Both 13 - Sơ̆p Hlabơar Nơ̆r 'Bok Kei-Dei

Ưh kơ kơkuh kơ yang nai

¹ Tơdah đei bơngai khan lê̆ adrol, dah bơngai juăt apo 'bôh chă pơm khan lê̆ adrol dah tơdrong tơdra hlĭch;

² tơdah tơdra hlĭch păng khan lê̆ adrol noh đei trŏ tơpă na sư khan: Bĕ bơ̆n kiơ̆ lu yang nai; yang mă lu iĕm ưh tam băt, bĕ bơ̆n kơkuh kơ yang noh.

³ Na 'nĕ kơ mơ̆ng ôh nơ̆r bơngai khan lê̆ adrol noh dah lu bơngai apo noh roi, yua kơ Kră Yang 'Bok Kei-Dei lu iĕm pơlong lăng lu iĕm, wă băt kơ lu iĕm hăm đĭ jơhngơ̆m klơm klak đĭ đon tơchĕng 'mêm kơ Kră Yang 'Bok Kei-Dei lu iĕm dah ưh.

⁴ Lu iĕm athei yak kiơ̆ Kră Yang 'Bok Kei-Dei lu iĕm păng hli yom kơkuh kơ Sư, wei răk dôm nơ̆r Sư tơtă, mơ̆ng kiơ̆ nơ̆r Sư khan, bơ̆jang kơ Sư păng pơgơ̆p kơjăp hăm Sư.

⁵ Athei pơlôch bơngai khan lê̆ adrol dah bơngai juăt apo noh, yua kơ sư pơhlŭ pơtơm iĕm iung blah Kră Yang 'Bok Kei-Dei lu iĕm, Tơ'ngla mă chông ba lu iĕm lĕch đơ̆ng dêh Êyiptơ, dŏng pơklaih lu iĕm đơ̆ng pơm đĭch, bơngai noh kư̆m chă đon wă pơm kơ iĕm achăng lê̆ trong Kră Yang 'Bok Kei-Dei iĕm tơhlâu tơ'bôh ăn kơ iĕm trong wă rok kiơ̆, athei pơlôch lu bơngai pơm kơnê̆ wă tơhiong lê̆ tơdrong yoch đơ̆ng lăm lu iĕm.

⁶ Tơdah đei 'nhŏng oh pôm mĕ 'bă, kon drŏ-nglo dah kon drŏ-kăn iĕm, akăn iĕm mă 'mêm kơeng, dah buăl juăt iĕm năm pơtơm pơhlŭ iĕm, khan: Bĕ bơ̆n năm kơkuh kơ yang nai, mă iĕm hăm lu 'bok iĕm kư̆m ưh tam băt,

⁷ yang lu adrĕch adrung oei jum dăr kơ iĕm, jê̆ dah ataih, đơ̆ng dêh âu truh tơ tôch dêh to,

⁸ Na iĕm 'nĕ kơ chu kiơ̆ sư, kư̆m 'nĕ kơ mơ̆ng sư, kư̆m 'nĕ kơ mơnat; păng kư̆m 'nĕ kơ bơwei dah dŏng lu sư.

⁹ Mă-lei iĕm athei pơlôch sư hloi. Tơpang ti iĕm kơdih gô pơlôch sư adrol hloh kơ đĭ-đăng, đơ̆ng noh tơpang ti đĭ-đăng lu kon pơlei.

¹⁰ Iĕm athei iŏk tơmo klơ̆m pơlôch sư, yua kơ sư chă đon pơhlŭ ih iĕm achăng lê̆ Kră Yang 'Bok Kei-Dei iĕm, Tơ'ngla chông iĕm lĕch đơ̆ng dêh Êyiptơ lĕch hlôi đơ̆ng pơm đĭch.

¹¹ Thoi noh, na đĭ-đăng bơngai Isơrael gô kơtơ̆ng băt dôm tơdrong noh păng hli tơrơ, lei na ưh pă đei pơ̆n pơm minh tơdrong kơnê̆ noh dơ̆ng.

¹² Tơdah iĕm đei kơtơ̆ng ang minh lăm lu pơlei tih Kră Yang 'Bok Kei-Dei iĕm ăn kơ iĕm,

¹³ đei lu bơngai kơnê̆ iung năm pơhlŭ pơlung kon pơlei noh, khan: Bĕ bơ̆n năm kơkuh kơ yang nai, yang mă lu iĕm tam lah băt,

¹⁴ na iĕm athei chă apinh lăng, pơnhen hơlen mă hơđăl. Tơdah tơdrong noh đei tơpă tơdrong kơnê̆ noh đei pơm tơpă tơ lăm lu iĕm,

¹⁵ iĕm athei iŏk đao gưm pơlôch đĭ lu bơngai lăm pơlei tih noh. Athei pơrăm đĭ-đăng lu bơngai păng lu sem dơrong.

¹⁶ Athei pơpôi iŏk pơđĭ lu tơmam đơ̆ng blah iŏk đơ̆ng lăm pơlei tih noh, năm tuh lê̆ tơ cham să na iŏk ŭnh soh pơlei noh păng đĭ-đăng mŭk tơmam lăm noh, thoi tơmam soi 'buh pơyơ̆r kơ Kră Yang 'Bok Kei-Dei iĕm, pơlei noh gô jing rơ̆m ngar ŭnh ling-lang hlŏng hloi, ưh pă bu gơh tơiung pơjing dơ̆ng.

¹⁷ Dôm tơmam trŏ kơ đe pơrăm tơhiong ưh kơ đei bu mă chro ti iŏk ôh wă kơ Kră Yang huay kơ hil mĭl, na tơ'bôh tơdrong Sư 'mêm mơnat kơ iĕm ăn kơ iĕm hrôh ngôh rai lơ thoi sư đei pơkă pơkăm hăm lu 'bok iĕm sơ̆.

¹⁸ Yua kơ iĕm chu nơ̆r Kră Yang 'Bok Kei-Dei iĕm, wei răk đĭ dôm nơ̆r Sư tơtă, mă inh bơtho ăn kơ iĕm năr 'nâu păng pơm tơdrong trŏ 'blep mă Kră Yang lăp đon.