Both 32 - Sơ̆p Hlabơar Nơ̆r 'Bok Kei-Dei

¹ Ơ lu tăl plĕnh mơ̆ng bĕ, 'nâu wă pơma; ơ teh apinh mơ̆ng bĕ nơ̆r đơ̆ng 'bơ̆r inh.

² Rŏ kơ nơ̆r inh bơtho huŏng jruh thoi đak 'mi; nơ̆r inh pơma lĕch thoi đak ngom jur, thoi 'mi pruh tơ kơpal 'nhĕt 'lơ̆p thoi 'mi hngach ruh tơ kơpal hla 'nhĕt adrih.

³ Inh ư-ang anăn Kră Yang. Bĕ bơ̆n hơri ư-ang kơ Kră Yang 'Bok Kei-Dei Tơ'ngla mă tih hloh!

⁴ Kră Yang thoi Tơmo Tih 'lơ̆ng tôm; lu tơdrong Sư jang keh dang 'lơ̆ng tôm, trong Kră Yang tơpăt hơnơ̆ng. Sư boih Kră Yang 'Bok Kei-Dei sĭt, 'lơ̆ng tơpăt ưh kơ đei hơlĕnh. Sư tơpăt ling-lang 'lơ̆ng hơnơ̆ng.

⁵ Mă-lei iĕm oei hư răm. Ưh pă rŏ trŏ jing kon drŏ-nglo Kră Yang dơ̆ng.

⁶ Ơ kon pơlei kơhlôh kơwao ưh kơ đei đon tơchĕng, lu iĕm pơm kơ Kră Yang thoi noh hă? Ưh kơ trŏ kơ 'Bă lu iĕm hă, ưh kơ tơ'ngla pơjing iĕm hă? Ưh kơ trŏ Sư pơjing iĕm jing adrĕch adrung Sư hă?

⁷ 'Blŏk bĕ kơ năr sơ̆ ki. Tơchĕng bĕ kơ lu bơngai chăl adrol sơ̆. Jet bĕ 'bă iĕm lu sư gô tơl. Apinh bĕ lu kră iĕm, lu sư gô roi tơbăt ăn kơ iĕm.

⁸ Mưh kơplah Kră Yang Tih Hloh klah asong ăn teh kơ kon pơlei. 'Bơ̆t Sư ăn kơ adrĕch adrung Ađam tơklah tơklang. Sư hơgăt ăn hơdral kơ rim adrĕch, kiơ̆ kơ kơ̆l kon pơlei bơngai Isơrael.a

⁹ Gah Kră Yang noh kon pơlei Sư, Jakôp noh gah Sư.

¹⁰ Kră Yang chă 'bôh lu kon pơlei Sư tơ lăm char glă. Tơ lăm bri brah đei nơ̆r ôr krao Kră Yang wei rong lu sư, bơwei lu sư wei thoi kon-ngai lăm măt Sư.

¹¹ Thoi sem klang tơdrŏ kơ tơpu Sư râu kon sư 'nao cheh, Păr bah kơ lu hơnar sư, bơlang pơnăr sư gram hơnar păng pŭ hơnar sư kơpal pơnăr.

¹² Minh Kră Yang đĕch chông anhăk lu kon pơlei Sư, Ưh kơ đei yang kiơ nai.

¹³ Kră Yang ăn kơ lu sư oei tơ tơring groi kông; Rong lu sư hăm tơmam sa đơ̆ng lăm mir chŭn; Ăn sa đak sut iŏk đơ̆ng lăm tơmo tih. Păng đak rơmă lĕch đơ̆ng teh lăm tơmo.

¹⁴ Đơ̆ng khŭl rơmo păng triu bơbe lu sư đei đak toh păng đak toh iŭ. Sa 'nhĕm sĕch rơmă đơ̆ng triu kon păng triu tơno. Rơmo triu tơno, bơbe tơno đơ̆ng char Basan lu iĕm sŏng 'ba 'mi mă 'lơ̆ng hloh; Huch sik đak hơmu đơ̆ng tơm 'brê thoi pham.

¹⁵ Jêsurunb wă rai bek mơdrŏng pran, wă iŏk jơ̆ng đă plơ̆ akâu sư bek lơluĭnh boih na lu sư achăng lê̆ Kră Yang 'Bok Kei-Dei Tơ'ngla mă pơjing lu sư, păng pơjăm lê̆ Tơmo Tih mă dŏng pơklaih.

¹⁶ Lu sư kơkuh kơ rup yang nai wă tơblĕk Kră Yang tơ'ngla 'mêm gar. Pơm wă kơ Kră Yang ơh hil kơ lu sư pơm rup yang, Sư areh lăng krưp.

¹⁷ Lu sư pơyơ̆r tơmam soi kơ lu yang kơnê̆, ưh kơ trŏ kơ Kră Yang 'Bok Kei-Dei ôh. Kơkuh kơ yang mă lu sư ưh kơ tam lah băt, Yang đơ̆ng ataih 'nao truh. Mă 'bok lu sư ưh kơ hli yom.

¹⁸ Ih sơngah kơ Tơmo Tih tơ'ngla pơjing ih, Hiơt boih kơ Kră Yang 'Bok Kei-Dei Tơ'ngla pơjing ih.

¹⁹ Kră Yang 'bôh đĭ, na Sư hil. Na achăng hŭt lê̆ kon drŏ-nglo păng kon drŏ-kăn.

²⁰ Kră Yang khan: Inh gô ôn muh măt Inh ưh pă lăng lu sư wă lăng lăng tuch-luch lu sư thoi yơ, lu sư minh adrĕch hơlĕnh kơnê̆ dêh, jơ̆ lu kon mă ưh kơ tơnăp.

²¹ Lu sư tơblĕk Inh dêh yua kơ lu sư kơkuh kơ yang nai ưh kơ yua kiơ. Pơm kơ inh hil gar hăm yang mă ưh kơ đei tơdrong anăn kiơ. Na inh gô pơm kơ lu sư 'ngeng kơ lu adrĕch mă răm hloh. Iŏk minh adrĕch adrung mă lŭch hloh tơblĕk lu sư. Iŏk minh teh đak kơhlôh kơwao na tơblĕk pơklai lu sư.

²² Inh hil thoi ŭnh sa khơ̆ng blông blông. Sa hloi tôch tơ kơđĕl hơnă pơlei lôch, ŭnh sa đĭ teh păng plei sa, sa kông pơđĭ truh tơ hơnă.

²³ Inh gô tơpŭ ăn tơdrong răm pơmat-tat tơ kơpal lu sư. Iŏk hră Inh prah lu sư, dĭng đĭ 'brơ̆m.

²⁴ Inh ăn tơdrong pơngot rơwĕt, tơngiĕt găng pơm kơ lu sư hiong răm. Ba tŏ sa pơm kơ lu sư rơmơ̆n rơmok ăn tơdrong jĭ apoh pơm kơ lu sư lôch rŭng. Inh gô ăn sem bri kăp hek sa lu sư. Athei 'bih đei bih hơkăm năm choh lu Sư lôch.

²⁵ Tơ rok trong tih, đei đao gưm pơlôch lu sư, tơ lăm hnam đei tơdrong hli tơrơ ling-lang Tơdăm, adruh, bơngai kră păng lu kon nge gô lôch răm đĭ.

²⁶ Inh khan: Inh gô pơm kơ lu sư tơklah tơklang, sŭt pơgoh lê̆ tơdrong đe 'blŏk hơdơ̆r kơ lu sư đơ̆ng lăm kon bơngai.

²⁷ Mă-lei hli kơ lu bơngai ayăt noh pơjăm, Păng lu bơngai ayăt hlôh hơwơ̆l khan: Đơ̆ng tơpang ti lu nhôn mă đei jơnei tih Kră Yang ưh kơ pơm kiơ lăm tơdrong noh!

²⁸ Lu Sư jing minh adrĕch ưh kơ hlôh, Tơchĕng ưh kơ hơdah hơdong

²⁹ Tơdah lu sư gơh hơgei, lei lu sư hlôh boih tơdrong âu păng băt tôch ning-mônh sư thoi yơ.

³⁰ Tơdah Kră Yang Tơmo Tih ưh kơ đei tĕch lu sư, kư̆m ưh kơ jao lu sư kơ lu bơngai ayăt, pơm liơ lăp minh 'nu đĕch gơh druh puh lê̆ minh-rơbâu 'Bar 'nu gơh druh mơjĭt-rơbâu 'nu kơdâu?

³¹ Tơmo tih lu sư ưh kơ dang thoi Tơmo Tih lu bơ̆n, lu bơngai ayăt kư̆m băt thoi noh mơ̆n.

³² Lu ayăt noh tơm hơmu chăt lăm pơlei Sôđôm lăm mir pơgar pơlei Gômôrơ. Plei hơmu lu sư đei đak hơkăm, hơie hơmu lu sư jing tăng.

³³ Sik hơmu lu sư thoi bih 'bih hơkăm, bih hơkăm choh bơngai lôch đơ̆ng 'bih tur makkang.

³⁴ Dôm tơdrong thoi noh gô 'blŏk răk, inh wei sư lăm hnam mong tơmam gĭt inh.

³⁵ Tơdrong pơm 'mong gô lê̆ kơ Inh, Inh gô pơm tôm. Trŏ năr jơ̆ng lu sư tơsĕr pơ̆k. Tơdrong răm wă jê̆ truh kơ lu sư bơih. Tơdrong pơlôch lu sư, gô truh tĕnh.

³⁶ Trŏ boih Kră Yang gô sek tơlang kơ kon pơlei Sư. 'Mêm mơnat kơ đĭch đam Sư. Kơplah Kră Yang 'bôh jơhngơ̆m lu sư gleh lap đĭ boih, ưh pă đei bu oei đĭch dah yŏng tơ'ngla lu sư.

³⁷ Kră Yang gô apinh: Dang ei lu yang lu sư tơ yơ, Tơmo tih mă lu sư kơ'nơp,

³⁸ lu yang sa rơmă tơmam soi sư pơyơ̆r păng huch đak sik hơmu lu sư pơyơ̆r, dang ei oei tơ yơ boih? Liơ ưh kơ iung tơgŭm, liơ ưh kơ krôp bơwei lu sư?

³⁹ Lăng bĕ, Inh âu boih Kră Yang 'Bok Kei-Dei. 'Nguaih kơ Inh ưh kơ đei yang nai dơ̆ng. Inh gơh ăn lôch păng ăn arih dơ̆ng, Inh teh rơka păng Inh ming pơklaih. Ưh kơ đei bu gơh tơgar iŏk klaih đơ̆ng tơpang ti Inh.

⁴⁰ Inh yơ̆r ti tơhlâu tơ plĕnh păng khan: Tơpă Inh oei arih ling-lang.

⁴¹ Kơplah inh pat đao rang mơnhal Ti Inh chĕp đao, Inh hơ-oei sek tơlang. Inh gô pơm 'mong kơ lu bơngai ayăt păng pơm tơwih kơ lu bơngai areh kơ Inh.

⁴² Inh gô ăn 'brơ̆m hră Inh huch pham; dĭng thoi et sik suai, Đao gưm Inh gô sa sĕch, Pham lu bơngai bơnă đe koh pơlôch. Chơ̆ng kơ̆l lu yŏng ayăt.

⁴³ Ơ lu adrĕch adrung kon bơngai! Hiôk chơt bĕ hăm kon pơlei Kră Yang. Yua kơ Sư gô iung kơting, pơm 'mong pham kơ đĭch đam Sư, Sư pơm 'mong blah lu bơngai ayăt kơ Sư, mơnat ăn kơ dêh char Sư păng lu kon pơlei pơla Sư.

⁴⁴ Môis hăm Jôsuê kon drŏ-nglo Nun đŏk đĭ dôm lu nơ̆r hơri 'nâu ăn kơ kon pơlei pơla mơ̆ng.

⁴⁵ Môis đŏk đang boih dôm lu nơ̆r 'nâu ăn kơ đĭ-đăng bơngai Isơrael,

⁴⁶ na sư khan kơ kon pơlei: Lăm jơhngơ̆m lu iĕm athei wei răk bĕ đĭ dôm nơ̆r inh roi ăn kơ lu iĕm lăm năr 'nâu, wă kơ lu iĕm gơh bơtho ăn kơ lu kon sâu iĕm pơm kiơ̆ dôm nơ̆r lăm khôi juăt noh.

⁴⁷ 'Nâu ưh kơ sĭ nơ̆r pơma ngôi đĕch, mă-lei noh jơ̆ tơdrong arih lu iĕm; kơplah gơnang kơ nơ̆r 'nâu, na lu iĕm gô oei arih sot tơ kơpal teh đak mă lu iĕm gô iŏk mưh iĕm tŏk hlôi kơ đak Krong Jôrđăn.

Môis gô lôch tơ kông Nêbô

⁴⁸ Lăm năr noh Kră Yang khan kơ Môis:

⁴⁹ Năm tŏk bĕ tơ lu kông Abarim, tơ Nêbô lăm dêh char Môap, tơklă pơlei Jêrikô; wă tơmang lăng dêh Kanaan mă Inh wă ăn kơ kon pơlei bơngai Isơrael bơ̆jang sa.

⁵⁰ Ih gô lôch tơ kơpal kông mă ih wă tŏk noh păng ih gô oei hơdai hăm lu kon pơlei ih, kư̆m thoi Arôn 'nhŏng ih lôch tơ kơpal kông Hôr păng đe kư̆m akŭm hơdai hơbĭ boih hăm lu 'bok yă iĕm.

⁵¹ Yua kơ măr iĕm ưh kơ lui kơ Inh, 'bơ̆t anăp kon pơlei Isơrael, 'bơ̆t đak Mêriba tơ Kades, lăm char glă Yin, yua kơ ih ưh kơ kơkuh pơyom kơ Inh lăm kon pơlei Isơrael.

⁵² Lei na ih lăp lăng 'bôh dêh char noh đơ̆ng ataih ih ưh kơ mơ̆t ôh lăm dêh mă Inh ăn kơ kon pơlei Isơrael.