Jang 21 - Sơ̆p Hlabơar Nơ̆r 'Bok Kei-Dei

¹ Đơ̆ng noh nhôn tơklah dih băl đơ̆ng lu sư. Nhôn tŏk thŏng-nan wă năm tơ Pơlei Jêrusalem. Nhôn năm tơpăt hloi truh tơ bŏl đak đe anăn bŏl Kôs. Năr dơning dơ̆ng nhôn truh tơ Pơlei Rôt. Đơ̆ng noh nhôn năm tơ Pơlei Patara.

^2-3 Tơ ei nhôn chă đei minh pôm thŏng-nan nai dơ̆ng wă năm tơ dêh char Phênisi. Na nhôn tŏk thŏng-nan ei năm hloi. Nhôn wă jê̆ truh bŏl Chiprơ na nhôn tơmang 'bôh bŏl ei, nhôn năm brih gah gơal bŏl ei bŏl Chiprơ. Nhôn năm yoh hloi tơ dêh char Siri. Truh tơ Pơlei Tirơ ei boih lăm dêh char Siri nhôn jur đơ̆ng thŏng-nan, yua kơ đe wă tơjur tơmam đơ̆ng thŏng-nan ei.

⁴ Tơ ei nhôn chă lu bơngai lui na nhôn oei păng lu sư minh 'măng giĕng. Yang Bơhngol 'Lơ̆ng tơbăt ăn kơ lu sư Pôl gô đei tơdrong pơmat na lu sư pơma khă Pôl athei lê̆ kơ năm tơ Pơlei Jêrusalem.

⁵ Trŏ năr nhôn wă năm boih na nhôn năm tơ thŏng-nan. Đĭ-đăng lu sư hăm kon akăn sư năm hơdai păng nhôn lĕch đơ̆ng pơlei ei; truh tơ jih đak dơsĭ, nhôn sơtơ̆p kŭl-tăng krao khan kơ 'Bok Kei-Dei.

⁶ Klaih kơ noh nhôn tơklah dih băl. Nhôn tŏk thŏng-nan, na lu sư brŏk tơ hnam sư dơ̆ng.

⁷ Na nhôn năm đơ̆ng Pơlei Tirơ ei truh tơ Pơlei Pôtôlêmơs. Truh tơ ei boih nhôn jur đơ̆ng thŏng-nan năm hơpong tơ lu 'nhŏng oh bơngai lui tơ ei. Nhôn oei hăm sư minh năr.

⁸ Năr dơning dơ̆ng nhôn tŏk thŏng-nan năm đơ̆ng Pơlei Pôtôlêmơs truh tơ Pơlei Sêsarê. Nhôn jur đơ̆ng thŏng-nan năm tơ hnam Philip bơngai bơtho Tơdrong 'Nao 'Lơ̆ng Yêsu Krist. Nhôn oei hơdai hăm sư. Sư lăm tơpơh 'nu bơngai mă lu bơngai lui rơih đơ̆ng Pơlei Jêrusalem sơ̆ wă wei-lăng lu bơngai asong tơmam kơ đe.

⁹ Philip đei puăn 'nu kon drŏ-kăn oei adruh. Lu adruh ei bơtho nơ̆r 'Bok Kei-Dei.

¹⁰ Nhôn oei tơ hnam Philip 'bar pêng năr boih đei minh 'nu bơngai pơtruh nơ̆r đơ̆ng 'Bok Kei-Dei, sư đơ̆ng dêh char Juđê năm tơ Pơlei Sêsarê. Anăn sư Abus.

¹¹ Abus sư năm hơpong tơ nhôn hăm hloch iŏk tơlei tơ̆n Pôl chô̆ hloi jơ̆ng ti sư kơdih. Sư khan: “Yang Bơhngol 'Lơ̆ng tơbăt kơ inh thoi âu: ‘Thoi inh chô̆ jơ̆ng ti inh kơdih âu, lu bơngai Juđê tơ Pơlei Jêrusalem gô chô̆ jơ̆ng ti ih hăm jao ih tơ bơngai nai dêh đe tơmoi.’ ”

¹² Nhôn păng pơlei ei kơtơ̆ng Abus pơma thoi noh na nhôn khan kơ Pôl: “Nhôn găn ih ưh kơ ăn ih năm tơ Pơlei Jêrusalem ôh.”

¹³ Na Pôl khan: “Kơlih kơ kiơ iĕm nhơ̆m hmoi păng lung inh tŭk tơdrong jang inh? Mă lu sư tah inh lăm hnam phak, mă lu sư pơlôch inh, kư̆m bưh, akâu inh kơdih wă pơrơ̆ng năm yua kơ inh jang tơdrong Kră Yang Yêsu Krist.”

¹⁴ Na nhôn khan: “Ih pơma thoi noh nhôn ưh pă gơh tang găn ih dơ̆ng ôh na nhôn gô mơ̆ng kơ 'Bok Kei-Dei đĕch.”

¹⁵ Klaih kơ noh nhôn hơmet tơmam năm tơ Pơlei Jêrusalem.

¹⁶ Kư̆m đei lu bơngai lui đơ̆ng Pơlei Sêsarê năm hơdai hăm nhôn mơ̆n. Lu sư wă năm ba nhôn tơ hnam Masôn. Masôn sư bơngai đơ̆ng dêh char Chiprơ, lui kơ Kră Yang Yêsu đơ̆ng hơdrol sơ̆ hloi. Nhôn wă năm oei tơ hnam sư.

Pôl năm hơpong tơ Yakơ

¹⁷ Lăp nhôn truh tơ Pơlei Jêrusalem boih, lu 'nhŏng oh bơngai lui sơng iŏk lu nhôn, jơhngơ̆m lu sư hiôk chơt tơpă.

¹⁸ Na dơning dơ̆ng Pôl năm hơpong tơ Yakơ. Nhôn kư̆m năm kiơ̆ hơdai sư mơ̆n. Lu kră wei-lăng bơngai lui kư̆m hơdai wang năm akŭm tơ ei.

¹⁹ Pôl kơkuh kơ lu sư păng ră roi kơ lu sư dôm tơdrong 'Bok Kei-Dei tơgŭm lu bơngai tơmoi mă ưh kơ khŭl Juđê kơlih kơ tơdrong jang Pôl.

²⁰ Hlôi sư pơma đang boih na lu sư khan bơnê kơ Kră Yang 'Bok Kei-Dei. Klaih kơ noh lu sư khan kơ Pôl: “Ơ oh, ih băt boih đei dôm rơbâu 'nu bơngai Juđê lui kơ Kră Yang Yêsu boih. Đĭ-đăng lu sư adrin kiơ̆ tơdrong juăt Môis ngăl.

²¹ Lu sư kơtơ̆ng đe jô̆ kơ ih bơtho lu bơngai Juđê tơ dêh đe tơmoi khan ih athei lu sư tŭk đĭ tơdrong juăt Môis păng tŭk tơdrong kăt tơdra akar lu kon sư păng tŭk đĭ dôm tơdrong juăt Juđê mơ̆n.

²² Na dang ei ih wă pơm thoi yơ? Rŏ kơnh dơning pă jor lu bơngai Juđê băt kơ ih truh tơ âu boih.

²³ “Nhôn wă kơ ih pơm thoi âu: Tơ âu đei puăn 'nu bơngai wă pơm keh tơdrong sư pơkă hăm 'Bok Kei-Dei.

²⁴ Na ih athei tơgŭm lu sư hŏ păng pơm kiơ̆ tơdrong juăt wă kơ rơgoh thoi lu sư mơ̆n. Păng ih kư̆m athei apah lu sư jên wă răt tơmam pơyơ̆r kơ 'Bok Kei-Dei. Klaih kơ noh ih apah đe yuă kơ lu sư sŏk 'ngôch kiơ̆ thoi tơdrong juăt Môis. Ih pơm thoi noh na đĭ-đăng bơngai băt kơ ih ưh kơ athei lu bơngai Juđê tŭk tơdrong juăt Môis ôh; păng lu sư băt kơ ih kiơ̆ tơdrong juăt Môis mơ̆n.

²⁵ Gah lu khŭl tơmoi nai lui kơ Kră Yang Yêsu, nhôn chih bơtho kơ lu sư boih khan kơ lu sư kơ̆m kơ sa tơmam đe pơyơ̆r kơ yang kơnê̆, kơ̆m kơ sa pham dôm sem bơ̆n rong dah sem bri; hơdrol kơ bơ̆n wă pơm tơmam sa bơ̆n athei kăt dah 'bet tŭk lê̆ pham sư; păng 'nĕ kơ ngôi pơyô kư̆ kă.”

²⁶ Thoi noh na Pôl chu tơgŭm puăn 'nu bơngai ei. Năr dơning Pôl păng puăn 'nu bơngai ei pơm kiơ̆ tơdrong juăt wă kơ rơgoh. Đơ̆ng noh sư mơ̆t tơ hnam akŭm 'Bok Kei-Dei tơm pơma dơnuh păng đe 'bok soi gah tơdrong giĕng lu sư wă kơtĕch layơ. Gô đang kơ giĕng 'mơ̆i, na 'bok soi wă soi sơmah kơ 'Bok Kei-Dei kơ rim 'nu lu sư.

Đe rôp Pôl tơ hnam akŭm 'Bok Kei-Dei tơm

²⁷ Lăp wă jê̆ tôm tơpơh năr giĕng ei boih, lu bơngai Juđê đơ̆ng dêh char Asi 'bôh Pôl lăm hnam akŭm 'Bok Kei-Dei tơm. Lu sư pơhlŭ lu kon pơlei pơla tơ ei hơdai hil kơ Pôl, na rôp Pôl hloi.

²⁸ Lu sư pơma 'bơ̆r re khan: “Ơ bơngai Isơrael, tơgŭm nhôn 'biơ̆ bĕ. Bơngai âu boih năm jơ̆p-jang kơ teh đak bơtho athei đe hil areh kơ bơngai Isơrael bơ̆n, athei đe tŭk lê̆ tơdrong juăt Môis păng hnam akŭm 'Bok Kei-Dei tơm âu. Na dang ei sư kư̆m anhăk ba bơngai tơmoi khŭl nai lăm hnam akŭm 'Bok Kei-Dei tơm âu, na pơm kơ hnam 'Bok Kei-Dei âu đơ̆ng 'lơ̆ng jing kơnê̆ 'mê̆-'mach.”

²⁹ Lu sư pơma thoi noh yua kơ hơdrol lu sư 'bôh Trôphĭm, bơngai tơmoi đơ̆ng Pơlei Êphêsô năm hơdai păng Pôl lăm Pơlei Jêrusalem ei, na lu sư ngêh kơ Pôl anhăk Trôphĭm mơ̆t lăm hnam akŭm 'Bok Kei-Dei tơm.

³⁰ Đĭ-đăng Pơlei Jêrusalem đơđơu đơđao mao. Lu kon pơlei kơdâu năm tơ ei na rôp dui anhăk Pôl tơ 'ngoaih hnam akŭm 'Bok Kei-Dei tơm, na đe tang 'măng hnam ei hloi.

³¹ Na lu kon pơlei pơla wă pơlôch hloi Pôl ră, mă-lei đei minh 'nu bơngai năm pơtruh tơ 'bok tih linh khan: “Đĭ-đăng lăm Pơlei Jêrusalem dang ei đơđơu đơđao mao.”

³² Na 'bok tih linh ei krao hloi 'bok phŏ iĕ 'biơ̆ kơ sư păng lu linh sư mơ̆n năm tơkan hloi tơ lu đe tơpôl lơ ei. Lăp lu kon pơlei pơla 'bôh 'bok tih linh păng lu linh sư, na lu kon pơlei pơla huay pă teh Pôl dơ̆ng.

³³ 'Bok tih linh năm tơ Pôl athei hloi lu linh rôp chô̆ sư hăm tơlei glang mam 'bar dăng. Na đơ̆ng noh sư jet: “Anăn sư bu 'nâu? Sư pơm tơdrong kiơ?”

³⁴ Lu sư pơma re, mơ'nah khan sư pơm tơdrong 'nâu, lu mơ'nah khan pơm tơdrong nai. Kơlih kơ 'bơ̆r bơngai tơpôl pơma na jing đơđơu đơđao mao, 'bok tih linh ưh kơ băt Pôl pơm tơdrong kiơ. Na sư athei lu linh sư anhăk Pôl mơ̆t tơ kơđông sư.

³⁵ Lăp lu linh anhăk Pôl truh tơ kung kơđông sư boih, na lu linh hiŏng pôk anhăk Pôl mă kơjung yua kơ kon pơlei pơla druh rôp wă pơlôch Pôl.

³⁶ Đĭ-đăng kon pơlei pơla druh lu linh anhăk Pôl ei pơma 'bơ̆r re khan: “Pơlôch sư hŏ. Pơlôch sư hŏ.”

Pôl pơma dŏng akâu kơdih

³⁷ Lăp lu linh wă tơmơ̆t sư lăm kơđông, na Pôl jet 'bok tih linh ei thoi âu: “Inh hăm gơh pơma dơnuh păng ih ưh, 'bok?” Na 'bok tih linh khan kơ sư: “Ô ih kư̆m gơh pơma nơ̆r Grĕk hă?

³⁸ Inh ngêh kơ ih bơngai Êyiptơ chă pơhlŭ đe iung tơblah lu kră pơgơ̆r sơ̆, anhăk puăn-rơbâu 'nu bơngai kơnê̆ tơ char glă.”

³⁹ Pôl khan: “Ưh ôh. Inh bơngai Juđê đơ̆ng Pơlei Tarsơ lăm dêh char Salisia. Pơlei Tarsơ kư̆m tih mơ̆n. Apinh ih asong inh pơma kơ lu kon pơlei pơla.”

⁴⁰ 'Bok tih linh ăn kơ sư pơma, na Pôl dơ̆ng 'bơ̆t kung yơ̆r ti sư wă kơ lu kon pơlei pơla oei thĕng. Lăp lu sư thĕng ưh pă đei pơma boih, na Pôl pơma kơ lu sư hăm nơ̆r Juđê: