MARKUS 3 - Kalate Zambe Nnomo a Mfefe Mfefé Nkôñelan

Yésus a saé môt e môse Sabat

¹ Ane Yésus a nga beta zu nyiin *aba Zambe été. Môt éziñ a mbe valé, wo ô too nye ñyemelan.

² Be nga bole ñhe na be yen, nge a ye kôme saé nye e môse sabbat, éyoñe te ba bi jame ya bo'olô nye.

³ Ane a nga jô môt a mbe nkôte wo na: Kôlô'ô si, za'a zañe bôt va.

⁴ E nde fe a jô be na: Jé ja yian e môse sabbat, ye bo mbamba jam, ye bo mbia jam, ye nyii môt, ye wôé môt? Ane be nga langane bivô.

⁵ E nde éyoñ a nga mane bômane lôbô be a ayok, nleme mintaé a ôlun amu ayete minleme dap. Ane a nga jô môt ate na: Same wo, ane a nga sam, e nde wo ô nga bo nye *mvo'é.

⁶ Ane Befarizieñ a bôte ya ngame Hérôde be nga mane kui atan été été, a bo émo'o avale be ne wosane nye a jañele nye ékok.

Yésus baa ndulu bôt

⁷ Ane Yésus baa beyé'é bé be nga tame wondé a ke nsa'a mañ, ane nkunda bôt ô nga ke so e Galilé wô nga ke wo tôñe nye. E nde fe, ataté Yudé,

⁸ Yérusalém a Idumé a kindi'i Yordane ya yat, a mbôma'ane Tir baa Sidoñ, éyoñe bôte be wô'ôtaneya mam Yésus a mbe a bo'ok, ane beta nsamba bôt a nga zu be nye.

⁹ Ane a nga jô beyé'é na be kômesane nye éfunga, jama bôt a za zu bametane nye a bo nye yemeyeme!

¹⁰ A nga bo ñhe abui bôt *mvo'é, ane ndulu bôt a nga ke bu'i a zu be nye, e ba bese be nga bili akon, be jeñe na be nambe nye.

¹¹ A mimbia minsisim, éyoñe mi yeneya nye, mi nga ku si asu dé, a yôtane na: Wo, ô ne fo'o Mone Zambe.

¹² Ane Yésus a nga bame minsisime mite a abui ayok, na mi bo teke kulane nye.

Yésus a telé Beyé'é awôm a bebaé

¹³ Ane Yésus a nga bet e nkôle yôp, a loon e ba émien a nga kômbô, ane be nga zu be nye.

¹⁴ E nde a nga telé Beyé'é awôm a bebaé na baa be be be tabee a na e mbe a lôm, be ke ba kañete Mbamba Foé,

¹⁵ be nyoñe fe ngule ya titane mimbia minsisim.

¹⁶ Ane a nga telé Beyé'é awôm a bebaé, a yôlé Simon jôé afe na Pierre,

¹⁷ Yakob, mone Zébédé, baa Yôanes monyañe wé, e mbe ki a nga yôlé na Bôanerge, nalé a tinane na bone be zo'oyañ,

¹⁸ a André baa Filip, Bartélémi baa Metias a Thomas, Yakob mon Alfé, Thaddé baa Simon ya Kana,

¹⁹ a Yudas Iskariôt, e nyô a nga koñe nye.

Yésus baa Bélzébul

²⁰ E nde Yésus a nga ke e *nda. Ane jama bôte fe a nga beta sulan, be ntoo teke adii bidi.

²¹ Eyoñe bôte bé be wô'ôya nalé, ane be nga so na ba zu bi nye a ngul; amu be mbe be jô'ô na a ntoo teke fek.

²² Beyeme bekalate ki be nga so e Yérusalém, mfa'a ya nkôle yôp, be mbe be jô'ô na: A bili Bélzébul abum été, a na e ngule njôô mimbia minsisim e nje a titane je mimbia minsisim.

²³ E nde ñhe a nga loone be, be subu nye bebé, a nga kobô be a minkana. Nye na: Aval avé Satan a ne ngule ya titane Satan'

²⁴ Nge éjôé ja salé zañ a kandane mengame-mengam a wosan a ébien, éjôé éte é se ngul ya tebe.

²⁵ A nge *nda bôt ja kaban mengame-mengam a wosan a ébien, *nda bôt éte é se ngul ya tebe.

²⁶ Ajô te, nge Satan a tebe na a wosan émien, a mane kandane mengame-mengam, a se ngule ya tebe, amu e maneya mfa'a wé.

²⁷ Amu na môt éziñ a se ngule ya nyiin e *nda be ngungule môt, a nga sa nye biôm, nge teke taté bi ngungule ôte a mane ka'a wô ngata'a, éyoñe te nje a ye sa nye *nda.

²⁸ Ma kate fo'o mia bebela na, bone be bôt ba ye nyoñe *njaman ya mam *abé mese a *minkobô mi ébiasé mise, abim ese ba ye kobô Zambe,

²⁹ ve e nyô a ye kobô Mfufub Nsisim ébiasé, a se ngul ya bi *njaman akekui nnôm éto,

³⁰ a be'eya mekua me nsem ya nnôm éto. Amu ajô be mbe be jô'ô na: Ke a bili mbia *nsisim.

Beza be ne * nda bôt Yésus'

³¹ Ane nyia wé baa be bobenyañ be nga so, be ntele nseñ, e nde be nga lôme bôte na be ke nye loon.

³² Nkunda bôt ô nga too nye mbôma'ane nyô. Ane be nga kate nye na: Nyua baa be bobenyoñ be tele e nseñ ba, ba yi wo.

³³ Ane a nga yalan a sili be na: Za a ne nyia wom, a bobenyañe bam be ne beza'

³⁴ E nde a nga fombô bôte be nga to nye mbôma'ane, nye na: E nyia wom, a bobenyañe bam e mbe ñhe ba:

³⁵ E môt ase a bo nkômbane Zambe, e nye a ne ma monyañ, nge ka, nge ke nyia.