EZEKIEL 1 - Kalate Zambe Nnomo a Mfefe Mfefé Nkôñelan

Ezékiél a yen étôto'o Zambe

¹ A nga bo na, mbu mewôm melale, ngone nyini é too melu metan, valé me too nsamba bekee minkôm, mfôm ôsôé Kébar, yôb e nga yombô a me nga yene miñyenane ya be Zambe.

² Mbu tane ya nkeane minkôme njô bôte Yôyakin, ngon é too melu metan,

³ nde ajô Nti e nga litibane b'Ezékiél, e mone Buzi *ntuni e si Bekaldééñ, mfôm ôsôé Kébar a valé nye wo Nti ô nga too be nye.

⁴ Me mbe me fombô'ô a yene na: Évuñulu ôkôs é so'o akôé é dutu'u beta *nkut, nduan é too wô zañ; éfufub é nga bômane nkute te ézezañ y'été ki é bo'o ngeké an'ékpwembé ja faé.

⁵ Betite benyin be nga yené ézezañe ya *nkut ôte be funa'ane bôt.

⁶ Tit ése y'été é mbe é be'e mesu menyin a mefabe menyin.

⁷ Mebo mab me mbe *zôsôô a abo si ya mebo mab é mbe ane di mone nyak, é faék ane nse'ane mvot.

⁸ E meku'u mabe menyin, be nga be'e mo me môt e mefabe si a benyini be nga be'e mesu map a mefabe map.

⁹ Mefabe map me mbe nlatan dina a di avok; tit ése y'été é mbe é wulu'u tetele ôsu vié te fombô li nge li.

¹⁰ Mesu mabe mese me nga funane di môt; bese benyini be nga be'e asu ngbwengbwem mbo nnôm di nyak mbo nga a asu ndôé e be benyini bese;

¹¹ mesu map a mefabe map me mbe, nkandan mfa'a ya yôp; tit ése é nga be'e mefabe mebaé nlatan dina a di avok, nalé fe mebaé me mbe me buti'i nyôle jé.

¹² Jia ése é mbe é kele tetele ôsu vié; be mbe be tôñe mfa'a *nsisim wo kee be éyoñe ba wulu, teke fombô li nge li.

¹³ Betite bete be mbe ane metye'e me nduan éyoñe wo yene be; ane bengôé, a nduan éte é mbe é tyiñela'an e zañe betit; nduan é nga mialan éfufup, a feleves é nga vame nduan été.

¹⁴ Betit be mbe be mate'e mbi a beta bulan ane zo'oyañ.

¹⁵ Eyoñe me mbe me fombô'ô betite bete, nde ma yene minka mi bôô si fefele betit ôsu ya mesu mabe menyin.

¹⁶ Eyeka'a a nkpwase ya minka mite bi nga faé ane édima akok ba loone krizôlit, a minyini mi mbe avale da; éyeka'a jap a nkpwasse wop bi mbe v'ane nka ôse ô nga totane wu ôvo'o été.

¹⁷ Eyoñ mi mbe mi wulu'u mi mbe mi wulu'u minfa'a miabe minyin; mi nji kôñelan éyoñe mi nga wulu.

¹⁸ Ôyabe yôbe ya njiñ elete bityé jab ô mbe éko woñ. Njiñelete étyé jab, mfa'a minka mite minyini mise, é mbe é bili mis mbôma'an.

¹⁹ Eyoñe betit be mbe be wulu'u, minka fe mi mbe mi wulu'u fefele jap; éyoñe betit be mbe be kôlô'ô si a bete yôp, minka fe mi mbe mi bete yôp.

²⁰ Be nga ke mfa'a ôse *nsisim ô nga tindi be na be ke, mfa'a *nsisim ô nga ke; a minka mi nga bet a be amu nsisime betit ô mbe minka.

²¹ Eyoñe betit be nga wulu, minka fe mi nga wulu; éyoñe betit be nga tebe minka fe mi nga tebe; éyoñe betit be nga kôlô si a bete yôp, minka fe mi nga bet a be, amu nsisime betit ô mbe minka.

²² E minlô yôbe ya tit ése, ndame yôp é nga yené é faék ane jôme ja ngemban abui é too e minlô yôbe ya betite bete.

²³ E ndame yôb éte si, mefabe map me mbe ne filim da é beme be di avok a tit ése é nga bili mebaé me nga buti nye; tit ése mefabe mebaé me nga buti nyôle jap.

²⁴ Me nga wô'ô éduñe ya mefabe map éyoñe ba wulu éfunan ane ji beta mendim nge ji tyiñe nyô A-ne-Ngul-ése; éduñe beta zô'é, éfunan ane ji nkane bita; éyoñe ba tebe, be mbe be sili'i mefabe mabe si.

²⁵ Tyiñ é mbe é so'o ndame yôp é mbe minlô miabe yôp; éyoñe ba tebe, be mbe be sili'i mefabe mabe si.

²⁶ E yôbe ya ndame yôbe é mbe be minlô yôp jôm éziñ é mbe été é funa'an édima ako'o ba loone Safir, é funa'an éto njôan; a éve'ela'a môt é mbe éto njôane te yôp.

²⁷ A me nga beta yen mbôma'an a éve'ela môte te, jôm é faék ane nduan; ataté jôm é mbe an'angeteñe dé a kui yôp a ataté jôm é mbe an'angeteñe dé a kui si, me nga yene jôm éfunan ane nduan a éfufup bi bôma'ane nye.

²⁸ Efufub é nga bômane nye é mbe ane ji ntutum ô ne minkut môse mveñ: étôto'o Nti le é nga yené. Ayene me nga yene jame te, nde me nga ku asu é butu si a me nga wô'ô tyiñe môt éziñ a mbe a kobô'ô.