Yakubu 1 - Ɓwaatiye New Testament

Wunakaha

¹ Hɨnə Yakubu, kɨsa da Həmɨnpwa ka Həmɨmiye Yesu Ma Həmɨnpwa a Yaɓwarən. Na dɨ wunaka kwirə mi Israila inə bəw a mbiɗi-kpe, a ji-kotte a vor Yawude 'ye fɨli mbəgə hee kat a vɨratə.

Kanaha ka kadawe

² Ji-nuwo a hwun myee dɨ koɗə Həmɨnpwa, nagi goɗi hwuna pɨrə vor mbali kanahe som-som, zəm ɗam hanɨngtə ka hubosəwnə hiɗə,

³ gəkɨlə hwun leyə atɨ kanate mya dɨ kana mwadiyale dəwnə ɓa gwadəwnə hwuna gə ka mbasɨtə.

⁴ Mbasɨtɨngɨn mgban a dɨ gwadə ma nda gəə ɓwaara pepeyə kat taa asə də ɗwangashe.

⁵ Anda ama nee a vorsəwnə a ma ɗongə lele, mangɨn a nyisə Həmɨnpwa ndi ma dɨ vədə se tɨfəngɨn a wuntə aa ka kyewtə, ndi ɓa və mangɨn leləngɨn.

⁶ Naa mangɨn a nyisə ka hubosən hiɗə ɓe ndaa ɗa ndəle, gəkɨlə ma dɨ ɗa ndəle nə ɓətɨ ɗogoli hawo gbɨnuwtɨ sɨkorən, a wule a hawe a dɨ tuwakan.

⁷ Ɓe wule ma ka ndəle kan a kana atɨ ndi ɓa ɗɨm asə a luwo dɨ haka Həmɨmiye,

⁸ sɨnə wule ma ɗyangale dan a təkə kpe ka ndəle, ndaa kangə nə se hiɗə.

⁹ Ndɨka nzə-kottə, a wule ma nzə-poriti taa asə kan, a ɗa hanɨngtə ka wule fukate Həmɨnpwa a vən.

¹⁰ Ndi nzə-gɨnətə mgban, ndɨka nda ɗa hanɨngtə ka hyatate Həmɨnpwa a hyatan a vor kottə, gəkɨlə gɨnətə kat ka həmɨrə tənə ɓətɨ fintɨ kaakə, tən ɓa lɨɓɨkə a kpamə a kɨɗə a pɨrə.

¹¹ Gəkɨlə fəre a dɨ fɨla a nggɨra a pwa a shifa kul-kul, shifasən a hina kaake, fintɨ kaake a kəji, wulasən a mbəə ɓaa. Sə mgban nzə-gɨnətə ɓa mbəə ɓaa a mgba ɨl gɨnətə.

¹² Pepeta Həmɨnpwa nee a nə ma ka mbasɨtə a vor kanaha, ndi kana mbasɨsən a zə kpawtɨ le ndi ɓa luu moonə myente kaaru-kaaru. Sɨnə moona Həmɨnpwa a bwe ləngɨn a nzadən gə le da myee dɨ mworən.

¹³ Ɓe ma mya kanarən ka kadawe aa sa atɨ, “Həmɨnpwa nə kanarən ka kadawe,” gəkɨlə taa asə də ɓa mba Həmɨnpwa a kanarən ka kadawo səhase. Ndi Həmɨnpwa ka nənəngɨn ndaawa kana ama ka ɗa səhase.

¹⁴ Shezə nagi ndo ma nee ka kanaha ɗa səhase a vor hubosən a dɨ markan nggəltən zəkan a ɗa səhase nda ɓɨla də.

¹⁵ Kadawa a hubosən a dɨ mwasa səhase, səhasəngɨn mgban kana maɗə a la, nda mwasa we.

¹⁶ Hwun ndeyi ji-kottə, ɓe myaa vwakarəwnə.

¹⁷ Nagi ndo wule həmtɨ pepeti, nagi ndo səfemə dɨ pwa dɨ haka Baatə gən, ndi ma ɗa tyekəlye ka fəre ka likɨtə. A Baate aawa nggəɗə, taa asə də mgban ɓa nggəddən nda virwo ɓətɨ fyemye a dɨ virwo.

¹⁸ Ka leesən nda ɗyanga a mwasarəm mwasa hweltə dɨ ha ləmə femə diyale, gəkɨlə hɨm a gəm mi kwaməte pɨri ka fukatɨ da Həmɨnpwa a vor myee nda ɗatɨrən a vɨratə kat.

Kɨl le ka ɗasən

¹⁹ Hwun ndeyi ji-kottə, leyəm sate atɨ nagi ndo ma a sardə kwakingɨn a kɨl le, ɓe kwaamɨngɨn aa lərə byele tan-tan, ɓe ndaa lərə ɗa muune mgban.

²⁰ Gəkɨlə muune da ɓwaara aawa shi ka nzaa pepete Həmɨnpwa a dɨ mwo.

²¹ Gə-angɨn hwuna dɨmgə vor gunamtə kat ka səhasə kɨr-kɨre, zə luwom daasə ləmə feme da Həmɨnpwa ka hyatane a nda ngguɓo hubosəwnə, a wule la ɓa mbədəwnə.

²² Hwuna koddə ləməgyee Həmɨnpwa a boyo. Ɓe hwunaa gəə ji-kɨlti ɗəng hwunaa koddərən, angɨn nee vwakati hwuna dɨ vwaka nəngəwnə.

²³ Gəkɨlə anda kɨlti nagi ndo ma a dɨ kɨl ləmə feme da Həmɨnpwa ɗəng ndaa koddən, wule mangɨn mya kanarən ka ma dɨ nidə humwasən a haɓi-sokorye.

²⁴ Wule mangɨn kana nidə haɓi-sokorye a muɗə, tan myensən a dɨ nggurgə gəte humwasən a gə.

²⁵ Hɨnggən ndi ma dɨ nidə ɓashitɨ pepetɨ da Həmɨnpwa kpəkəkə, a korma dɨ dɨmdə ɓwaara gə kɨsawne, ɓashitɨngɨn ɓa nza hubosən. Myenti mangɨn aawa nggurgə la nda kɨlə, gəkɨlə nda dɨ koddə ləngɨn. Wule mangɨn Həmɨnpwa ɓa vən pepetə a vor kottɨ dan.

²⁶ Anda ama nə də dɨ niyi sɨnə dɨ koɗi pepe, kat ka angɨn ndaa kɨr kwaamɨngɨn a ɗɨkə jiiməngɨn kɨndame ka byelə hase, ndi ta vwaka nəngɨn, kotta mangɨn nee ɓaa ta diyalə də.

²⁷ Kottɨ diyala Həmɨnpwa Baatə a dɨ naarə ɗəmɗəm, kotə wule itɨnə yang: Hye ta nidə ɗyegənye ka nggamse mandyee a vor tənətə, hye kɨt nanga mgban gəkɨlə ɓe pɨrə vor sɨhashi vɨratə.