih kư̆m băt mơ̆n inh ưh kơ pơm kơnê̆ kơ lu bơngai Juđê.

¹¹ Tơdah inh pơm kơnê̆ kơ sư lei trŏ kơ inh lôch, inh gơh chu lôch kư̆m bưh. Tơdah lu sư jâu inh ưh kơ đei tơdrong kiơ lei ưh kơ đei bu gơh jao inh tơ lu sư. Na dang ei inh apinh Sêsar, 'bok pơtao tơm bơngai Rôm đĕch sek tơlang tơdrong inh dang ei.”

¹² Na Phêtus pơma dơnuh hăm lu 'bok phŏ sư. Klaih kơ noh sư khan kơ Pôl: “Ih khan ih wă kơ 'bok pơtao tơm bơngai Rôm sek tơlang tơdrong ih lei kư̆m bưh mơ̆n; inh kư̆m ăn kơ ih năm tơ sư.”

Pôl dơ̆ng 'bơ̆t anăp 'bok pơtao Agripa hăm yă Bêrênis

¹³ Đơ̆ng rŏng kơ noh 'bar pêng năr pơtao Agripa hăm oh drŏ-kăn sư, anăn sư ei Bêrênis, năm hơpong tơ Phêtus tơ Pơlei Sêsarê.

¹⁴ Bre sư oei tơ ei kư̆m đunh 'biơ̆ mơ̆n na Phêtus roi kơ pơtao Agripa gah tơdrong Pôl thoi âu: “Hơtai Phêlik pơm kuan tih sơ̆ sư tah minh 'nu bơngai anăn sư Pôl lăm hnam phak tơ âu. Truh dang ei sư oei lăm hnam phak mơ̆n.

¹⁵ Hơtai inh năm tơ Pơlei Jêrusalem ki, lu 'bok soi tih hăm lu kră pơgơ̆r bơngai Juđê roi kơ inh tơdrong lu sư jâu Pôl. Lu sư apinh inh phak hloi Pôl.

¹⁶ Mă-lei inh khan kơ sư lu bơngai Rôm ưh kơ pơm thoi noh ôh. Tơdah jâu bơngai bu, đe athei jâu bơngai ei 'bơ̆t anăp sư hloi hăm ăn kơ sư pơma dih băl. Tơdah tam mă pơma pơjăng dih băl, ưh kơ gơh phak sư ôh.

¹⁷ Na lăp lu bơngai Juđê năm truh tơ âu inh wă sek tơlang tơdrong sư âu hloi. Na năr dơning dơ̆ng inh năm hloi tơ hnam sek tơlang hăm athei lu linh chông ba Pôl tơ lăm ei.

¹⁸ “Na lu bơngai Juđê iung pơma jâu sư, inh ngêh kơ lu sư wă jâu Pôl tơdrong kơnê̆, na ei tă kơ ưh.

¹⁹ Lu sư jâu Pôl gah tơdrong lui lu sư đĕch. Lu sư pơjah hăm Pôl gah tơdrong minh 'nu bơngai lôch boih anăn Sư Yêsu. Pôl khan Sư oei arih.

²⁰ Inh ưh kơ băt thoi yơ dơ̆ng wă kơ inh gơh băt tôm gah tơdrong âu na inh jet Pôl: ‘Ih hăm wă năm tơ Pơlei Jêrusalem dah ưh, wă kơ inh sek tơlang tơ ei gah lu tơdrong sư jâu ih hei?’

²¹ Mă-lei Pôl khan wă gô 'bok pơtao tơm Rôm đĕch sek tơlang tơdrong sư. Na inh athei lu linh oei gak sư truh tơ inh wă athei sư năm tơ 'bok pơtao tơm Rôm.”

²² Pơtao Agripa khan kơ Phêtus: “Inh wă mơ̆ng Pôl pơma mơ̆n.” Phêtus khan: “Năr dơning ih gô mơ̆ng sư pơma.”

²³ Na năr dơning pơtao Agripa hăm yă Bêrênis yak pơyơh akâu kư̆m wang năm mơ̆t tơ hnam đe juăt kơ akŭm. Lu 'bok tih linh hăm lu bơngai pơm tih mơdrŏng lăm Pơlei Sêsarê ei kư̆m mơ̆t lăm hnam ei mơ̆n. Na Phêtus athei lu linh chông ba Pôl mơ̆t tơ lăm ei.

²⁴ Lăp Pôl truh, Phêtus khan: “Ơ pơtao Agripa hăm đĭ-đăng bơngai akŭm tơ âu, bơngai âu đĭ-đăng lu bơngai Juđê jâu sư 'bơ̆t anăp inh tơ Pơlei Jêrusalem hăm tơ pơlei âu mơ̆n. Lu sư pơma hơlen khan ưh kơ trŏ ăn kơ sư arih ôh, athei pơlôch sư đĕch.

²⁵ Na inh apinh đĭ-đăng lu bơngai jâu sư hăm inh apinh akâu sư kơdih mă-lei inh ưh kơ 'bôh sư pơm tơdrong kiơ ôh. Thoi noh na inh ưh kơ gơh ăn đe pơlôch sư. Na Pôl apinh wă năm tơ 'bok pơtao tơm Rôm, wă kơ sư sek ăn tơdrong Pôl. Na inh wă ăn kơ sư năm tơ pơtao Rôm.

²⁶ Inh kư̆m wă chih tơ'bôh kơ 'bok pơtao tơm Rôm hla kơthơ mơ̆n, mă-lei inh ưh kơ băt chih khan kơ sư Pôl pơm tơdrong kơnê̆ kiơ. Ơ pơtao Agripa, inh athei lu linh chông ba sư tơ âu 'bơ̆t anăp ih, hăm 'bơ̆t anăp đĭ-đăng lu bơ̆n mơ̆n, wă kơ bơ̆n apinh pơma gah tơdrong sư, na ăn kơ bơ̆n wă mă băt gah lu đe wă jâu sư tơdrong kiơ.

²⁷ Lơliơ inh gơh athei bơngai bơnă năm tơ 'bok pơtao Rôm mă-lei ưh kơ đei chih tơdrong kiơ đe jâu sư.”