2 Ko 1 - Kalate Zambe Nnomo a Mfefe Mfefé Nkôñelan

Ntili kalate a mebatan

¹ Paul, nlômane Krist Yésus, amu nkômbane Zambe, a mojañe Timôté ma tili keké Zambe é nee Korént a mimfufube mise mi nee Akayi ase.

² Mvam a *mvo'é bi bo'o e be mia, bi so'o be Zambe Esaa wongan a Nti Yésus Krist.

Mvean akéva e mvuse njuk

³ Zambe a bo'o ébotan, Esaa Nti wongan Yésus Krist, Esaa a ne nko éngôngo, a Zambe a ne *mvolô minlem mevale mese;

⁴ a volô'ô bia minlem alune dangan ese été, ane bia fe bi ne volô ba ba wô'ôlun minlem a mvolane minlem bia bebien bia nyoñ e be Zambe.

⁵ Avale mintaé mi Krist mi ne abui asu dangan, avale te fe, amu Krist, mvolane minleme wongan ô ne abui.

⁶ Ye bi ne e minju'u été? E ne amu ajô mvolane minleme wônan, a nyiane wônan. Ye bi ntoo mvolebane minlem? E ne amu mvolane minleme wônan ñwô wo bo mia na mi jibi avale mintaé ebiene bia fe bia jibi.

⁷ A e ndi minleme jangan, mfa'a wônan, é yeme ngu. Bia yeme na, éyoñe mia kaban minju'u miangan, mia kabane fe e mvolane minleme wongan.

⁸ Amu na, a bobejañ, bi nji kômbô mi dimi e jame di na: ñwuane bi nga ye wu Azi ô nga bebe bia yôp a lôte nné, a lôt abime ya ngule jangan, a kui vôme ya jañele ndi minleme ya beta ényiñ.

⁹ Yaa, bi nga nyoñe ntyi'ane y'awu dangan e be bia bebien été. Ajô te, bi mbe te fe ngule ya beta tabe bia bebiene ndi, ve be Zambe, nyô a wômôlô miñwuan.

¹⁰ Nye a nga vaa bia aval awu te été, a ye fe beta vaa bia de été; bi futiya ndi minleme jangan e be nye: a ye beta vaa bia de été.

¹¹ Mia fe, mia nyoñe ngab ésaé été, éyoñe mia ye'elan ajô dangan. Ajô te e *mvam bia ye nyoñ amu meye'elane me beta ngabe bôt, ja ye bo e be abui y'été e mvean akéva wo volô bia.

¹² Amu jame bia nguane de e ne tyiñe mone môte ya minleme miangan été na: Bi nga nyiñ e si nyôna été, a dañedañ e zañe jenan, a ényiñe Zambe é ne tyi'ibi a *mfuban saa fe'e bôt, ve a mvame Zambe.

¹³ Bi nji tili mia jam afe, ve di mia lañ a wôk. Ve ma buni na mia ye mane wô'ô bia,

¹⁴ amu mi nga taté wô'ô bia éfas: bi ne e ba mia yiane nguane be avale mi né mfa'a wongan e môse Nti Yésus.

¹⁵ A, e ndi nleme te été, me nga taté kômbô zu be mia a nyoñe mia mvame baa,

¹⁶ nkôlane ya be mia, me kele Masédôan, me beta kôlô Masédôan a zu be mia, nalé mia ye bo e ngômesan ése ja yian asu dulu dam e Yudé.

¹⁷ Ye ma yené ôngbwatengbwat éyoñ ma nyoñe ntyi'ane wu? Nge na, ye asimesane dam e ne ve di bôt, avale ya na, éyoñe jia, yaa a momo be nga yené be ma'

¹⁸ Zambe a ne me ngaa, nkobô wongan, asu denan, ô nji bo yaa a momo.

¹⁹ Amu mona Zambe, Krist Yésus bi nga kañete be mia, ma Silveñ a Timôté, a nji bo yaa a momo, a zu a bo kom ése ve yaa!

²⁰ A mengaka'a me Zambe mese me ne yaa e be nye. Amu nye, nde bia jô *amén e be Zambe asu duma dé.

²¹ Nyô a ve bia be mia ngu e be Krist, a nye a wo'o bia mbon: a ne Zambe,

²² nyô a nga ba'é bia sitame jé, a futi betufa be Nsisim e minleme miangan été.

²³ Mfa'a wom, ma nyoñe Zambe ane ngaa ényiñe jam, me nga bo te beta zu Korént, asu ya volô mia.

²⁴ Saa na, bia jôô mbunane wônan, ve bia nyoñe ngap ava'a denan été, amu, ajô mbunan, mi yeme ngu.