2 Jn 1 - Kalate Zambe Nnomo a Mfefe Mfefé Nkôñelan

¹ Ma, *mvendé, ma tili Nganti a ne ntoban a bone bé ma nye'e éfufup ya e benya mejôô été. A saa ve ma étam, ve nalé fe ba bese be bili ñyemane benya mejôô,

² amu bebela a too e be bia a kui nnôm éto.

³ Mvam, nkoon éngôngo a *mvo'é, bia ye tabe e be bia, bi so'o e be Zambe Esaa a e be Yésus Krist Mone Esaa, e benyaa mejôô été, a e nye'an été.

⁴ Me nga wô'ô angôndô ya beta mevak ya yene bone bôé ba wulu e zene benya mejôô été, aval ane abendé bi nga nyoñ e be Tate e né.

⁵ Wôna éyoñe ji ma sili wo de a Nganti. Teke tili tili wo mfefé *atiñ ve di bi bili a so atata'a. E nye'esa'an, wua a nyô mbok.

⁶ Nye'an ô ne na, bi wulu e metiñe mé été. Nalé nye a ne *atiñ bi nga wôk a so atata'a na, mi wulu e *zen éte été.

⁷ Amu bedu'u bôt be maneya mialane *si nyô. Be nji mem mbunane na Yésus Krist a nga zu bialé minsôn. Ndu'u bôt a *nsiñe Krist nye ñhe le!

⁸ Ba'alane ñhe miabebiene na, mi bo te jañele bibuma ya biyaé bienan, ve na, mi nyoñe ma'ane menan ngum.

⁹ E nyô a zembe ôsu, te tabe nye'elane Krist été a nji bi Zambe. E nyô a too nye'elan Krist été, nye a bili Esaa baa Mon.

¹⁰ Nge môt éziñ a zu e be mia ve te bi nye'elan ôte e be émien, te nyoñane nye *nda jenan, nge tame nye mbamba nsoone zañe jenan,

¹¹ nyô a nyoñe ngabe mbia mimboone mié.

¹² Me bili mam abui ya tili mia, ve me nji kômbô tili mia me a nkôs. Amu me too ndi na, ma ye zu e be mia a kobô mia a tyiñe jam, nalé ava'a dangan da ye jaé ne lut.

¹³ E bone be monyañe wôé a ne ntobane Zambe, ba batane wo.