1 Bb. 1 - Kalate Zambe Nnomo a Mfefe Mfefé Nkôñelan

David baa ngone Sunamite

¹ Eyoñe te njô bôte David a ntoo nnôm abui, njalan a mimbu, be nga vute nye mimfinga, ve nyôle jé teke nyoñ ayôñ.

² Nde bebo bisaé bé be nga jô nye na: Ba yiane jeñ éndune ngone minga asu njô bôt e masa wom, a ye saane njô bôt, a ye bo nye ane ngal, a ye bômbô wo e tôé, nalé njô bôt, e masa wom a ye wô'ô nyôl ayôñ.

³ Be nga jeñ abeñ ésoé ngone minga e si ése ya Israél; ane be nga yen Abisag, ngone Sunamite, nde be nga zuu nye e be njô bôt.

⁴ Esoé ngone minga te é mbe étua abeñ, é nga voñôlô njô bôt a saane nye. Ve njô bôt a nji ke fulane nye énoñ.

Adôniya a kômbô nyoñ éjôé

⁵ Adôniya e mona Agit a nga bili beta ôsimesan a jô'ô na: Ma ma ye jôô. A nga bili vagoñe bita wua, bikabela a bôte mewôm metan ba ke nye mimbil ôsu.

⁶ Nté ôse David a nga vee, a nji komekan Adôniya *môs éziñ a jô'ô nye na: Amu jé wo bo avale di? Nalé fe na nye fe a mbe abeñ abui, nyia a nga biaé nye e mvuse Absalom.

⁷ A nga kui *tyiñ a Yôab, e mona Séruya, a kui fe *tyiñ a Abiatar, ntuni; bebaane be nga su'u nye si.

⁸ Ve bôte bana be nji ke bo e ngame Adôniya: *ntuni Sadok, Benayahu e mona Yehôyada, *nkulu mejô Natan, Siméyi, Réyi a biwôlô bi bôte mewosane David.

⁹ Ane a nga tyi'i mintômba, beyôm benyak a bitoñe benyak bi n'avem asu metuna'a bebé ako'o zôhélét e ne fefel anjeñe Rôgél, nd'a nga bañete bobenyañe bé bese bone be njô bôt a e bôte bese ya Yuda be nga saane njô bôt.

¹⁰ Ve a nji ke bañete *nkulu mejô Natan, nge Benayahu, nge biwôlô bi bôte mewosan, nge monyañe wé Solômon.

¹¹ Ane Natan a nga jô Batséba, nyia Solômon na: Ye ô nji wô'ô na Adôniya e mona Agit, a ntoo njô bôt a na e masa wongan David a nji yeme jame te'

¹² Ajô te za'a éyoñe ji, me lebe wo e jam wo yiane bo, nalé wo ye kaman ényiñe jôé a ji mone wôé Solômon.

¹³ Kele be njô bôte David a jô nye na: A njô bôt, e masa wom, ye ô nji kane mbo ésaé wôé a ne minga ngana na: E monafame wôé Solômon a ye jô'ô e mvuse jam a nye a ye tabe éto njôane jam? Amu jé Adôniya a ye viane jôô'

¹⁴ Nté mia njô bôt mia ye laan, mamien ma ye nyiin e mvuse jôé a yemete mejô môé.

¹⁵ Nde Batséba a nga ke étune *nda njô bôt. Valé njô bôt a ntoo étua nnôm, a Abisag, ngone Sunamite, é mbe é saane njô bôt.

¹⁶ Ane Batséba a nga vitibi a kute meboñe si ôsu njô bôt Njô bôt a nga sili na: Jé'

¹⁷ Batséba a nga yalane na: A masa wom, ô nga kane mbo ésaé wôé a ne minga ngana ô kala'ane Nti, e Zambe wôé, ajô mone wôé Solômon na: A ye jôô e mvuse jam, e nye a ye tabe éto njôane jam.

¹⁸ V'éyoñe ji, Adôniya nye ñhe a ntoo njôô, womiene njô bôt e masa wom, teke yeme nalé!

¹⁹ A maneya tyi'i beyôm benyak, bitoñe benyak bi n'avem, mintômba te alañé, a a maneya bañete bone be njô bôte bese, nalé fe *ntuni Abiatar a Yôab évete mewosan, ve a nji ke bañete mbo ésaé wôé Solômon.

²⁰ Ve mfa'a wôé, a njô bôt, e masa wom, e mise m'Israél ase, me lôô ve wo na, ô kat e môt a ye tabe éto njôan, e mvuse njô bôt, masa wom.

²¹ Eyoñe masa wom njô bôt a bômbôya e vôm b'ésaa be bôô, bia mone wom Solômon bia ye lañeban ane benyoñe mekua.

²² A ngenan a kele ôsu a kobô baa njô bôt, ane *nkulu mejô Natan a nga suan.

²³ Nde be nga kate de njô bôte na: Nkulu Mejô Natan a soya! Ane a nga kui vôme njô bôt a nga too, a kute meboñ asu be njô bôt, asu e butu si.

²⁴ Eyoñe te Natan a nga jô na: A njô bôt e masa wom, nde wo ñhe ô nga jô na: Adôniya a ye jôô mvuse jam a nye a ye tabe éto njôane jam!

²⁵ Amu na den a te sis, a tyi'i beyôm benyak, bitoñe benyak bi n'avem a mintômba te alañé, a te fe bañete bone be njô bôt bese, bivete mewosan a *ntuni Abiatar; awolo di ba di a nyu ôsu vié be jô'ô na: Ényiñe njô bôt Adôniya é bo'o ayap!

²⁶ Ve a nji bañete to'o ma me ne mbo ésaé wôé, nge *ntuni Sadok, nge Benayahu e mona Yehôyada, nge mbo ésaé wôé Solômon.

²⁷ Ye tine ya ajô di é ne fo'o be njô bôt, e masa wom, ye wo te fe bo na mbo ésaé wôé *a yem e môt a ye tabe éto njôan mvuse njô bôt e masa wom'

²⁸ Ane njô bôte David a nga yalane na: Lo'one ma Batséba. Nd'a nga nyiin a tebe ôsu njô bôt.

²⁹ Eyoñe te njô bôt a nga kane ngana a jô na: Ane Nti a vee, Nyô a nga kôté ma éto ôlun ése,

³⁰ a aval'ane me nga kane wo de ngana me kala'ane Nti e Zamba Israél na: E mone wôé Solômon a ye jôô e mvuse jam a a ye tabe éto njôane jam éjiane jam, avale te fe ma ye bo môse wu.

³¹ Nde Batséba a nga vitibi asu e luu si, a kute meboñ asu be njô bôt a jô na: Ényiñe njô bôte David, e masa wom, é tabe'e nnôm éto!

David a tobe Solômon éjiane jé

³² Ane njô bôte David a nga jô na: Lo'one ma *ntuni Sadok, *nkulu mejô Natan a Benayahu, e mona Yehôyada. Nde be nga nyiin e vôm njô bôt a nga too;

³³ Njô bôt a nga jô be na: Nyoñane bebo bisaé be masa wônan, éyoñe te mia ye tooé e mone wom Solômon e tite jame yôp a siliki nye e Giyôn.

³⁴ Vôm ate *ntuni Sadok a *nkulu mejô Natan ba ye wo'o nye mbone ya bo njô bôte ya Israél. Mia ye loñe toñ a jô na: Njô bôte Solômon a tabe'e nnôm éto!

³⁵ Mia ye zu nye mvus; a ye zu tabe éto njôane jam, a nye a ye jôô éjiane jam. Me teléya nye nliti zene ya Israél a Yuda.

³⁶ Ane Benayahu, e mona Yehôyada a nga yalane njô bôte na: Amen! Avale Nti, e Zamba njô bôt masa wom a jô, nde le.

³⁷ Avale Nti a nga too be njô bôt masa wom, avale te fe a ye tabe be Solômon; a ye nene éto njôane jé a dañe ji njô bôte David e masa wom.

³⁸ Ane Ntuni Sadok, *nkulu mejô Natan, Benayahu e mona Yehôyada, Bekérétieñ a Bepelétieñ be nga sis; nde be nga tooé Solômon e tite njô bôte David yôp a siliki nye e Giyôn.

³⁹ Ane *ntuni Sadok a nga nyoñe nla'a mbon e *nda éndelé a wo'o wô Solômon. Nde be nga loñe toñ, a bôte bese be nga jô na: Ényiñe njô bôte Solômon é bo'o ayap!

⁴⁰ Ane bôte bese be nga tôñe nye mvus a bôte bese be nga bôme biôm a bo mevak abui; si é nga fô'ôsan amu ayenga dap.

⁴¹ Adôniya a bôt a nga mane bañete be nga wô'ô zô'é éte valé be sondô'ô mane di; Yôab a nga wô'ô tyiñe toñ a sili na: Amu jé e zu'uzu'u nyô e tison été'

⁴² A ngenan a kobô'ô, ane Yônatan e mona *ntuni Abiatar a nga suan. Adôniya a nga jô nye na: Za'ak, ô n'éwôlô môt; teke fe'e na ô bili mbamba foé ya kat.

⁴³ Yônatan a nga yalan Adôniya na: Teke jôm! Njô bôte David, e masa wongan, a te telé Solômon njô bôt!

⁴⁴ Njô bôt a te lôme baa be bôte bana nsamba: *ntuni Sadok, *nkulu mejô Natan, Benayahu e mona Yehôyada, Bekérétieñ a Bepelétieñ; ba te tooé nye tite njô bôte yôp.

⁴⁵ Ntuni Sadok a *nkulu mejô Natan ba te wo'o nye mbone ya bo njô bôt e Giyôn; Ba te so wé abui mevak été; a tison ése ja te fubu meva'a mete été: zô'é éte nje mia te wôk.

⁴⁶ A Solômon a tabeya tabe éto njôane yôp;

⁴⁷ jam afe na bebo bisaé be njô bôt ba te zu botane njô bôte David e masa wongan be jô'ô na: E Zambe wôé a bo'o jôé Solômon é wum a dañ éndôé, a nene'e fe éto njôane jé a dañ énjôé. A njô bôt a te kute meboñ énoñe jé,

⁴⁸ a kobô avale di na: Nti, e Zamba Israél a bo'o ébotan amu a veya môt éziñ e môse wu na a tabe éto njôane jam a amu mise mam me kômeya yene de.

⁴⁹ Ane bôte bese Adôniya a nga bañete be nga ko woñ, ve kôlô si a tup môt ase e zene jé.

⁵⁰ Adôniya, amu woñ a nga ko Solômon, a nga kôlô si a ke bi minla'a mi ata'a metuna'a.

⁵¹ Nde be nga kate Solômon na: Tame yen Adôniya, amu woñ a ko njô bôte Solômon, a keya bi minla'a mi ata'a metuna'a a jô'ô na: Njô bôte Solômon a kane ma ngana e môse wu na a ye bo te wôé mbo ésaé wé a nkpwaté mekôn.

⁵² Ane Solômon a nga jô na: Nge a wulu ane da yiane nya môtô, kongo ésile jé jia ja ye bo te ku si; ve nge mon *abé éziñ a ne be nye, a ye wu.

⁵³ Ane njô bôte David a nga lôme bôt be ke vaa nye ata'a metuna'a. Nd'a nga zu kute meboñe si ôsu be njô bôte Solômon, a Solômon a nga jô nye na: Bula'an e *nda jôé.