Both 17 - Sơ̆p Hlabơar Nơ̆r 'Bok Kei-Dei

Phak lu bơngai kơkuh kơ rup yang

¹ Iĕm 'nĕ kơ pơyơ̆r kơ Kră Yang 'Bok Kei-Dei iĕm rơmo, dah triu đei tơdrong jĭ dah jo jăn noh tơdrong krưp dêh kơ Kră Yang 'Bok Kei-Dei.

² Tơdah đei bơngai oei hơdai, lăm pơlei mă Kră Yang 'Bok Kei-Dei ăn kơ iĕm, đei minh 'nu bơngai drŏ-nglo dah drŏ-kăn pơm tơdrong kơnê̆ 'bơ̆t anăp Kră Yang 'Bok Kei-Dei, noh pơm glăi tơdrong pơgơ̆p Sư,

³ năm bơ̆jang păng kơkuh kơ lu yang nai, thoi măt 'năr, măt khei dah lu sơnglŏng kơpal plĕnh, wă khan pơglăi dôm tơdrong Inh đei bơtho akhan;

⁴ Đe roi tơbăt kơ iĕm păng iĕm kơtơ̆ng boih; na athei apinh mă pơnhen tơpă, tơdah tơdrong đe roi noh trŏ tơpă, sĭt thoi noh mă đei lăng hơlen tơpă đei pơm kơnê̆ krưp noh lăm char Isơrael,

⁵ Na Iĕm athei chông ba bơngai drŏ-nglo dah drŏ-kăn mă pơm tơdrong kơnê̆ krưp noh 'bơ̆t 'măng jang pơlei, klơ̆m pơlôch sư păng tơmo.

⁶ Athei kiơ̆ nơ̆r 'bar dah pêng 'nu bơngai pơm kơdranh drơ̆ng khan trŏ kơ pơlôch bơngai noh; ưh kơ gơh pơlôch bơngai bu tơdah đei lăp minh 'nu đĕch khan.

⁷ Lu bơngai drơ̆ng athei yơ̆r ti adrol hloh pơlôch bơngai noh, pơtrơp đơ̆ng rŏng kơ noh ti lu kon pơlei. Thoi noh, gô pơlôch pơgoh lê̆ lu tơdrong kơnê̆ đơ̆ng lăm kon pơlei iĕm.

⁸ Tơdah đei sek tơlang hơnat thoi pơlôch bơngai, sek tơlang tơdrong đe tơgar dih băl dah tơdrong pơm kơ đe rơka, dah đei tơdrong nai, minh tơdrong truh hơnat kơ iĕm tơpă, thoi noh lu iĕm athei chĕp ba tơdrong sek noh tơ anih mă Kră Yang 'Bok Kei-Dei iĕm gô rơih.

⁹ Năm roi kơ lu 'bok soi tơm adrĕch bơngai Lêwi păng kră sek tơlang hơgei mă oei jang lăm chăl noh, na apinh lu sư gô tơ'bôh ăn kơ iĕm băt sek tơlang trŏ.

¹⁰ Iĕm athei pơm kiơ̆ thoi nơ̆r lu sư bơtho ăn tơ anih Kră Yang gô rơih, athei kơchăng pơm kiơ̆ dôm nơ̆r đơ̆ng lu sư bơtho khan.

¹¹ Athei pơm kiơ̆ trŏ tơdrong juăt đơ̆ng lu sư bơtho khan păng pơm kiơ̆ lu sư sek tơlang, 'nĕ kơ weh gah 'ma dah gah 'ngiĕo đơ̆ng lu sư bơtho khan.

¹² Bơngai bu, ưh kơ chu kiơ̆ kơ 'bok soi dah 'bok sek tơlang oei bơ̆jang kơ Kră Yang 'Bok Kei-Dei iĕm, bơngai noh athei pơlôch. Iĕm athei sŭt pơgoh pă đei tơdrong kơnê̆ lăm Isơrael dơ̆ng.

¹³ Đĭ-đăng kon pơlei pơla kơtơ̆ng tơdrong noh na gô hli tơrơ, ưh pă pơ̆n pơm tơdrong kơnê̆ dơ̆ng.

Rơih wă pơm pơtao

¹⁴ Layơ iĕm mơ̆t truh lăm dêh mă Kră Yang 'Bok Kei-Dei ăn kơ iĕm đei iŏk oei tơ dêh noh boih, na iĕm khan: Lu bơ̆n rơih minh 'nu pơm pơtao wă pơgơ̆r, kư̆m thoi lu adrĕch adrung mă oei jum dăr kơ bơ̆n.

¹⁵ Iĕm gơh chă rơih bơngai pơm pơtao, mă-lei bơngai đơ̆ng Kră Yang gô rơih, athei rơih chă minh 'nu pơtao đơ̆ng lu 'nhŏng oh iĕm; 'nĕ kơ chă rơih bơngai tơmoi ưh kơ trŏ bơngai Isơrael pơm pơtao pơgơ̆r iĕm.

¹⁶ Mă-lei pơtao ei 'nĕ kơ mah hiơ̆k dêh wă kơ đei aseh lơ, wă chông ba kon pơlei brŏk hơlơ̆k dơ̆ng tơ dêh Êyiptơ chă aseh; đơ̆ng Kră Yang khan: Lu iĕm 'nĕ pă wih brŏk dơ̆ng trong noh.

¹⁷ Pơtao ưh gơh đei akăn lơ, kơnh hli kơ pơm jơhngơ̆m sư wơ̆l jrok kư̆m ưh kơ gơh mong hu, maih lơ kơ sư kơdih.

¹⁸ Kơplah mă sư pơm pơtao, pơtao athei pơm kiơ̆ khôi juăt 'nâu, mă đơ̆ng lu 'bok soi adrĕch bơngai Lêwi, chih wei minh sơ̆p răk kơdih.

¹⁹ Pơtao athei wei minh sơ̆p, pơtao athei đŏk lăng ling-lang đĭ chăl arih sư oei kơpal teh wă pơhrăm băt hli yom kơ Kră Yang 'Bok Kei-Dei sư, pơ'lơ̆ng pơm kiơ̆ dôm lu nơ̆r khôi juăt păng nơ̆r tơtă 'nâu,

²⁰ wă kơ jơhngơ̆m klơm klak sư huay kơ pơang păng pơdê kơ lu 'nhŏng oh sư păng huay kơ weh tơ gah 'ma gah 'ngiĕo, achăng lê̆ nơ̆r tơtă 'nâu, wă kơ pơtao păng kon sâu pơtao gơh pơgơ̆r đunh sot oei lăm char Isơrael.