2 Pi 1 - Kalate Zambe Nnomo a Mfefe Mfefé Nkôñelan

¹ Ma, Simon Pierre mbo ésaé a *nlôman Yésus Krist, ma tili e ba be nga nyoñ avale étôto'o mbunane da ane éñwongan, amu *zôsôô Zambe wongan a Nyii wongan Yésus Krist.

² Mvam a *mvo'é bi bo'o be mia abui abui amu ñyemane Zambe a Yésus Nti wongan.

Nloone ya belane mefulu bekristen

³ Ngule Zambe é nga ve bia e mam mese ma yian asu ényiñ a mbunan, e vôm é nga bo na bi yeme nyô a nga loone bia na bi bo benyoñe ngabe ya étôto'o jé a e ngule jé ja fô'ôsan.

⁴ Amu étôtok a e ngule jé bite nde akum é ne beta tañ, ngaka'a mfa'a wongan, é nga vebane be bia; ndembene mia ye nyiine fufulu ényiñ a éyeka'a Zambe amu akume te, valé mi vasebaneya, a ngul ése, ébol ényiñ, nje minyamete mia ve *si nyô ane bidi.

⁵ A amu amu ate émien nde ñhe, éyoñe mi maneya fulan e ngule jenan ése, a latane mbunane wônan a mbamba mefulu; mbamba mefulu a ñyeman,

⁶ ñyeman a njôane miabebien; njôane miabebien a mban; mban a ntaban ane bebuni;

⁷ ntaban ane *bebuni a amvôé bobenyañ; amvôé bobenyañ a nye'an.

⁸ Amu nge mi bili mbamba mefulu mete abui abui, me se nguleya jô'é mia te fô'ôsan nge minkôkôm asu ya yeme Yésus Krist Nti wongan.

⁹ E ne été na, nyô a nji bi me a ne e ndindime wo bôp: a vuane na a nga tuneban e mfa'a mam *abé mé ya melu Kôa.

¹⁰ Ajô te a bobejañ, beta'a yemane ngu, asu ya yemete nloone wônan a ntobane wônan; éyoñe mia bo nalé, teke mbia jam éziñ a ye kui na mi ku.

¹¹ Eyoñe te ñhe, e bebela été, e nyiane ya nyiin nnôm éto éjôé Nti wongan a Nyii wongan Yésus Krist, wo ye vebane be mia akap.

Mewô'ô mejô minlôman a bekulu mejô

¹² Me bili nkômbane ya ba'alane mia de, akôsa bo mia yem a tebe ngul e benya mejôô ya éyoñe ji.

¹³ Ve ma buni na, e ne *zôsôô nté me vee *si nyô na, me fô'ô mia éyoñ ése a mba'alane ma ba'alane mia mam mete.

¹⁴ Amu ma yeme na, me mbeme kandan ébeme jam avale Nti wongan Yésus Krist a nga liti me de.

¹⁵ Ve ma ye jeñ éyoñ ése na, e mvuse nkôlane wom, mi bo ngule ya ba'ale miñye'elane mite.

¹⁶ Bi nji bo mia na mi yem éwôlô nzuane Nti Yésus Krist a zene ya abeñe minkañete, ve a ñyenane bi nga yene nye a mise mangan étôto'o jé été.

¹⁷ Amu a nga nyoñe duma a étôtok e be Zambe Esaa éyoñe *tyiñ é nge so abeñ étôto'o Zambe é jô'ô na: Nyôna a ne mone wom ma dañe nye'e me futiya ndi nleme jam ése be nye.

¹⁸ Biabebien bi nga wô'ô *tyiñ éte é so'o yôp éyoñe bia be nye bi nga too nkôl ô ne étyi.

¹⁹ Ajô afe na, bi bili nkobô bekulu mejô, ñwô ô ne bia mbôka'a, mia kabe, éyoñ mia beme mise menan été aval ane e lampe a faé e vôm a ne dibi, akekui éyoñe *môs wo sa a ôteté ya mame tyé wo téé e minleme mienan été.

²⁰ Osusua, tata'a yemane de nya ñyemane na, teke nkulane mejô ô ne e kalate Zambe été ô ne ajô atyeñe môt éziñ;

²¹ ve bebela na, sake nkômbane môt ñwô wo soo nkulane mejô, ve bôt be nga ve bôt be nga kobô señe Zambe a ngule Mfufube Nsisim.