FILIP 1 - Kalate Zambe Nnomo a Mfefe Mfefé Nkôñelan

¹ Ma Paul a Timôté bi too, ma tili mimfufube mise mi ne be Krist mi too e Filip, ô laté a beteb'ôsu a bediakone bap.

² Mvam a *mvo'é bi bo'o e be mia, bi so'o e be Zambe Esaa wongan a e be Nti Yésus Krist.

Mvean akéva a meye'elan

³ Ma ve Zambe wom akéva éyoñ ése ma simesane mia.

⁴ Eyoñ ése, ma ye'elan ajô denane mia bese. Ma ye'elane fe me va'ak,

⁵ amu ngap mia nyoñ a bia ajô Mbamba Foé, ataté e *môs ôsu a kui den.

⁶ E ndi nleme jam e nje le. Nyô a nga taté mbamba ésaé e be mia a ye ke ôsu a sondô je a kui e môse Yésus Krist wo ye kpwaan.

⁷ E ne fo'o *zôsôô na, me ve mamien ajô denane mia bese. Amu me be'e mia e nleme wom été. Mia bete, ja'an éyoñe minkôme jam, nge ji ya kamane mamien, a ñyemetane ya yemete Mbamba Foé, mia bese mia nyoñe ngabe *mvam é nga vebane be ma.

⁸ Yaa, Zambe a ne ngaa. Ma nye'e mia bese, nye'an ô tii be Yésus Krist.

⁹ A meye'elane mam e mme mana na: Nye'ane wônan ô ke ôsu, a dañe dañ e fek a atyeñ,

¹⁰ ane mia ye yeme kandé e jam da yian. Nde mia ye bo *mfuban a teke bijô e môse Krist a ye so,

¹¹ njalan a bibuma bi *zôsôô bia so bia e be Yésus Krist asu étôtok a nkañane Zambe.

Meyaé me Mbamba Foé

¹² Ma yi mi yeme de a bobejañ: E jam e nga kui be ma e nga viane volô meyaé me Mbamba Foé.

¹³ Ajô te ba yem aba mejô a vôm ase na, me ne mbôk amu ajô Krist.

¹⁴ A bobejañ abui be ne ngule minlem e be Nti amu mbô'ô wom. Ba dañe ve ngu, a bo ayo'o ya kate Mbamba Foé te ko woñ.

¹⁵ E ne fo'o été na bevok ba bo de fulu minyamete a mesengan, ve bevok ba kañete Krist a mbamba ôsimesan.

¹⁶ Bana ba bo a nye'an. Amu ba yeme na, me ne va amu ma kamane Mbamba Foé.

¹⁷ Balé ke ba kañete Krist a nsisime mesengan. Minsôñane miap mi nji bo *mfuban. Ba buni na ba ye dañe beta ve mbô'ô wom nju'u abui.

¹⁸ Ve nalé a nji bo ajô. Amu ja'ane mam mefe me ne été mvus, ja'ane ke na benya mejôô, Krist nye a kañeteban. A ma vak amu nalé.

¹⁹ Amu ma yeme na, mam mete mese ma ye ke suan e nyiane wom amu meye'elan menan a mvolane ya Nsisime Krist.

²⁰ Avale ma dañe yange a ndi *nlem ése me bili, maa ye ke wô'ôson. Ndi nleme jam é ne ngumba. Eyoñe ji aval ane biyoñe bise, Krist a ye wum e nyôle jam, nge ényiñe jam été nge awu dam été.

²¹ Amu mfa'a wom, ényiñe jam é ne Krist, a awu e ne me ma'an.

²² Ve nge nyiñane ya nyiñ e *si nyô wo ve me ngule ya bo ésaé ja ve bibuma, me nji yeme jam ma yiane top.

²³ Fek é ne ma njañan. Me bili nkômbane ya ke, a tabe bia Krist. Nalé a dañe mvaé.

²⁴ Ve ntabane ya tabe *si nyô wo dañe mfi amu mia.

²⁵ Avale ma buni, ma yeme na, ma ye tabe mia bese bebé mfa'a meyaé menan a ava'a ya mbunane wônan.

²⁶ Nde étôto'o mi bili e be Krist ja ye nen amu ma, amu mbulane wom e be mia.

Nyiñan ane Mbamba Foé a ye'ele

²⁷ Ve jame da, nyiñan ényiñ ja yiane Mbamba Foé Krist, nde, nge ma zu yene mia, nge na, me too momo, ma wô'ô be kobô'ô ajô denan, me wô'ô na mi yeme ngu e nsisime wua été. Mi yita'ane bese nleme wua aval ane mbunane Mbamba Foé ô né.

²⁸ Te ko besiñe woñ a jam éziñ; jame te e ne ndeme ja yené ya nkuane wop, a nyô ya nyiane wônan. A jame te da so e be Zambe.

²⁹ Amu a nga mvamane mia mfa'a Krist, Saa ve na mi buni nye, ve na, mi wô'ô mintaé amu nye,

³⁰ éyoñe mia wosan avale mewosan ebien mi nga yene me wosa'an, a, ane mia yem, me ngenane me wosa'an.