Am 6 - Sơ̆p Hlabơar Nơ̆r 'Bok Kei-Dei

Tơdrong răm truh kơ lu bơngai chĕp kơ̆l Isơrael

¹ Răm-'băm dêh kơ lu đe bu mă oei arih sa đei đe ư-ang lăm pơlei Siôn păng lu bơngai khan kơ sư oei hiôk-hian tơ kông Samari! Răm-'băm dêh kơ lu đe bu mă yŏng mơng chĕp kơ̆l lăm teh đak, mă mônh noh jơ̆ lu adrĕch Isơrael ning-mônh!

² Năm bĕ tơ pơlei Kalneh păng lăng, yak năm bĕ đơ̆ng noh truh tơ pơlei tih Hamat, jur hloi tơ pơlei Gat lu bơngai Philistin. Lu pơlei noh 'lơ̆ng hloh kơ dêh âu hă? Hăm trŏ kơ dêh noh să hloh kơ dêh iĕm?

³ Lu iĕm pơm kơ năr pơmat khan roi ataih, mă-lei pơm ăn kơ tơdrong kơnê̆ rai jê̆ truh!

⁴ Răm-'băm dêh kơ lu bơngai tep tơ giơng bơla păng yon pơdăng jơ̆ng kơpal tang-dŏ iĕm; 'buh sa lu kon triu mă rơih iŏk đơ̆ng lăm khŭl păng 'bet sa rơmo bek đơ̆ng lăm hơdrong.

⁵ Tơpă, lu iĕm hơri nơ̆r kư̆ kă chă pơlăp kiơ̆ kơ brŏ chă pơm brŏ kơdih khan rok thoi pơtao Đawit.

⁶ Lu iĕm huch sik hăm pơnhan mŏng tih, yua pơgang 'bâu phu kăp jên pik tơ akâu wă kơ 'bâu phu kơdih akâu, ưh pă 'blŏk boih tơdrong truh kơ adrĕch Jôsep!

⁷ Yua kơ thoi noh đe gô rôp lu iĕm pơm bơnă adrol hloh kơ lu bơngai mă đe đei rôp, lei na wă kơ ưh pă kơtơ̆ng boih nơ̆r ôr chơt hiôk lu bơngai noh!

⁸ Kră Yang 'Bok Kei-Dei Tih hloh khan thoi âu: Kră Yang pao anăn Sư kơdih păng pơkă khan: Inh areh dêh kơ tơdrong pơang Jakôp păng hil mĭl kơ kơđông kơjăp sư; yua kơ thoi noh inh gô jao pơlei tih âu păng dôm lu tơmam lăm noh kơ lu ayăt.

⁹ Tơdah lăm hnam oei đei pă mơjĭt 'nu, lu sư kư̆m gô lôch pơđĭ.

¹⁰ Tơdah minh 'nu lăm adrĕch adrung jê̆ athei soh akâu lôch noh iŏk ba bĕ kơting sư đơ̆ng lăm hnam; tơ 'nguaih bơngai noh gô apinh bơngai oei lăm hnam: Hăm pă đei bu oei hơdai ih? Sư gô tơl: Ưh pă đei bu boih! Na bơngai kơtum noh khan: 'Nĕ pă pơma 'bơm anăn Kră Yang!

¹¹ Yua kơ Kră Yang khan boih, lu hnam tih gô păk hơlŭng răm đĭ, hnam iĕ gô pơchah reng 'beng.

¹² Iĕm hăm lah ăn kơ aseh kơdâu kơpal tơmo tih? Đe hăm choh rơmo tơ kơpal tơmo? Mă-lei lu iĕm tơplih tơdrong tơpăt jing tơdrong chhŭr nuih păng tơplih plei 'lơ̆ng tơpăt jing plei tăng.

¹³ Lu iĕm bơngai mă chơt hiôk đei blah iŏk pơlei Lôdêbar,a păng khan: Lu nhôn yua jơhngơ̆m pran kơdih na đei iŏk boih pơlei Kanaim;b

¹⁴ Kră Yang Tih Hloh khan: Ơ hnam Isơrael Inh đei ăn boih minh adrĕch adrung iung blah iĕm, lu sư gô teh pơjuă lu iĕm, iŏk đơ̆ng trong mơ̆t lăm tơring Hamat dĭng truh tơ thong đak Araba