Both 15 - Sơ̆p Hlabơar Nơ̆r 'Bok Kei-Dei

Sơnăm rơngei

¹ Tôch kơ rim tơpơh sơnăm, iĕm athei ăn rơngei kơ hre,

² 'Nâu tơdrong juăt ăn rơngei, tơ'ngla mă ăn kơ đe tŏk iŏk noh athei ăn rơngei, ưh pă apinh dơ̆ng đơ̆ng lu 'nhŏng oh iĕm Isơrael păng lu 'nhŏng oh nai đêl tŏk iŏk noh, yua kơ Kră Yang khan boih 'nâu sơnăm ăn rơngei đơ̆ng hre.

³ Iĕm gơh apinh đơ̆ng lu bơngai tơmoi; mă-lei gah lu 'nhŏng oh iĕm athei ăn rơngei đơ̆ng hre.

⁴ Ưh kơ wă lăm lu iĕm đei bơngai dơnuh, yua kơ đei Kră Yang gô ăn pŭn hiôk rơkah rơkai lăm dêh mă Kră Yang ăn kơ iĕm đei iŏk teh bơ̆jang sa,

⁵ Tơdah iĕm chu mơ̆ng kiơ̆ nơ̆r Kră Yang 'Bok Kei-Dei iĕm păng kơchăng pơm kiơ̆ nơ̆r tơtă mă inh đei bơtho khan ăn kơ iĕm năr âu.

⁶ Kră Yang 'Bok Kei-Dei iĕm gô ăn pŭn hiôk kơ iĕm kiơ̆ thoi nơ̆r Sư đei pơkă; iĕm gô ăn kơ lơ teh đak gơh tŏk iŏk, mă gah iĕm huay kơ tŏk iŏk đơ̆ng teh đak nai; iĕm gô pơgơ̆r lơ teh đak, teh đak nai ưh kơ gơh pơgơ̆r teh đak iĕm.

⁷ Mă-lei tơdah lăm dêh mă đơ̆ng Kră Yang 'Bok Kei-Dei asong ăn, oei đei bơngai dơnuh hin, na 'nĕ kơ kret kơ lu bơngai noh.

⁸ Mă-lei athei bơlang ti, asong ăn tŏk iŏk tôm tơmam kiơ mă lu sư kăl wă.

⁹ Kơchăng bĕ, 'nĕ kơ răk mong tơchĕng kơnê̆ 'nâu: Sơnăm mă tơpơh jơ̆ sơnăm ăn rơngei wă truh boih! Kơchăng bĕ, wă kơ iĕm huay kơ đei jơhngơ̆m kơnê̆ hăm lu 'nhŏng oh iĕm bơngai dơnuh hin, ưh kơ ăn lu sư gơh tŏk iŏk kiơ, kơnh lu sư krao ôr Kră Yang tơmăk kơ iĕm, iĕm gô đei tơdrong yoch.

¹⁰ Iĕm athei ăn kơ đe tŏk iŏk mă hơlăng, 'nĕ ăn hăm jơhngơ̆m ưh kơ hiôk; thoi ei Kră Yang 'Bok Kei-Dei iĕm gô ăn pŭn hiôk lăm dôm tơdrong jang đơ̆ng tơpang ti pơm.

¹¹ Yua kơ gô đei ling-lang lu bơngai dơnuh hin oei lăm dêh char, thoi noh, na inh hơpơi khan kơ iĕm; athei bơlang ti hơmrah asong kơ lu 'nhŏng oh bơngai dơnuh pơmat-tat mă oei hơdai lăm dêh char iĕm.

Rơngei đơ̆ng đĭch

¹² Tơdah đei bơngai Hêbrơ, drŏ-nglo dah drŏ-kăn, tĕch akâu sư kơdih kơ iĕm sư gô jang kơ iĕm lăm tơdrâu sơnăm, na truh lăm sơnăm mă tơpơh, iĕm athei ăn kơ sư rơngei.

¹³ Kơplah ăn sư rơngei, 'nĕ kơ ăn sư brŏk tơpang ti hoh.

¹⁴ Iĕm athei asong ăn kơ sư sem dơrong, 'ba đơ̆ng anih juă 'ba, sik hơmu đơ̆ng anih rŏl chơpĕt, kiơ̆ kơ đơ̆ng Kră Yang 'Bok Kei-Dei iĕm ăn pŭn.

¹⁵ Athei 'blŏk kơ iĕm đêl pơm đĭch boih lăm dêh Êyiptơ, Kră Yang 'Bok Kei-Dei dŏng pơklaih; thoi noh, năr 'nâu inh bơtho khan kơ iĕm nơ̆r tơtă 'nâu.

¹⁶ Mă-lei tơdah đei đĭch iĕm khan: Inh ưh kơ wă weh đơ̆ng hnam tơ'ngla inh ôh, yua kơ sư băt 'mêm kơ hnam dơnŏ yŏng sư, yua kơ sư đei jơhngơ̆m hiôk oei hăm tơ'ngla sư.

¹⁷ Iĕm athei iŏk loih tôt đon sư dan sư 'bơ̆t 'măng, lei na sư gô jing đĭch ling-lang hlŏng hloi, mă đam drŏ-kăn iĕm kư̆m pơm thoi noh mơ̆n.

¹⁸ 'Nĕ kơ lăng hơnat ôh ăn kơ đĭch rơngei, yua kơ sư bơ̆jang kơ iĕm tơdrâu sơnăm boih, sa apah dang 'bar wơ̆t kơ minh 'nu bơngai jang hmă; thoi noh na Kră Yang 'Bok Kei-Dei gô ăn pŭn hiôk kơ iĕm lăm dôm tơdrong jang iĕm. Pơyơ̆r kon sem dơrong tuh blŭng-a

¹⁹ Iĕm athei klah lê̆ 'lơ̆ng rơgoh ăn kơ Kră Yang 'Bok Kei-Dei iĕm dôm lu kon kơdră tơno tuh blŭng-a lăm rơmo dah triu iĕm. 'Nĕ kơ choh rơuơ ôh rơmo tơno tuh blŭng-a păng kư̆m 'nĕ kơ yuă sŏk triu tơno kơdră tuh blŭng-a.

²⁰ Rim sơnăm iĕm păng hnam dơnŏ iĕm gô 'buh sa 'bơ̆t anăp Kră Yang 'Bok Kei-Dei iĕm, tơ anih mă Sư gô rơih.

²¹ Dah kon sem dơrong tuh blŭng-a đei jĭ kiơ, jo dah măt tol, dah đei tơdrong jĭ nai dơ̆ng, iĕm 'nĕ kơ pơyơ̆r pơm tơmam soi ăn kơ Kră Yang 'Bok Kei-Dei iĕm ôh.

²² Mă-lei iĕm athei 'buh sa lăm pơlei kơdih; bơngai kơnê̆ 'mê̆-'mach păng bơngai 'lơ̆ng rơgoh kư̆m gơh sa đĭ, kư̆m thoi sa 'nhĕm juei dah sa 'nhĕm kơtŏng tơno.

²³ Mă-lei iĕm 'nĕ kơ sa pham sư; athei tuh hŭt lê̆ pham noh tơ teh thoi tuh đak.