Jang 19 - Sơ̆p Hlabơar Nơ̆r 'Bok Kei-Dei

¹ Hơtai Apôlê oei tơ Pơlei Kôrintô tơ dêh char Grĕk, Pôl năm tơ Pơlei Êphêsô. Sư năm trong kông, na truh tơ Pơlei Êphêsô ei boih sư tơ'bơ̆p bơngai lui kơ Yêsu.

² Pôl jet lu bơngai lui ei thoi âu: “Lăp iĕm lui na hăm đei Yang Bơhngol 'Lơ̆ng jur oei hăm lu iĕm?” Na lu bơngai lui khan: “Nhôn ưh tam mă băt Yang Bơhngol 'Lơ̆ng lơliơ.”

³ Pôl jet lu sư dơ̆ng: “Đe pơm kơ iĕm 'batem ayơ?” Lu sư khan: “Đe pơm kơ nhôn 'batem kiơ̆ kơ nơ̆r Yôhan bơtho.”

⁴ Pôl khan gah tơdrong Yôhan sơ̆ thoi âu: “Yôhan pơm 'batem kơ lu bơngai tơbral kơdih tơdrong yoch păng sư bơtho lu bơngai Isơrael athei lu sư lui kơ minh 'nu 'Bok gô truh đơ̆ng rŏng kơ sư, wă khan Yêsu.”

⁵ Lu bơngai Pôl tơ'bơ̆p ei kơtơ̆ng thoi noh na sư iŏk 'batem hăm anăn Kră Yang Yêsu.

⁶ Pôl pel kơ̆l lu sư, na Yang Bơhngol 'Lơ̆ng jur oei hăm lu sư. Lu sư pơma hloi nơ̆r hlĭch păng bơtho tơdrong 'Bok Kei-Dei.

⁷ Lu bơngai lui ei dang mơjĭt-'bar 'nu.

⁸ Kơplah pêng khei Pôl bơtho tơ hnam akŭm bơngai Juđê tơ Pơlei Êphêsô. Sư bơtho đe nuih tơpă. Sư pơjah păng lu đe ei, sư bơtho tơdrong 'Bok Kei-Dei wă pơgơ̆r bơ̆n thoi yơ.

⁹ Mă-lei lu mơ'nah ưh kơ chu lui. Na lu sư pơma kơnê̆ gah tơdrong Kră Yang Yêsu 'bơ̆t anăp lu bơngai akŭm. Na Pôl đơ̆ng lu sư năm akŭm tơ nai. Lu bơngai lui kư̆m akŭm kiơ̆ Pôl mơ̆n. Na rim năr sư bơtho păng pơjah tơ hnam trưng Tiranơ.

¹⁰ Kơplah 'bar sơnăm sư bơtho tơ hnam trưng ei, na đĭ-đăng bơngai oei tơ dêh char Asi mă bơngai Juđê mă lu bơngai nai, kư̆m kơtơ̆ng tơdrong Kră Yang Yêsu mơ̆n.

Yang kơnê̆ teh tơpơh 'nu kon Sewơ

¹¹ 'Bok Kei-Dei ăn kơ Pôl pơm tơdrong mơsêh mơyang hlĭch tơpă.

¹² Bơngai lui iŏk che mu-suar păng kơn đêl Pôl yua kơdih, pơchĕp kơ đe jĭ jăn, na tơdrong jĭ lu sư klaih păng lu yang kơnê̆ lĕch đĭ đơ̆ng akâu lu sư.

^13-14 Tơ ei kư̆m đei lu bơngai Juđê năm jơ̆p-jang tơ lu bơngai ưh kơ lui, mă sư kư̆m ưh kơ lui mơ̆n, wă pơpuh yang kơnê̆ đơ̆ng akâu đe. Sư wă pơm thoi Pôl na lu sư hơdai yua anăn Kră Yang Yêsu wă pơpuh. Đei tơpơh 'nu kon tơdăm Sewơ pơm thoi noh. Sewơ pơm 'bok soi tih bơngai Juđê. Lu sư khan kơ yang kơnê̆ thoi âu: “Pôl bơtho tơdrong Yêsu, na inh yua anăn Yêsu, inh athei e lĕch đơ̆ng bơngai âu.”

¹⁵ Mă-lei bơngai yang kơnê̆ ei khan kơ lu sư: “Inh băt kơ Yêsu păng inh băt kơ Pôl; mă lu iĕm âu inh ưh kơ băt ôh. Iĕm bu?”

¹⁶ Na bơngai yang mơ̆t ei hơloh teh hloi lu đe ei jĭ tơpă. Na lu sư kơdâu tơklah đơ̆ng hnam bơngai yang mơ̆t ei, yua kơ jei bơngai yang mơ̆t ei boih. Ao lu sư tơhek đĭ păng akâu lu sư 'blơ̆n 'blăn pơ'ngeh.

¹⁷ Đĭ-đăng lu bơngai Juđê păng bơngai nai oei tơ Pơlei Êphêsô kơtơ̆ng tơdrong 'noh lu sư hli tơpă na ư-ang kơ Kră Yang Yêsu.

¹⁸ Thoi noh na đei lu bơngai lui ưh kơjăp năm tơ Pôl. Lu sư ră roi kơ Pôl tơdrong yoch lu sư năm tơ pơjâu.

¹⁹ Đei lơ bơngai pơm pơjâu nai dơ̆ng, lu sư năm tơ Pôl chĕp ba sơ̆p hla bơar tơdrong pơjâu sư, na soh lê̆ sơ̆p hla bơar ei 'bơ̆t anăp lu kon pơlei pơla hloi. Đe jô̆ jên răt hla bơar ei sơ̆ đei pơđăm-jĭt rơbâu jên hu.

²⁰ Thoi noh đe 'bôh tơdrong Kră Yang tơlĕch mơsêh mơyang sư kơtang tơpă, na lơ bơngai kơtơ̆ng tơdrong noh na lui hloi kơ Kră Yang Yêsu Krist.

Đei tơdrong truh kơ lu bơngai lui tơ Pơlei Êphêsô

²¹ Đơ̆ng rŏng kơ noh dơ̆ng Pôl khan wă năm tơ dêh char Masêđôn păng dêh char Grĕk, klaih kơ noh wă năm tơ Pơlei Jêrusalem dơ̆ng, yua kơ Yang Bơhngol 'Lơ̆ng athei sư năm. Sư khan đơ̆ng rŏng kơ noh kư̆m khan wă năm tơ Pơlei Rôm mơ̆n.

²² Na sư wơh 'bar 'nu buăl sư Timôthê păng Êrat năm tơ dêh char Masêđôn hơdrol kơ sư. Na đơ̆ng ei Pôl oei tơ char Asi đunh 'biơ̆ dơ̆ng.

²³ Hơtai ei đei tơdrong truh kơ lu bơngai lui kơ Yêsu tơ Pơlei Êphêsô.

²⁴ Minh 'nu bơngai pơm tơmam hu, anăn sư Đêmêtrơs, oei tơ Pơlei Êphêsô. Sư pơm hnam yang iĕ păng hu lei-lăi kơ hnam yang tih mơ̆n yang Dian. Sư pơm tĕch hnam ei lơ tơpă păng đei lơ jên, hăm lu bơngai jang kơ sư sa jên kư̆m lơ.

²⁵ Đêmêtrơs krao akŭm đĭ lu bơngai jang kơ sư păng lu bơngai nai jang tơdrong lei-lăi thoi lu sư mơ̆n. Sư khan: “Ơ đe 'nhŏng oh, iĕm băt boih bơ̆n sa jên lơ âu dang ei yua kơ tơdrong jang bơ̆n đei lơi tơpă.

²⁶ Mă-lei iĕm 'bôh păng kơtơ̆ng tơdrong Pôl pơm. Sư pơgŏ đe lui ưh kơ trŏ, sư khan lu yang bơngai pơm ưh kơ sĭ yang tơpă ôh, yang pơm đĕch. Na đei lơ bơngai tơpă lui kơ sư bơtho tơ Pơlei Êphêsô păng wă jê̆ jơ̆p tơ dêh char Asi mơ̆n.

²⁷ Na bơ̆n athei kơchăng hli kơ đe jô̆ kơ tơdrong jang bơ̆n ưh kơ 'lơ̆ng păng hnam kơkuh kơ yang Dian bơ̆n, yang tih tơpă ră, kơnh đe khan jing ưh kơ gĭt. Dang ei đĭ-đăng bơngai dêh char Asi păng jơ̆p kơ teh đak lui kơkuh kơ yang Dian, yang tih tơpă. Na ning-mônh hli kơ đe ưh pă ư-ang kơ yang Dian bơ̆n dơ̆ng.”

²⁸ Lăp lu sư kơtơ̆ng thoi noh lu sư areh kơ Pôl tơpă. Lu sư pơma re thoi âu: “Ư-ang kơ yang Dian yang khŭl bơngai Êphêsô.”

²⁹ Na đĭ-đăng kon pơlei pơla kơtơ̆ng tơdrong noh, lu sư kư̆m hil areh mơ̆n. Na sư krao pơret dih băl wă kơ đe pơlei năm tơkan tơ sư. Na lu sư năm rôp 'bar 'nu buăl Pôl, anăn bre sư Guơs păng Aritak. Bre sư bơngai đơ̆ng dêh char Masêđôn. Lu kon pơlei pơla chông ba bre sư tơ hnam akŭm đe kon pơlei juăt sek tơlang tơdrong bơngai.

³⁰ Pôl wă năm pơma 'bơ̆t anăp đe kon pơlei pơla ră mă-lei lu bơngai lui gah bơ̆n ưh kơ ăn.

³¹ Kư̆m đei 'bar pêng 'nu kră pơgơ̆r dêh char Asi buăl juăt Pôl. Lu sư pơtruh kơ Pôl khan: “Ih 'nĕ kơ mơ̆t lăm hnam akŭm đe noh.”

³² Lăm hnam đe ei đe pơma đơđơu đơđao mao. Đei lu mơ'nah pơma re tơdrong 'nâu, lu mơ'nah tơdrong nai, yua kơ lu sư ưh kơ băt akŭm tơdrong kiơ.

³³ Lu bơngai Juđê tơ pơlei ei mơ̆n, sư athei minh 'nu bơngai bôl sư, Aleksandrê, năm dơ̆ng 'bơ̆t anăp kon pơlei pơla wă pơma dŏng lu sư. Na lu bơngai Êphêsô mơ'nah ngêh kơ Aleksandrê boih bơngai đe wă sek tơlang. Na Aleksandrê yơ̆r ti sư wă kơ đe thĕng huay pă pơma. Sư wă pơma dŏng lu bơngai Juđê ră.

³⁴ Lăp lu bơngai Pơlei Êphêsô kơnăl kơ sư bơngai Juđê mơ̆n, na lu sư rai pơma re khan: “Ư-ang kơ yang Dian yang khŭl bơngai Êphêsô bơ̆n.” Lu sư pơma ư-ang kơ yang sư thoi noh khŏm khŏm lăm 'bar jơ.

³⁵ Đơ̆ng rŏng 'bar jơ ei truh tơ minh 'nu kră pơlei mah khă lu kon pơlei pơla pơma. Sư khan: “Ơ lu bơngai Êphêsô, đĭ-đăng bơngai băt Pơlei Êphêsô wei-lăng hnam yang Dian yang tih tơpă păng wei-lăng yang tơmo Dian huŏng đơ̆ng plĕnh.

³⁶ Ưh kơ đei bu khan kơ bơ̆n hơlĕnh ôh. Tơdrong noh tơpă yơh, na dang ei iĕm thĕng bĕ. 'Nĕ pơm tơdrong kư̆ kă kơ lu bơngai âu dơ̆ng.

³⁷ Lu bơngai âu ưh kơ đei tơtông klĕ tơmam đơ̆ng hnam yang ôh păng ưh kơ đei pơma kơnê̆ kơ yang bơ̆n, mă-lei iĕm khŏm chông ba sư tơ âu.

³⁸ Bơ̆n đei lu kră sek tơlang păng hnam sek tơlang mơ̆n. Tơdah Đêmêtrơs păng lu bơngai jang kơ sư wă jâu bu, lu sư athei năm tơ lu kră sek tơlang.

³⁹ Mă-lei dah iĕm wă pơma apinh tơdrong nai dơ̆ng, iĕm athei gô trŏ năr lu kră pơgơ̆r krao akŭm iĕm.

⁴⁰ Bơ̆n akŭm năr âu kư̆ kă đĕch, ưh kơ trŏ năr sư pơkă ôh. Na bơ̆n hli kơ lu kră pơgơ̆r ngêh kơ bơ̆n jâu sư khan bơ̆n wă pơm kơnê̆ kơ sư. Dah lu sư jâu bơ̆n tơpă, bơ̆n ưh kơ gơh drơ̆ng sư thoi yơ.”

⁴¹ Đơ̆ng rŏng kơ sư pơma thoi noh, na 'bok ei athei lu kon pơlei pơla wih brŏk tơ hnam sư kơdih kơdih.