I Tim 3 - Sơ̆p Hlabơar Nơ̆r 'Bok Kei-Dei

^1-2 Tơdrong đe bơtho âu sĭt tơpă: Tơdrong jang kră wei-lăng lu bơngai lui lăm hnam akŭm, tơdrong jang noh kăl tơpă. Bơngai bu 'maih jang tơdrong 'noh sư chă tơdrong jang 'lơ̆ng tơpă. Thoi noh bơ̆n athei rơih chă lu bơngai thoi âu wă wei-lăng bơngai lui: Bơngai bu đe ưh kơ lah layơ bâu roi sư, sư iŏk akăn minh 'nu đĕch, sư bơngai hơdrăl ling-lang păng ưh kơ pơm kư̆ kă. Sư bơngai dim, năr tơmoi truh sư tơkan sơng iŏk atŏk tơ hnam sư. Sư hơgei bơtho tơdrong 'Bok Kei-Dei.

³ Sư ưh kơ lah suai sik păng ưh kơ tôn teh đe. Sư bơngai dim khôn tơpă ưh kơ wă pơjah pơjăng păng đe. Sư ưh kơ hăt sa jên lơ ôh.

⁴ Sư pơgơ̆r hnam dơnŏ sư gơh tơpă na hnam dơnŏ sư, kon akăn sư chu yom.

⁵ Tơdah sư ưh kơ gơh pơgơ̆r hnam dơnŏ kon akăn sư, thoi yơ sư gơh wei-lăng kon 'Bok Kei-Dei lĕ?

⁶ Bơngai bu 'nao lui sư ưh kơ gơh wei-lăng bơngai lui ôh, hli kơ sư pơang akâu kơdih, na 'Bok Kei-Dei phak sư kư̆m thoi phak yang Satan sơ̆ mơ̆n.

⁷ Dah sư pơm 'lơ̆ng hơdrol, mă bơngai lui, mă bơngai ưh kơ lui jô̆ sư bơngai 'lơ̆ng tơpăt ngăl. Dah sư bơngai ưh kơ tơpăt, sĭt đe bâu roi sư tơpă păng pă jor sư gô pơm thoi yang Satan wă.

Bơngai lui jang lăm hnam 'Bok Kei-Dei

⁸ Dah bơngai lui wă jang lăm hnam 'Bok Kei-Dei, sư athei pơm mă 'lơ̆ng tơpăt adrol 'mơ̆i, ưh kơ et sik suai, ưh kơ hăt sa jên lơ păng trŏ tơdrong sư jang sư 'nĕ kơ pơgŏ iŏk jên đe.

⁹ Sư athei lui kiơ̆ tơdrong 'Bok Kei-Dei mă tơpă.

¹⁰ Iĕm athei pơlong lăng sư 'mơ̆i. Dah sư jang 'lơ̆ng na iĕm ăn kơ sư jang ling-lang.

¹¹ Lu bơngai drŏ-kăn wă jang lăm hnam 'Bok Kei-Dei, sư kư̆m athei pơm mă 'lơ̆ng tơpăt mơ̆n; 'nĕ kơ pơma plĕch kơ đe, 'nĕ kơ et sik suai. Sư athei pơm tôm tơdrong 'lơ̆ng tơpăt ngăl.

¹² Lu bơngai drŏ-nglo lei-lăi mơ̆n dah sư wă jang lăm hnam 'Bok Kei-Dei. Sư athei iŏk akăn minh đĕch păng athei pơgơ̆r hnam dơnŏ sư mă 'lơ̆ng.

¹³ Lu bơngai jang 'lơ̆ng lăm hnam 'Bok Kei-Dei, sư lui kơjăp tơpă kơ Kră Yang Yêsu Krist ưh kơ hli kơ đe păng đe gô ngơnh kơ sư hơgei.

Tơdrong lui bơ̆n răk đon thoi âu

¹⁴ Inh chih kơ ih kơthơ âu, mă-lei ưh kơ đunh mơ̆n inh wă năm ngôi tơ ih.

¹⁵ Dah inh ưh kơ yĕng năm, inh chih kơthơ âu boih wă kơ ih băt bơ̆n 'nhŏng oh bơngai lui wă pơm thoi yơ lăm hnam 'Bok Kei-Dei. Bơ̆n bơngai lui jing kon Kră Yang 'Bok Kei-Dei. Sư boih arih ling-lang ưh kơ đei layơ lôch, na lu bơ̆n bơngai lui mă răk tơdrong 'Bok Kei-Dei kơjăp, trŏ kơ bơ̆n bơtho tơdrong Sư kơ đe nai dơ̆ng.

¹⁶ Tơdrong lui bơ̆n tih hloh tơpă: Kră Yang jur jing bơngai, Yang Bơhngol 'Lơ̆ng tơbăt kơ đe Sư bơngai 'lơ̆ng tơpăt. Lu linh jang 'lơ̆ng kư̆m 'bôh Sư mơ̆n. Na lu bơngai lui kơ Sư bơtho tơdrong Sư tơ teh đak đe. Đei lơ bơngai lui kơ Sư tơ ala teh âu, klaih kơ noh 'Bok Kei-Dei atŏk Sư tơ Pơlei 'Lơ̆ng Sư.