DEUTERONOME 1 - Kalate Zambe Nnomo a Mfefe Mfefé Nkôñelan

Nkôlane ya Sinayi

¹ Mana me ne mejô Môze a nga kobô Israél ase e Yordane yat, e *nkôte si, Araba, zôsôôô a Suf, e zañe Parañ, Tôfel, Laban, Astérôt a Di-Zahab.

² Ataté Hôréb a kui Kadés-Barnéa, dulu e ne melu awôm a da éyoñe wo tyii e zene minkôle ya Séyir.

³ E mbu mewôme nyini, e ngon awômô a jia é too alu da, Môze a nga kobô bone b'Israél aval'ése Nti a nga bendé nye ajô dap.

⁴ Eyoñe te a maneya dañe Sihoñ njô bôte Beamorééñ a nga too Hesboñ, a Ôg njô bôte ya Basañ a nga too Astarôt a Edré.

⁵ E Yordane yat e minje'ese ya Môab, nye Môze a nga taté na a ye'ele metiñe me Zambe: ane a nga jô na:

⁶ Nti, e Zambe wongan, a nga kobô bia Hôréb a jô na: Mi tabeya ôbe ayap e fefele nkôle wu.

⁷ Ajô te tata'ane dulu éyoñe ji; mia ye ke e si minkô e vôme Beamorééñ be too a mevôme Bekananééñ be too: nje'ese Yordan, si minkô, mbi'ili, éfase si ya nké a ékôte mañ; kelan a kui e minkôle mi Libañ, a kui fe Efrat, beta ôsôé.

⁸ Mi lôô me veya mia si éte. Kela nyoñane je, amu e si ma, Nti, me nga tiñeti na ma ye ve bimvame bienan Abraham, Izak a Yakob, a e mvoñe bôte jap éyoñ be maneya wu.

Môze a telé betyi'i mejô

⁹ Nde me nga kate mia na: Me nji kômbô beta be'e mbe'e ya wulu mia étam.

¹⁰ Nti, e Zambe wônan a maneya fôlô mia abui, mi ntoo abui éyoñe ji fe v'ane ateté e ne yôp.

¹¹ A e jam ma yi na nge da boban e ne na Nti, e Zamba bimvame bienan, a dañe beta fôle mia a lôte toyini biyoñ a botane fe mia avale a nga tiñeti!

¹² Mia yiane yeme na me nji bo nguleya be'e mbe'e ya kôme mame menan, minkômbane mienan a bitome bienan.

¹³ Ajô te toban ézezañe jenan, ayoñ ése été, e bôt be ne fek, atyeñ, be bili mbamba jôé, me telé be be bo ésaé e be bôt.

¹⁴ Mi nga yalane ma na mboone te wo yian.

¹⁵ Mfa'a ya wulu mia, nde me nga sulan e bôt be ne fek, be bili mbamba jôé, be too fe ba be tameya be'e mimbe'e miziñ e meyoñe menan été; me nga telé bevok bivete ya toyini, ntet, mewôm metan nge bôt awôm.

¹⁶ Eyoñe te fe me nga ve miñye'elan e be bôte be nga yiane tyi'i mejô ézezañe jenan me jô'ô na: Taba'ane ntyel mfa'a ya bitome bobenyoñ be ne zu kate mia; mia yiane tyi'i mejô zôsôôô e zañe môte y'Israél a monyañ nge e zañe jé a nneñ a too be mia.

¹⁷ Te boone ôbangam e ntyi'ane mejô wônan été; mia yiane vô'ôlô ayôme bôt a beta be bôt teke ngam. Môt éziñ a bo'o te ndaman ntyele wônan, amu mia yiane tyi'i mejô a jôé Zambe. Nge ajô éziñ da dañe mia ayaé, mia yiane zuu ma de, éyoñe te ma ye fase de.

¹⁸ Eyoñe te me nga liti mia e jam mia yiane bo.

Israél a bo Melo e Kadés

¹⁹ Nkôlan bi nga kôlô Hôréb, nde bi nga tulan e beta anen a éko woñe *nkôte si wuna ôse ñwô miabebien mi nga yen; ane bi nga tôñ e zene ja ke si minkô nje Beamorééñ be too. Eyoñ bi nga kui e Kadés-Barnéa,

²⁰ me nga jô mia na: Mi lôô mi kuiya e si minkôle Beamorééñ, nje Nti, Zambe wongan, a ve bia.

²¹ Fomba'an, Nti, e Zambe wônan a bôéya *si nyô ôsu vienan. Ajô te kelan mi nyoñe je, avale Nti, e Zamba bimvame bienan, a nga ve mia je. Bo'on ayok a ngu!

²² Nde mi nga zu yene ma bese a jô na: E nlômane bôt ôsu be ke looé si. Esaé jap é ne na be zu kate bia mezen bia yiane wulu a bitison bia ye kui.

²³ Me nga yen ôsimesane vienane mvaé; ajô te me nga tobe bôt awôm a bebaé e zañe jenan, ayoñ ése môte wua.

²⁴ Be nga ke mfa'a ya si minkô a kui mbi'ili Eskol a looé wô.

²⁵ Be nga kolé bibuma ya si éte a zu ve bia bie. Be nga kate bia na e si Nti e Zambe wongan a ve bia é ne mbamba si.

²⁶ Ve mi nga bo njôane Nti, e Zambe wônan melo, éyoñ mi nga bene na mia ye bo teke ke si éte.

²⁷ Mi nga ben e menda bindelé menan été a jô na: Amu Nti a vini bia nde a nga vaa bia Ejipte. A kômbô futi bia éjôé Beamorééñ si na be mane wôé bia!

²⁸ Amu jé bia yiane ke wé? Bi nji bi ngule nleme ya ke, amu bobejañ be nga tu'a kate bia na bôte ya si éte be ne ngu a meyap a dañe bia, a na bitison bi ne biwôlô, mimfine miap mia bet a kui yôp. Be nga yene fe bone be ayabe môt ba loone Anak.

²⁹ Eyoñe te me nga yalane mia na: Te nyeñban a te koone be woñ!

³⁰ Nti, e Zambe wônan, nyô a wulu ôsu vienan, a ye wosan asu denan, avale a tameya bo e mise menan me lôô: Ejipte,

³¹ nge *nkôte si. Mi nga yene de na: A nga be'e mia ane môt a be'e e mone wé, nté ôse mi nga wulu e dulu e nga kui mia e vôme nyô.

³² V'éyoñe te ébien, mi nji ke tabe Nti, e Zambe wônan ndi.

³³ Ve da na, e Nye a nga ke mia ôsu e zene jenan a jeñe mia vôm mia ye vule minkan; a alu a mbe e nsume nduan été a faé éfufup e zene mia yiane wulu; a amôs a mbe nsume *nkut été.

³⁴ Eyoñe Nti a nga wô'ô *minkobô mienan, nde a nga jô ayaa dé été na:

³⁵ Ma kane ngana na: Teke wua ya bôte ya miaé ô n'abé wu a ye nyiin e mbamba si me maneya tiñeti na ma ye ve bimvame biap.

³⁶ Kaléb étam e mona Yefuné nye a ye je yen; ma ye ve nye a mvoñe bôte jé, éfuse si a nga wulu, amu a nga wulu ane da yian e mfa'a wom.

³⁷ Amu mia, Nti a nga yaa fe ma a jô na: Wo fe wo ye bo teke nyiin e si éte.

³⁸ Ve mbo ésaé wôé, Yasua e mona Nun, nye a ye nyiin été. Va'a nye ngule *nlem amu nye a ye wulu bone b'Israél be nyoñe si.

³⁹ Wôna Nti a nga jô mia bese na: Mi nga jô na e bone benan ba ye bo jôme ya nsa e be bôt ba ye dañe mia. V'amu be be ngenan te yeme kandé mvaé a *abé den, ajô te ba be Yasua ba ye nyiine si ete. Mbe ma ye ve je é bo énjap.

⁴⁰ Ve mia, bula'an e *nkôte si, e zene ya évele mañ.

⁴¹ Nde mi nga yalane ma na: Bi kobeya e mise me Nti. V'éyoñe ji bia kômbô ke wosan, avale Nti, e Zambe wongan a jôya. Môt ase ya be mia a nga nyoñe biôme mewosan, amu mi nga buni na e ne tyi'ibi na, mi nyoñe si minkô.

⁴² Nde Nti a nga jô ma na: Jô'ô be na be bo teke bita, amu me nji ke bo e nsamba wop; ajô te be bo'o teke na, besiñe bap be bôme be.

⁴³ Ane me nga kate mia njôane te, ve mi nji ke kômbô wô'ô ma. Mi nga bo njôane Nti melo, a njalan a ébiasé, mi nga ke e si minkô.

⁴⁴ Ane Beamorééñ be nga so mevôme be too minkôle yôp, a wosane mia, a bôé mia afôla si ya Séyir; be nga titane mia ane mbame mvôfôm, a kui Orma.

⁴⁵ Eyoñ mi bulaneya, mi nga taté na mia yône be Nti, v'a nji ke kômbô vô'ôlô jam éziñ, a nji ke tabe ntyele ya vô'ôlô mia.

⁴⁶ Ajô te mi nga tabe ayap, étua ayap e Kadés Barnéa.