II Tes 3 - Sơ̆p Hlabơar Nơ̆r 'Bok Kei-Dei

¹ Ơ lu 'nhŏng oh, tơdrong âu dơ̆ng: Lu iĕm krao khan kơ 'Bok Kei-Dei tơgŭm nhôn 'biơ̆ hŏ, wă kơ lu nhôn gơh bơtho tơdrong Kră Yang Yêsu Krist jơ̆p-jang, wă kơ lơ bơngai lui hăm băt ư-ang tơdrong 'nao 'lơ̆ng Sư, kư̆m thoi iĕm ư-ang tơdrong Sư dang ei mơ̆n.

² Păng iĕm krao khan apinh 'Bok Kei-Dei tơgŭm nhôn wă kơ lu bơngai kơnê̆ huay kơ pơm kơnê̆ kơ lu nhôn, kơlih kơ đei lơ bơngai ưh kơ wă lui kơ Kră Yang Yêsu Krist.

³ Kră Yang bơ̆n pơm trŏ thoi Sư pơkă tơpă. Sư tơgŭm iĕm ling-lang. Sư ăn kơ iĕm lui kơ Sư kơjăp, Sư kuă ăn yang Satan pơrăm iĕm.

⁴ Nhôn băt kơ Sư tơgŭm iĕm ling-lang. Kơlih thoi noh na nhôn băt kơ iĕm dang ei pơm trŏ thoi nhôn pơkă tơpă păng iĕm gô pơm trŏ kiơ̆ kơ nhôn pơkă khŏm khŏm đơ̆ng sơ̆ khơ̆ ning-mônh.

⁵ Nhôn krao khan kơ Sư apinh Sư ăn kơ iĕm đei đon 'mêm kơ 'Bok Kei-Dei păng apinh Sư ăn kơ iĕm adrin lui kơjăp lăm dôm tơdrong pơmat-tat kư̆m thoi Kră Yang Yêsu Krist adrin hơtai Sư oei tơ ala teh âu sơ̆ mơ̆n.

Pôl bơtho bơngai lui wă kơ jang pơnam

⁶ Ơ lu 'nhŏng oh, Kră Yang bơ̆n Yêsu Krist wă kơ nhôn bơtho iĕm thoi âu: Iĕm athei weh ataih đơ̆ng lu 'nhŏng oh lui mơ̆n mă sư alah kơ jang. Nhôn kư̆m bơtho sư mơ̆n ki, athei sư jang pơnam 'nĕ kơ alah. Mă-lei dang ei sư oei alah 'mơ̆i.

⁷ Iĕm kư̆m băt mơ̆n, iĕm athei jang pơnam thoi nhôn, nhôn ưh kơ wă alah ôh. Hơtai nhôn oei hăm lu iĕm ki, nhôn jang kơtang tơpă.

⁸ Hơtai ki nhôn ưh kơ wă đe 'me sa nhôn ôh. Nhôn kơmăng kơ'năr jang sa kơdih wă kơ iĕm huay kơ 'me nhôn.

⁹ Dah nhôn wă, iĕm gơh 'me nhôn mơ̆n kơlih kơ nhôn bơngai bơtho iĕm. Sơmă nhôn ưh kơ wă ôh, nhôn wă jang sa kơdih đĕch wă kơ iĕm jang sa kơdih lei-lăi thoi nhôn mơ̆n.

¹⁰ Hơtai nhôn oei hăm iĕm ki, nhôn kư̆m pơkă kơ iĕm thoi âu: “Bơngai bu alah ưh kơ wă jang, iĕm 'nĕ kơ 'me sư.”

¹¹ Na dang ei nhôn oei bơtho iĕm thoi noh kơlih kơ nhôn kơtơ̆ng đe khan đei bơngai lui lăm lu iĕm alah tơpă. Lu sư ưh kơ wă jang tơdrong kiơ 'biơ̆ hloi. Lu sư ling-lang nŏng kơ wih wơ̆t chă ngôi hnam âu, hnam to.

¹² Kră Yang Yêsu Krist wă kơ nhôn bơtho pơkă ăn kơ lu bơngai alah kơ jang thoi âu: Sư athei jang sa 'me klak akâu kơdih 'nĕ pă nŏng kơ chă ngôi.

¹³ Ơ lu 'nhŏng oh, mă iĕm jang gleh, tơdah tơdrong 'lơ̆ng trŏ, iĕm 'nĕ kơ achăng hŏ.

¹⁴ Dah bơngai bu ưh kơ chu dôm nơ̆r nhôn chih bơtho lăm kơthơ âu, iĕm tơ'bôh akâu sư kơ lu bơngai lui păng 'nĕ pă pơm buăl hăm sư wă kơ sư mơlâu.

¹⁵ Mă-lei iĕm 'nĕ mah hil kơ sư dêh. Iĕm athei bơtho khan adar adeh, mơnat kơ sư mơ̆n yua kơ sư kư̆m 'nhŏng oh bơngai lui.

Rim kơthơ wă tôch Pôl chih apinh Yêsu wei-lăng lu bơngai lui

¹⁶ Kră Yang Yêsu Krist boih ăn kơ bơ̆n hiôk-hian. Nhôn krao khan apinh Sư ăn kơ iĕm hiôk-hian ling-lang lăm tôm tơdrong păng nhôn apinh Sư oei hơdai rim 'nu kơ lu iĕm.

¹⁷ Kơthơ âu nơ̆r inh pơma, buăl inh chih. Lăp wă jê̆ tôch na ti inh chih kơdih boih. Thoi noh na iĕm băt kơnăl kơ kơthơ âu inh chih ăn kơ lu iĕm tơpă. Rim 'măng nhôn chih, lăp wă jê̆ tôch tơ ala kơthơ, inh kư̆m chih lei-lăi thoi noh mơ̆n.

¹⁸ Nhôn apinh Kră Yang bơ̆n Yêsu Krist wei-lăng rim 'nu kơ lu iĕm tôm tơdrong.