Jang 12 - Sơ̆p Hlabơar Nơ̆r 'Bok Kei-Dei

¹ Hơtai ei pơtao Hêrôt rôp lu bơngai lui kơ Yêsu mơ'nah wă kơ pơrăm lu sư.

² Na sư koh pơlôch Yakơ 'nhŏng kơ Yôhan.

³ Hêrôt 'bôh đe 'bok tih Juđê lăp đon tơpă, na lăp đe Juđê pơm giĕng sa 'Bĕng Mi Ưh Kơ Đei 'Buih Pông, Hêrôt rôp Pêtrôs.

⁴ Hêrôt tah Pêtrôs lăm hnam phak. Sư ăn kơ mơjĭt-tơdrâu 'nu linh gak Pêtrôs. Đang kơ giĕng boih Hêrôt wă pơlôch Pêtrôs 'bơ̆t anăp đe Juđê ră.

⁵ Hơtai Pêtrôs oei lăm hnam phak, na lu bơngai lui kơ Yêsu krao khan ling-lang kơ 'Bok Kei-Dei hăm đĭ jơhngơ̆m apinh Sư tơgŭm Pêtrôs wă kơ gơh lĕch.

'Bok Kei-Dei tơlĕch Pêtrôs đơ̆ng hnam phak

⁶ Na truh măng ei tơ lăm hnam phak noh đe oei chô̆ Pêtrôs păng tơlei glang mam 'bar dăng. Sư oei tep đei linh gak, minh 'nu gah 'ma minh 'nu gah 'ngiĕo. Tơ 'măng hnam ei kư̆m đei linh gak mơ̆n. Pơtao Hêrôt athei lu linh gô pơgê dơning tơlĕch sư yua kơ 'bok pơtao wă pơlôch sư boih.

⁷ Mă-lei lăm hnam ei đei hloi ŭnh hơdah, linh jang 'lơ̆ng 'Bok Kei-Dei năm wă tơlĕch Pêtrôs. Linh jang 'lơ̆ng 'Bok Kei-Dei pel 'bơ̆t sơngiĕng păng râu Pêtrôs, khan hloi: “Iung mă kuăng wăi.” Na tơlei glang đêl đe chô̆ ti Pêtrôs ei tơyaih hloi.

⁸ Đơ̆ng noh na linh jang khan kơ sư: “Hrŭk ao 'bot chơkhŏ ih wăi.” Na Pêtrôs hrŭk ao 'bot chơkhŏ sư hloi. “Păng asu khăn ih kiơ̆ inh.”

⁹ Na Pêtrôs asu khăn sư, iung yak kiơ̆ linh jang 'lơ̆ng tơ 'ngoaih hloi. Mă-lei Pêtrôs khan nhen lĕ apo đĕch.

¹⁰ Na bre sư lĕch 'bar tăl dur đei linh gak mă ưh kơ đei 'măng ôh. Truh tơ dur mă pêng đei 'măng săt mam, mă-lei 'măng săt mam ei tơpơih kơdih. Na bre sư lĕch hloi tơ 'ngoaih. Linh jang 'lơ̆ng năm ba sư truh tơ trong tơklah, na bre sư tơklah dih băl.

¹¹ “Ơ tơpă boih, inh băt kơ 'Bok Kei-Dei wơh linh jang 'lơ̆ng Sư jur tơdŏng inh đơ̆ng 'bok pơtao Hêrôt păng lu bơngai Juđê wă pơlôch inh.”

¹² Đơ̆ng rŏng kơ sư tơchĕng boih, sư năm tơ hnam Mari mĕ Yôhan. Yôhan noh đe kư̆m anăn sư Markôs. Tơ ei đei lơ bơngai oei akŭm krao khan.

¹³ Sư truh tơ hnam boih na sư dơdŭ 'măng. Đơ̆ng ei na đei minh 'nu adruh wă năm pơih 'măng.

¹⁴ Na adruh ei kơtơ̆ng 'bơ̆r Pêtrôs, sư hiôk jơhngơ̆m sư tơpă jing pă yĕng pơih 'măng dơ̆ng. Duch adruh ei anăn sư Rơđa, sư năm tơkan khan kơ buăl sư tơ lăm hnam ei dơ̆ng.

¹⁵ Mă-lei lu buăl sư lăm hnam ei ưh kơ lui. Lu sư khan kơ duch adruh ei khan: “Băt ih wơnh boih ih âu.” Mă-lei duch adruh ei khan tơpă. Na lu buăl sư khan: “Đei linh jang 'lơ̆ng mă wei-lăng sư đĕch, ưh kơ 'blep kơ Pêtrôs kơlĕ.”

¹⁶ Mă-lei Pêtrôs oei dơdŭ 'măng khŏm khŏm, na đe năm pơih 'măng, na 'blep kơ Pêtrôs tơpă. Đĭ-đăng lu sư sơleng kơ đon ưh kơ băt tơchĕng thoi yơ dơ̆ng. Lu sư pơma re đơđơu đơđao.

¹⁷ Na Pêtrôs yơ̆r ti khă lu sư pơma, na oei thĕng huay pă pơma boih. Na Pêtrôs roi kơ lu bơngai oei lăm hnam ei kơ tơdrong 'Bok Kei-Dei tơlĕch sư. Pêtrôs athei lu bơngai oei lăm hnam ei năm khan kơ 'bok Yakơ păng lu bơngai lui wă roi tơdrong sư lĕch. Đang kơ sư roi tơdrong ei Pêtrôs jăk oei tơ nai dơ̆ng.

¹⁸ Truh pơgê dơning lu linh hli kơ Pêtrôs lĕch boih. Lu sư krao pơret dih băl wă chă Pêtrôs.

¹⁹ Pơtao Hêrôt athei lu linh chă mă 'bôh, mă lu linh chă ưh kơ 'bôh ôh. Na pơtao Hêrôt rôp linh ei sek tơlang. Đơ̆ng noh đei nơ̆r pơtao Hêrôt athei tơduă linh bôl sư pơlôch mă linh gak ưh kơ 'lơ'lŏ ei. Klaih kơ noh pơtao Hêrôt năm đơ̆ng char Juđê tơ Pơlei Sêsarê. Tơ noh sư wă oei đunh 'biơ̆ mơ̆n.

Pơtao Hêrôt lôch kơ hơmơng sa

²⁰ Pơtao Hêrôt đơ̆ng sơ̆ boih sư oei ơh kơ lu bơngai Pơlei Tirơ păng lu Pơlei Siđôn. Na lu bơngai ei năm tơ sư. Lu sư pơlung Blastơ tơgŭm lu sư na sư khan wă tơgŭm mơ̆n. Sư bơngai wei-lăng hnam pơtao Hêrôt. Lu sư wă kơ Hêrôt hiôk păng sư yua kơ lu sư wă năm răt tơmam sa ling-lang đơ̆ng dêh pơtao Hêrôt pơgơ̆r, yua kơ tơmam sa lăm pơlei sư ưh kơ gan mah.

²¹ Thoi noh na Hêrôt pơkă kơ lu sư năr wă kơ lu sư gơh năm tơ sư. Na truh năr pơkă ei Hêrôt hrŭk ao pơtao sư păng sư oei tơ tang-dŏ 'lơ̆ng rŏ sư. Sư pơma kơ lu kon pơlei pơla.

²² Na lu kon pơlei pơla ôr pơret drơ̆ng tơwih sư: “Nơ̆r âu yang pơma, ưh kơ sĭ bơngai pơma ôh.”

²³ Linh jang 'lơ̆ng Kră Yang pơm hloi kơ pơtao Hêrôt đei tơdrong jĭ, kơlih kơ sư ưh kơ ư-ang kơ 'Bok Kei-Dei ôh. Sư lăp đon kơ đe ư-ang kơ sư khan yang. Na sư lôch kơ hơmơng sa.

²⁴ Mă-lei kơplah ei đe bơtho nơ̆r 'Bok Kei-Dei, rai đunh rai jơ̆p păng đei lơ bơngai lui kơ Kră Yang Yêsu.

²⁵ Gah bre 'Barna'ba păng Sôl dơ̆ng, bre sư ăn jên kơ kră pơgơ̆r lu bơngai lui boih, na bre sư đơ̆ng Pơlei Jêrusalem brŏk tơ Pơlei Antiôs. Bre sư kư̆m anhăk ba minh 'nu bơngai măt sư 'bar anăn, Yôhan Markôs.