LEVITIK 6 - Kalate Zambe Nnomo a Mfefe Mfefé Nkôñelan

Miñye'elan mevale meva e be betuni Ñye'elan ajô * bityi'a bia di'ibane ngumba

¹ Ane Nti a nga kobô Môze a jô na:

² Bendé'é Aron a bone bé na: Atiñ da fombô *bityi'a bia di'ibane ngumba nde di: Bityi'a bia di'ibane ngumba bia ye tabe, e di ata'a metuna'a ngum alu a kui mametyé, nduane ya ata'a metuna'a ja ye yôñ été.

³ Ntuni a ye jaé alô'ô ndombo dé a jaé fe mekuba me ndombo e nyôle jé; a ye vaa asube da kutane nduane ja di'i *bityi'a ata'a metuna'a yôp a kute de e fefel ata'a metuna'a.

⁴ A ye vaa mengômesane mé a jaé mefe asu ya kee asup e minkan atan, e vôm a ne te mvin.

⁵ Nduan ja ye yôñ ata'a metuna'a yôp, ja ye bo te dim. Mametyé mese, *ntuni a ye futi nduane nja'a, a bôé *bityi'a bia di'ibane ngumba été yôp, a a ye di'i avoñ étyi'a ya nlatane ngbwa.

⁶ Nduan ja ye yôñ éyoñ ése teke dim.

⁷ Atiñ da fombô mveane ya mefub nde di: Bone b'Aron ba yiane ve wô asu Nti mesu me lôô be ata'a metuna'a.

⁸ Ntuni a ye kandé, e mveane ya mefub été, ngum doé mbamba avut; mbon a meyemete m'élé ma nyume mvaé me bete e mveane te yôp, a a ye di'i biôme bite ata'a metuna'a yôp, bi too jôme ya simesan é ne mbamba menyum e be Nti.

⁹ Aron a bone bé ba ye di *mebuka'a ya mveane te wo so mefup, ba ye di me e vôm a n'étyi, e nseñe ya *nda éndelé bendôba'an.

¹⁰ Ba ye bo te yame *mebuka'a mete a mvusu. E ngabe me nga ve be e *bityi'a biam bia di'ibane nduan nje le. Jôme te é n'étua étyi aval ane metuna'a ya *njaman abé a ma ma vaa mekua.

¹¹ Fam ése ya bone b'Aron ja ye di *mebuka'a mete. Mvinda ya biyoñ bise nje le asu miaé mienan, mfa'a ya *bityi'a bia di'ibane nduan asu Nti, jôm ése ja ye nambe bie ja ye teléban étyi.

¹² Ane Nti a nga kobô Môze na:

¹³ Mvean Aron ba be bone bé ba ye ve Nti e môse ba ye teléban ñwô wu: kili mbamba avut éla: mveane ya biyoñ bise ñwô le, éfase jia mametyé, éfas évok mamengô'é.

¹⁴ Mveane te wo ye yamban e fulafan été a mbon; wo ye zuu wô ane mveane ya mefup, ñyamane bifus, ô too mbamba menyum e be Nti.

¹⁵ Ntuni ya bone b'Aron a ye wo'obane mbon ya tyendé nye e nye a ye bo mveane ya mefub ôte. E ne mvinda ya biyoñe bise e be Nti. Mveane te wo ye di'ibane ngumba.

¹⁶ Mveane *ntuni ôse ya mefup wo ye di'ibane ngumba; wo ye bo te diban.

Ñye'elan ajô metuna'a asu njaman

¹⁷ Ane Nti a nga kobô Môze na:

¹⁸ Kobô'ô Aron ba be bone bé na: Atiñ da fombô metuna'a ya *njaman nde di: E vôme ba tyi'i étyi'a ja di'ibane ngumba nye ba ye tyi'i étyi'a ja veban asu *njaman ôsu Nti: é ne jôm é n'étua étyi.

¹⁹ Ntuni a ye ve étyi'a asu *njaman, a ye di je; ba ye di je e vôm a n'étyi, e nseñe *nda éndelé bendôba'ane.

²⁰ Jôm ése ja ye nambe minsône mié ja ye teléban étyi. Nge metyi me nga fas a nambe ngômesan, a ye sôb afôla metyi me nga kabetan e vôm a n'étyi été.

²¹ Ba ye bôé vie? ékoon be nga yam'étyi'a te; nge ô ne wu mvot, ba ye sé a su'usu wô mendim.

²² Fam ése ya betuni ja ye di je, é ne jôm é n'étua étyi.

²³ Ve ba ye bo te di étyi'a ése é ne asu *njaman abé nje be nga zuu metyi e *nda éndelé bendôba'an asu mboone mame ya *njaman abé e vôm a n'étyi: ja ye di'ibane nduan.