Bl 4 - Sơ̆p Hlabơar Nơ̆r 'Bok Kei-Dei

Tơdrong Kain hăm Abel

¹ Ađam oei hơdai hăm akăn sư Ewơ, đơ̆ng noh akăn sư anăp na tơpŭ hĭ Kain păng khan: “Đơ̆ng Kră Yang tơgŭm na inh gơh tơpŭ kơ minh 'nu kon.”

² Ewơ tơpŭ kơ minh 'nu dơ̆ng oh Kain anăn Abel; Abel jing bơngai wei triu; gah Kain sư jang mir 'ba.

³ Đunh 'biơ̆ đơ̆ng noh, Kain yua phe 'ba sư pơm tơmam pơyơ̆r kơ Kră Yang.

⁴ Abel kư̆m pơyơ̆r kon triu tuh blŭng-a hăm rơmăa sư kơ Kră Yang 'Bok Kei-Dei, Kră Yang lăng gah Abel păng iŏk tơmam soi sư.

⁵ Mă-lei ưh kơ đei lăng Kain păng kư̆m ưh kơ iŏk tơmam soi sư, na Kain blĕk dêh mah 'bri 'bra muh măt sư.

⁶ Kră Yang apinh Kain thoi âu: “Yua kơ kiơ ih blĕk? Yua kơ kiơ ih kŭp muh măt ih?

⁷ Dah ih pơm 'lơ̆ng liơ ih ưh kơ pơ̆n ngơk muh măt? Na mưh ưh kơ pơm 'lơ̆ng, to tơdrong yoch răp gô 'bơ̆t 'măng 'ngeng kơ ih dêh mă-lei ih 'nĕ kơ ăn jei sư.”

⁸ Đơ̆ng noh Kain pơtơm oh sưb Abel năm; kơplah măr sư oei tơ bri, na Kain plŏng bruh tơ Abel oh sư păng pơlôch hloi.

⁹ Kră Yang jet Kain thoi âu: “Oh ih Abel tơ yơ?” Sư tơl: “Inh ưh kơ băt, inh bơngai wei oh inh ah?”

¹⁰ Kră Yang jet dơ̆ng: “Ih pơm kiơ thoi noh? Inh 'bôh pham oh ih ôr đơ̆ng teh păng nơ̆r sư krao kơtơ̆ng truh tơ Inh.

¹¹ Dang ei Kră Yang 'Bok Kei-Dei ăn teh hiap ih, teh ha 'bơ̆r huch boih pham oh ih đơ̆ng ti ih pơlôch.

¹² Mưh ih choh pơtăm, teh ưh pă pơjing tơmam sa kơ ih boih, ih gô thông mang huang jơ̆p kơ teh.”

¹³ Kain tơl Kră Yang thoi âu: “Tơdrong phak inh trăp dêh, pŭ ưh kơ kĕ.

¹⁴ Âu, năr 'nâu, Ih pơpuh inh đơ̆ng teh âu, inh weh đơ̆ng muh măt Ih, gô thông mang huang jơ̆p kơ teh đak, đơ̆ng noh dah đei bu tơ'bơ̆p inh, sư gô pơlôch inh.”

¹⁵ Kră Yang khan thoi âu: “Ưh kơ trŏ ôh, dah bu pơlôch ih đe gô pơm 'mong plơ̆ kơ sư tơpơh wơ̆t.” Kră Yang đei ăn tơdra tơ akâu Kain, wă kơ mă bu tơ'bơ̆p Kain huay kơ pơlôch.

¹⁶ Na Kain kơdŭn weh đơ̆ng Kră Yang păng oei tơ dêh Not, gah hơlĕch kơ pơgar Êđen.

Adrĕch adrung Kain

¹⁷ Đang kơ noh Kain oei hơdai hăm akăn sư, akăn sư anăp na tơpŭ kon kơdră sư Ênok; Kain pơjing minh pôm pơlei tih anăn pơlei Ênok, kiơ̆ kơ anăn kon kơdră sư.

¹⁸ Đơ̆ng noh Ênok pơjing Irat, Irat pơjing Mêhujael, Mêhujael pơjing Methujael, Methujael pơjing Lêmek.

¹⁹ Lêmek đei akăn 'bar, minh 'nu anăn Adah, minh 'nu anăn Yilah.

²⁰ Adah pơjing Jabal, Jabal pơjing 'bok kơ lu kon pơlei oei lơ anih đe rong sem dơrong.

²¹ Oh sư Jubal, 'bok kơ khŭl kon pơlei reh brŏ păng hlôm 'lal.

²² Gah Yilah kư̆m pơjing Tubal Kain, jing bơngai hơjơ̆m lu tak đao han păng mam kong, bơsei. Oh drŏ-kăn Tubal Kain anăn Nama.

²³ Lêmek đei khan hăm bre akăn sư thoi âu: “Ơ Adah păng Yilah, mơ̆ng nơ̆r inh bĕ. Ơ! Akăn Lêmek, athei mơ̆ng nơ̆r inh. Ơ! Inh gô pơlôch bơngai bu mă sư teh inh rơka, mă khan 'lŏ dah 'lơ̆p.

²⁴ Tơdah Kain tơpơh wơ̆t pơm 'mong, lei Lêmek gô tơpơh-jĭt tơpơh wơ̆t hil 'mong.”

Tơpŭ kơ Set

²⁵ Ađam oei hơdai akăn sư dơ̆ng; sư đei tơpŭ dơ̆ng kơ minh 'nu kon drŏ-nglo sư anăn Set; akăn sư khan, “Kră Yang 'Bok Kei-Dei đei ăn dơ̆ng kơ inh tơpŭ kơ minh 'nu kon drŏ-ngloc nai wă tơplih kơ Abel mă Kain pơlôch boih.”

²⁶ Set kư̆m pơjing kơ minh 'nu kon drŏ-nglo, anăn Ênos. Đơ̆ng năr âu, kon bơngai pơtơm krao khan chă anăn Kră Yang.d