MARKUS 15 - Kalate Zambe Nnomo a Mfefe Mfefé Nkôñelan

Yésus a ne be Pilat

¹ Alendé tyé é nga lendé, e nde Betuni Benen, Bemvendé, Beyeme-Bekalate a ngumba é koone bekobô mejô, be nga bo émo'o, be mane ka'a Yésus ngata'a, be kelee nye, be ke ve nye Pilat.

² Ane Pilat a nga sili Yésus na: Ye wo fo'o ô ne njôô Beyude? Ane Yésus a nga yalane nye a jô na: E nde womiene wo jô le.

³ Betuni Benen be mbe be bo'olô'ô nye abui mam.

⁴ E nde Pilat a zu beta sili nye na: Ye wô teke yalane jam éziñ? Tame yen abim mam ese ba bo'olô wo di'

⁵ Ve Yésus teke fo'o yalane jôm; ane Pilat a nga semé fo'o.

⁶ Eyoñ ése abôk e né, Pilat a nga bo a su'u be mone mimbô'ô wua, e nyô ba kômbô na a suu.

⁷ Nde môt éziñe kik, jôé na Barabas, nye k'a mbe e minkôm valé a bôte bevok baa be nye be nga kange, a tya'a ékukuma ya wosan éjôé nlam, ane be nga wôé môt ékukuma te été.

⁸ Nkunda bôt ô taté ñhe na wo bet e mfa'a ya yôp, be nga sili na Pilat a bo be aval a zu a bo.

⁹ Ane Pilat a nga sili be na: Ye mia kômbô na me suu mia njôô Beyude'

¹⁰ Amu a mbe a yeme na Betuni Benen be nga zu ve nye Yésus amu *abé nlem.

¹¹ E nde Betuni Benen be nga tindi ékôane bôt na Barabas e nye be viane suu be.

¹² Ane Pilat a nga beta kobô a jô be na: E nde mia yi na me bo nyô mia loone na njôô Beyude aya'

¹³ Bôte be nga yôtan a ngule na: Tyele'é nye e *krôa!

¹⁴ Ane Pilat a nga jô be na: Za mbia jame fo'o a nga bo? Be nga dañedañe yôtan a ngul ése na: Tyele'é nye e *krôa!

¹⁵ Mbôle Pilat a nga jeñe na a bo aval ane jama bôt a sili, ane a nga suu be Barabas, a ve ke be Yésus na be bibi nye minkasa a tyelé nye e *krôa.

Ba jalé Yésus ékate biyo

¹⁶ Ane bezimbi be nga kee nye nseñe ya été, e *nda Ngovina émien, be loone ngume nsamba bezimbi ôse.

¹⁷ Be jalé nye évele ngômesan, be mane fe lôñ ékat biyo, a jalé nye je e nlô.

¹⁸ Be taté ñhe na ba batane nye a jô na: Mbôlô, a njôô Beyude!

¹⁹ Be bibi'i nye nden e nlô, be tu'ii nye menden, be za'a nye ôsu be kute fe meboñe si a buti mesu e tyia.

²⁰ Eyoñe be maneya kpwe'ele nye nalé, ane be nga vaa nye évele ngômesan, be jalé nye mengômesane mé. Be kuii nye atane na ba ke tyelé nye e *krôa.

Ba tyelé Yésus e krôa

²¹ E nde be nga bi môt éziñ, Simon ya Siren na a be'e nye *krôa, a mbe ésaa Alékzandre baa Rufus, nye a lôtôk, a so'o afup.

²² Ane be nga kee nye e Gôlgôta, nalé a tinan na: Vôme ya ékôkoé nlô.

²³ E nde be nga ve nye woon mfulan a mira, ane a nga ben.

²⁴ Ane be nga kabane mengômesane mé, a *zen ya ndoan abia na, be yem e jôme môt ase a ne nyoñ.

²⁵ E *mewolo mela, e nde be nga tyelé nye e *krôa.

²⁶ Ajô ya étom be nga bo'olô nye e mbe ntilane na: Njôô Beyude.

²⁷ Be nga tyelé fe befanga bebaé e *krôa baa be nye, wua e mbo nnôm, nyô mbo'o mbo nga (28).*

²⁸ Eyoñ éte jam e ne ntilan e nga tôéban na: Ane a nga lañeban e nsamba bebo mam *abé.

²⁹ E bôte be mbe be lôtôk ve ke ba ta nye, be me'ete'e minlô be jô'ô na: Hééé! A wo wo tyame Nda Zambe, ô mane fe beta lôñe je ve melu melal étam,

³⁰ suse ñhe si, e vôm ô tyele e *krôa valé, ô nyii womien.

³¹ Avale te fe Betuni Benen baa Beyeme-Bekalate be mbe be kele ba kpwe'ele nye e zañe jab, a jô na: A nga nyii bôte befe, ve a kate nyii émien.

³² Ke Krist ate, njôô ya Israél, a tame ñhe suse si éyoñ ji e vôm a tyele e *krôa, bi yene de a buni. E Bôt baa be nye be nga tyele e *krôa be mbe fe be ta nye.

Awu Yésus

³³ Eyoñ awolo samane e kpwaaneya, ane dibi e nga vin si ése akekui awolo ébulu.

³⁴ Awolo ébulu na, e nde Yésus a nga bete *tyiñ ngu e yôb été, a jô na: Eloi, Eloi, lama sabaktani! Nalé a tinane na: A Zambe wom, a Zambe wom, amu jé ô li'iya ma'

³⁵ Bôte bevo'o ya ba be nga tele valé, awô'ô be nga wô'ô nalé, be nga ke ba jô na: Ye mia wôk, a loone Elie!

³⁶ Ane môt éziñ a nga ke mbil a dube ébubut kusa e sañe woon été, a tyele je ôlé, a same nye wô na a nyu a jô'ô na: Jôka'an, bi tame fo'o yen, nge Elie a ye zu suu nye e si.

³⁷ E nde Yésus a nga koñôlô beta nkoñôlan a *tyiñ ngul e yôb été a suu mvebe.

³⁸ Ane afib éyé ya Nda Zambe e nga nyabé bifase bibaé, aso yôb akui e si.

³⁹ Evet ntete bezimbi é nga tele nye ôsu, ayene a nga yene na a suuya mvebe, e nde a nga jô na: Bebela fo'o, e môte nyuna a too Mone Zambe.

⁴⁰ Binga b'éziñ be mbe fe be fombô'ô be tele ôyab a naléé, e binga bete été Marie ya Magdala, Marie nyia Yakob Etune Môtô baa Yôsé, a Salôma.

⁴¹ Eyoñ Yésus a mbe e Galilé, e mbe be nga bo be tôñe nye a bo nye bisaé. A abui binga afe, e mbe fe baa be nye be nga so a bet a kui Yérusalém.

Ejame mbim Yésus

⁴² Eyoñe ngô'é é nga bo, mbôle a mbe môse ngômesan, nalé a ne na Sabat a too ane akiti,

⁴³ ane Yôsep ya Arimaté a nga suan, a too éwôlô môt e nsamba betyi'i mejô, nye fe a mbe a yange'e éjôé Zambe. E nde a nga bo ayo'o ya ke be Pilat, a ja'é mbime Yésus.

⁴⁴ Pilat a nga kame na, nde a wuya kik. Ane a nga loone évet ntet bezimbi, a mane sili nye nge a wuya ayap.

⁴⁵ Eyoñ a yemeya tyiñe njôô bezimbi, ane a nga ve Yôsep mbim.

⁴⁶ Eyoñ Yôsep a maneya kus ndombo éndelé, ane a nga ke suu mbim e si, a mane vute wô éyé été, a ke bôôé wô e soñ é too mfa'an akôm été, e nde fe a nga tindi akok e *mbé soñ.

⁴⁷ Marie ya Magdala baa Marie nyia Yôsé be nga tu'a fombô e vôm a nga bôôé nye.