Both 16 - Sơ̆p Hlabơar Nơ̆r 'Bok Kei-Dei

Giĕng Năm Brih

¹ Iĕm athei 'blŏk kơ khei 'ba huăt, pơm giĕng Năm Brih kơ Kră Yang 'Bok Kei-Dei iĕm; yua kơ lăm khei trŏ kơ 'ba huăt,a Kră Yang 'Bok Kei-Dei iĕm chông anhăk iĕm lĕch đơ̆ng dêh Êyiptơ kơmăng.

² Tơ lăm anih mă Kră Yang gô rơih wă 'măn lê̆ Anăn Sư oei, iĕm athei iŏk triu dah rơmo, pơyơ̆r pơm Năm Brih ăn kơ Kră Yang 'Bok Kei-Dei.

³ Năr giĕng Năm Brih 'nĕ kơ sa 'bĕng hrâu hăm 'buih pông; lăm tơpơh năr iĕm gô sa 'bĕng ưh kơ đei 'buih pông, wă khan 'bĕng pơmat-tat, wă kơ iĕm 'blŏk kơ năr iĕm lĕch hlôi đơ̆ng dêh Êyiptơ hăt hot.

⁴ Lăm tơpơh năr jơ̆p kơ lăm teh char iĕm oei, ưh kơ đei bu gơh 'măn 'buih păng 'nhĕm mă pơyơ̆r kơsơ̆ năr mă mônh, 'nĕ kơ lê̆ rơkah truh tơ pơgê dơning.

⁵ Iĕm ưh kơ gơh pơyơ̆r tơmam soi năr giĕng Năm Brih lăm minh anih ayơ lăm dêh mă Kră Yang iĕm gô ăn kơ iĕm,

⁶ mă-lei athei pơyơ̆r tơ anih mă Sư gô rơih wă 'măn Anăn Sư oei tơ noh, iĕm gô pơyơ̆r sem dơrong pơm giĕng Năm Brih, gah kơsơ̆, lăp kơplah 'năr mơ̆t, kơnhăm trŏ jơ mă iĕm lĕch hlôi đơ̆ng dêh Êyiptơ.

⁷ Iĕm athei pai sa 'nhĕm tơmam soi noh tơ anih mă Kră Yang 'Bok Kei-Dei gô rơih; truh pơgê dơning wih brŏk tơ bơsŭn iĕm pơdơh.

⁸ Lăm tơdrâu năr, iĕm athei sa 'bĕng ưh kơ đei 'buih pông, truh năr mă tơpơh, gô đei akŭm kơkuh tih ăn kơ Kră Yang 'Bok Kei-Dei iĕm, iĕm ưh kơ gơh jang minh tơdrong kiơ.

Pơm giĕng kĕch, yuă, phĕ

⁹ Đơ̆ng pơtơm bơyan kĕch yuă 'ba blŭng-a, iĕm jô̆ tơpơh 'măng giĕng.

¹⁰ Đơ̆ng rŏng kơ noh iĕm athei pơm giĕng kơ lu tơpơh 'măng giĕng 'nâu ăn kơ Kră Yang 'Bok Kei-Dei iĕm ba tơmam pơyơ̆r hăm jơhngơ̆m hiôk, kiơ̆ kơ đơ̆ng Kră Yang 'Bok Kei-Dei ăn pŭn hiôk kơ iĕm.

¹¹ Hơdai hăm kon drŏ-nglo, kon drŏ-kăn, đĭch drŏ-nglo đĭch drŏ-kăn, lu bơngai Lêwi mă oei hơdai lăm pơlei iĕm, bơngai tơmoi, bơngai mơti păng bơngai adro mă oei hơdai hăm iĕm, kư̆m hơdai wang hiôk chơt tơ anih mă Kră Yang 'Bok Kei-Dei gô rơih wă 'măn kơ Anăn Sư.

¹² Iĕm athei 'blŏk kơ đêl pơm đĭch tơ dêh Êyiptơ, na iĕm athei kơchăng pơm kiơ̆ nơ̆r tơtă 'nâu.

Pơm giĕng Bơsŭn

¹³ Iĕm kĕch yuă iŏk 'ba păng phĕ plei hơmu đang boih, iĕm athei pơm giĕng Bơsŭn lăm tơpơh năr.

¹⁴ Hơdai hăm kon drŏ-nglo kon drŏ-kăn, đĭch drŏ-nglo đam drŏ-kăn, bơngai Lêwi, bơngai tơmoi, bơngai mơti păng bơngai adro oei hơdai lăm pơlei iĕm, kư̆m hơdai wăng hiôk chơt 'blŏk hơdơ̆r pơm giĕng.

¹⁵ Lăm tơpơh năr iĕm athei kơkuh kơ Kră Yang 'Bok Kei-Dei păng pơm năr giĕng âu, tơ anih mă Kră Yang gô rơih; yua kơ Kră Yang 'Bok Kei-Dei iĕm gô ăn pŭn hiôk kơ iĕm lăm đĭ phĕ plei boih păng dôm tơdrong jang đơ̆ng tơpang ti pơm kơdih; lei na iĕm gô chhôk ngă 'nă hal hơdai.

¹⁶ Rim 'nu bơngai drŏ-nglo, rim sơnăm pêng wơ̆t, athei năm kơkuh kơ Kră Yang 'Bok Kei-Dei iĕm, tơ anih mă Sư gô rơih, noh lăm năr pơm giĕng sa 'bĕng ưh kơ đei 'Buih Pông, pơm giĕng kĕch yuă phĕ păng pơm giĕng Bơsŭn; ưh kơ đei bu năm kơkuh kơ Kră Yang hăm tơpang ti hoh.

¹⁷ Rim 'nu gô pơyơ̆r kiơ̆ kơ tơmam lu sư đei, kiơ̆ kơ đei pŭn hiôk mă Kră Yang 'Bok Kei-Dei đei ăn.

Sek tơlang

¹⁸ Athei pôk ăn lu 'bok sek tơlang păng yŏng pơgơ̆r lăm lu adrĕch tơ lăm lu pơlei mă Kră Yang 'Bok Kei-Dei ăn kơ iĕm; wă gô sek tơlang kon pơlei hăm tơdrong tơpăt.

¹⁹ 'Nĕ kơ pơm glăi kơ tơdrong tơpăt; 'nĕ kơ mơ̆t minh pah; 'nĕ kơ sa tơmam đe răt apah, yua kơ tơmam đe răt apah noh pơm ăn kơ lu bơngai rơngei măt tol păng gơwĕch lê̆ nơ̆r bơngai tơpăt.

²⁰ Lu iĕm athei pơm mă hơnơ̆ng băl păng mă tơpăt, wă kơ lu iĕm gơh arih păng gơh iŏk oei lăm dêh mă Kră Yang 'Bok Kei-Dei ăn.

'Nĕ kơkuh kơ rup yang

²¹ 'Bơ̆t cheng chơnang soi kơ Kră Yang 'Bok Kei-Dei iĕm, 'nĕ kơ pơm gơ̆ng rup yang Asêrim.

²² Kŭm ưh kơ gơh pơdơ̆ng pơm minh pôm jrăng tơmo wă kơkuh Kră Yang 'Bok Kei-Dei iĕm areh kơ dôm lu tơmam noh.