YONA 1 - Kalate Zambe Nnomo a Mfefe Mfefé Nkôñelan

Yôna a tube Zambe

¹ Nti a nga kobô Yôna, mone Amitaé na:

² Kôlô'ô si, kele Ninive, beta tison ate; kobô'ô be na: Mbia mimboon miap mi beteya a kui ma e nsoé dis.

³ Ane Yôna a nga kôlô si a tube mise me Nti a ke e tison Tarsis. Ane a nga siliki e tison Yafô, a koone sitima a kele e Tarsis. Nde a nga ya'ane moné dulu, a dañ e sitima na ba be be be ke Tarsis a tube Nti.

⁴ Ve Nti a nga bo na beta évuñulu a vuñ e mañe yôp; sitima a nga li'i tyôtyoé ya kubu.

⁵ Ane bôt ba wulu sitima be nga ko woñ; nde môt ase a nga ye'elan e *zambe wé; ane be nga wua biôm bi mbe sitima e mañ été na sitima a bo éveves. Ve Yôna a nga sis e sitima si, ve bômbô si *a ke ôyo melom.

⁶ Ane nteb'ôsu bewulu sitima a nga subu nye bebé a sili nye na: Amu jé wo ke ôyo? Kôlô'ô si a loone Zambe wôé! Ndô'ôtô na Zambe ate a ye ko bia éngôngo ane bi ne bo te wu.

⁷ Ane môt ase a nga jô nyô mbo'o na: Za'an bi bo *asimba, bi yem za ya be bia a dutu bia nju'u wu. Nde be nga bo *asimba: ane é nga bi Yôna.

⁸ Ane be nga jô nye na: Kate bia ye sa wo wo dutu bidim bi e be bia? Wo bo jé? Wo so vé? Ô ne môte ya si fé? Ô ne mone za ayoñ'

⁹ Ane a nga yalane na: Me ne mone Beyude ma ko Nti woñ, Zambe ya yôp, nyô a nga té mañ a si.

¹⁰ Ane bôt bete be nga dañe ko woñ a sili nye na: Z'avale jam ô nga bo le! Amu be nga yeme na a nga tub asu Nti: amu émien a nga kate be nalé.

¹¹ Ane be nga sili nye na: Bi bo wo aya ndemben mañ ma ye suu ayaa mfa'a wongan? Amu éyoñe te ébien mañ me nga dañe dañ bo ayok.

¹² Nde a nga yalane be na: Nyoñane ma a wua ma e mañ, éyoñe te mañ ma ye bo mia ne mieññ: amu ma yeme na ma ma dutu mia e beta ôkôse nyô.

¹³ Ane bôt bete be nga ve'ele fule sitima na be ke kindik, ve teke ngu amu mañ me nga dañ dañ bo be ayok.

¹⁴ Ane be nga ye'elane Nti a jô na: A Nti, bia ye'elane wo na bi bo te jañ amu ényiñe môte nyô, a te kañese na bi be'e ajô ya metyi me ne te bijô! Amu womien, a Nti, ô boya ane womien wo yene mvaé.

¹⁵ Ane be nga nyoñ Yôna a wua nye e mañ été: ane ayo'o mañ é nga man.

¹⁶ Nde beta woñ a nga dañe bi bôte bete: ane be nga ve Nti mimvean a tiñeti nye metiñ. Kos ja yô Yôna e kindik