Jang 17 - Sơ̆p Hlabơar Nơ̆r 'Bok Kei-Dei

¹ Bre Pôl păng Silas năm drong tơ Pơlei Amphi păng Pơlei Apơlê, na truh tơ Pơlei Têsalônik. Tơ ei đei hnam akŭm đe Juđê.

² Tơ rim pơlei Pôl năm akŭm tơ hnam akŭm đe Juđê mơ̆n păng Pơlei Têsalônik lei-lăi mơ̆n. Sư akŭm păng đe rim năr pơdơh lăm pêng 'măng giĕng. Sư bơtho đơ̆ng lăm sơ̆p hla bơar 'Bok Kei-Dei păng pơjah hăm lu sư.

³ Sư tơblang tơdrong lu bơngai khan lê̆ hơdrol gah 'Bok Krist khan 'Bok Krist kơplah Sư oei ala teh Sư wă lôch iung arih dơ̆ng. Sư khan: “Inh bơtho ăn kơ iĕm tơdrong Yêsu. Yêsu boih 'Bok Krist mă 'Bok Kei-Dei ăn wă pơgơ̆r bơ̆n.”

⁴ Lăm lu bơngai Juđê đei lu mơ'nah lui kơ tơdrong Pôl bơtho na lu sư pôm đon păng bre Pôl păng Silas. Lơ bơngai Grĕk mă lui kơ tơdrong 'Bok Kei-Dei đơ̆ng sơ̆ păng lơ bơngai drŏ-kăn mă đei đon kư̆m lui kơ Yêsu mơ̆n.

⁵ Lu bơngai Juđê mơ'nah ưh kơ lui, lu sư 'nhĕng bre Pôl păng Silas. Na lu sư năm krao pơhlŭ lu bơngai pơm kơnê̆ kơ đe. Lu bơngai pơm kơnê̆ ei lăm pơlei sư mơ̆n na lu bơngai pơm kơnê̆ kơ đe ei pơtrŭt lu kon pơlei pơla năm bơwang hnam Jason wă chă bre Pôl păng Silas, wă dui anhăk ba tơ'bơ̆p 'bơ̆t anăp kon pơlei pơla.

^6-7 Mă-lei lu sư chă bre Pôl păng Silas ưh kơ 'bôh. Thoi noh na sư rôp anhăk Jason păng lu bơngai lui nai mơ̆n, anhăk lu sư tơ kră pơlei. Sư pơma pơret khan kơ lu đe Jason ei khan: “Lu khŭl bơngai âu pơm kơnê̆ jơ̆p kơ teh đak. Dang ei lu sư năm tơ pơlei bơ̆n âu boih păng Jason âu ăn kơ lu sư oei tơ hnam sư. Đĭ-đăng lu sư ưh kơ kiơ̆ tơdrong juăt pơtao bơ̆n ôh. Lu sư khan sư đei minh 'nu pơtao nai, anăn Sư Yêsu.”

⁸ Lăp lu kon pơlei pơla păng lu kră pơlei kơtơ̆ng thoi noh, lu sư pơma re đơđơu đơđao mao.

⁹ Lu kră pơlei athei Jason păng lu buăl bơngai lui, lu sư duh jên na gơh tơlĕch lu sư. Na lu sư chu duh kơ lu kră pơlei jên na kră pơlei achăng lê̆ lu sư.

Bre Pôl păng Silas bơtho tơ Pơlei Bêrê

¹⁰ Truh 'năr mơ̆t boih, lu bơngai lui athei bre Pôl păng Silas năm tơ Pơlei Bêrê. Lăp truh tơ pơlei ei na bre sư năm akŭm tơ hnam akŭm bơngai Juđê.

¹¹ Lu bơngai Pơlei Bêrê ưh kơ sĭ thoi bơngai Pơlei Têsalônik ôh. Lu sư wă mơ̆ng kơchăng tơpă. Rim năr lu sư lăng sơ̆p hla bơar 'Bok Kei-Dei wă kơ băt tơdrong Pôl bơtho tơpă dah ưh.

¹² Thoi noh na lăm lu bơngai Juđê tơ ei đei lơ bơngai lui kơ Yêsu. Kư̆m đei lơ bơngai drŏ-kăn sư bơngai Grĕk, sư hơgei păng mơdrŏng păng lơ bơngai Grĕk drŏ-nglo kư̆m lui mơ̆n.

¹³ Lu bơngai Juđê đơ̆ng Pơlei Têsalônik kơtơ̆ng ang tơdrong Pôl bơtho tơdrong 'Bok Kei-Dei tơ Pơlei Bêrê, na lu sư năm tơ ei pơhlŭ lu kon pơlei pơla wă pơm kơnê̆ kơ bre sư.

¹⁴ Na lu bơngai lui athei hloi Pôl năm tơ jih đak dơsĭ. Na bre Silas păng Timôthê oei kơtă 'bơ̆t Pơlei Bêrê ei, ưh kơ năm ôh.

¹⁵ Đei lu bơngai lui năm ba Pôl truh tơ Pơlei Aten. Na đơ̆ng noh lu bơngai lui ei brŏk dơ̆ng tơ Pơlei Bêrê, pơtruh nơ̆r Pôl athei bre Silas păng Timôthê năm hloi tơ sư.

Pôl bơtho tơ Pơlei Aten

¹⁶ Hơtai Pôl oei chang gô bre Silas păng Timôthê tơ Pơlei Aten ei, sư sơ'ngon dêh yua kơ sư 'bôh Pơlei Aten ei lơ pơm rup yang tơpă.

¹⁷ Na Pôl bơtho lu bơngai Juđê păng lu bơngai nai mă lui kơ 'Bok Kei-Dei tơ hnam akŭm bơngai Juđê wă kơ lu sư lui kơ Yêsu. Pôl kư̆m bơtho lu kon pơlei pơla tơ kơchơ mơ̆n.

¹⁸ Đei lu 'bok thây bơtho tơdrong Êpikur păng lu 'bok thây bơtho tơdrong Sơtôk kư̆m pơjah păng Pôl mơ̆n. Đei bơngai mơ'nah khan kơ Pôl: “Bơngai 'bơ̆r đon kư̆ kă đĕch âu. Sư wă pơma tơdrong kiơ ră âu? Bơ̆n ưh kơ hlôh ôh iih?” Đei mơ'nah khan dơ̆ng: “Rŏ lăng sư bơtho tơdrong lu yang đe nai đĕch âu.” Lu sư pơma khan kơ Pôl thoi noh yua kơ Pôl bơtho sư gah tơdrong Yêsu lôch iung arih dơ̆ng.

¹⁹ Na lu sư anhăk Pôl truh tơ kră pơlei tơ kông Arêpa. Kông ei kơtă lăm pơlei sư hloi. Păng nơ̆r sư khan: “Nhôn wă kơ băt gah tơdrong 'nao ih bơtho.

²⁰ Nhôn đơ̆ng sơ̆ khơ̆ dang ei ưh tam kơtơ̆ng tơdrong ih bơtho âu ôh, na nhôn wă kơ băt dang ei.”

²¹ Lu sư pơma thoi noh yua kơ đĭ-đăng lu bơngai Pơlei Aten păng lu bơngai tơmoi oei tơ pơlei ei mơ̆n, lu sư ling-lang wă răp mơ̆ng tơdrong 'nao đe bơtho, mơ'nah bơtho tơdrong kiơ, mơ'nah bơtho tơdrong kiơ.

²² Pôl dơ̆ng 'bơ̆t anăp kră pơlei tơ kông Arêpa păng khan thoi âu: “Ơ Pơlei Aten, inh 'bôh iĕm kơkuh kơ rup yang lơ tơpă.

²³ Hơtai inh brŏk năm chă lăng pơlei iĕm, inh 'bôh lu anih iĕm kơkuh kơ yang păng inh 'bôh minh anih iĕm chih thoi âu: ‘Anih âu bơ̆n kơkuh kơ yang bơ̆n ưh tam kơnăl.’ Yang iĕm kơkuh noh iĕm khan ưh tam kơnăl, mă yang noh boih inh bơtho kơ iĕm dang ei.

²⁴ 'Bok Kei-Dei pơjing plĕnh teh păng đĭ-đăng sem tơmam oei lăm teh đak. Sư pơgơ̆r plĕnh teh, na Sư ưh kơ oei lăm hnam bơngai pơm ôh.

²⁵ Kră Yang 'Bok Kei-Dei ưh kơ kăl kơ bơ̆n tơgŭm Sư ôh yua kơ Sư boih ăn kơ bơ̆n arih păng ăn kơ bơ̆n đĭ-đăng tơmam bơ̆n kăl yua.

²⁶ 'Bok Kei-Dei pơjing đơ̆ng minh 'nu bơngai, mă-lei Sư pơjing kơ đĭ-đăng khŭl bơngai wă kơ bơngai bơ̆n oei jơ̆p kơ teh đak. Sư ată khŭl bơngai mơ'nah pơgơ̆r đunh dang yơ. Teh đak bơ̆n oei Sư kư̆m asong mơ̆n.

²⁷ “'Bok Kei-Dei pơm thoi noh wă kơ đĭ-đăng kon bơngai gơh chă Sư păng lui kơ Sư. 'Bok Kei-Dei ưh kơ ataih đơ̆ng bơ̆n ôh.

²⁸ Tơdrong noh 'bok thây iĕm kư̆m chih mơ̆n sơ̆ khan: ‘'Bok Kei-Dei ăn kơ bơ̆n gơh arih gơh bơ̆jang.’ 'Bok thây iĕm kư̆m chih thoi âu: ‘Bơ̆n kư̆m kon 'Bok Kei-Dei mơ̆n.’

²⁹ “Iĕm pơm rup yang phŏ păng maih, dah hu, dah păng tơmo. Iĕm pơm rup yang kiơ̆ kơ iĕm tơchĕng đon iĕm kơdih đĕch. Mă-lei 'Bok Kei-Dei pơjing bơ̆n kon Sư, na bơ̆n 'nĕ tơchĕng 'Bok Kei-Dei thoi lĕ rup yang đĕch ôh.

³⁰ Sơ̆ Kră Yang 'Bok Kei-Dei huay kơ jô̆ kơ kon bơngai yua kơ kon bơngai ưh kơ băt kơ Sư. Mă-lei dang ei Sư athei đĭ-đăng bơngai jơ̆p kơ teh đak tơbral dôm tơdrong yoch sư kơdih,

³¹ yua kơ Sư pơkă năr boih wă kơ sek tơlang tơpăt kơ đĭ-đăng kon bơngai jơ̆p kơ teh đak. Sư rơih minh 'nu bơngai wă sek tơlang tơgŭm 'Bă Sư boih. Bơngai sek tơlang ei, anăn Sư Yêsu Krist. 'Bă Sư ăn kơ Sư lôch iung arih wă tơbăt kơ đĭ-đăng bơngai Yêsu gô sek tơlang kon bơngai tơpă.”

³² Lăp lu bơngai Aten kơtơ̆ng Pôl bơtho thoi noh gah bơngai lôch iung arih noh, lu mơ'nah hiĕk kơ sư. Mă-lei đei lu mơ'nah khan kơ sư thoi âu: “Gô layơ dơ̆ng nhôn mơ̆ng ih bơtho tơdrong âu.”

³³ Na Pôl lĕch hloi đơ̆ng anih sư bơtho ei tơ 'ngoaih.

³⁴ Mă-lei kư̆m đei lu mơ'nah lui kơ Yêsu. Lăm lu sư lui ei đei Đenis. Sư bơngai kră pơlei khŭl sek tơlang tơ kông Arêpa ei păng yă Đamar. Păng lu bơngai nai dơ̆ng kư̆m lui.